«بۇل كورسەتكىشتەرگە قۇرىلىس جۇمىستارىنىڭ ەسەبىنەن قول جەتكىزىلدى. ال بيىل قۇرىلىس جۇمىستارىنىڭ ازايۋىنا بايلانىستى ينۆەستيتسيا كولەمى دە تومەندەپ وتىر. ويتكەنى ينۆەستيتسيا قۇرىلىمىنىڭ 70-80% قۇرىلىس سالاسى قۇرايدى. ءبىز وتكەن جىلدارداعى ينۆەستيتسيالارعا تالداۋ جاساپ, 2019 جىلعا ارنالعان بولجامدىق كولەمدەردى جيناپ جوسپار قۇردىق. ەگەر ونى ورىنداساق, بىلتىرعى كورسەتكىشكە, ياعني ينۆەستيتسيالار كولەمىن تريلليون تەڭگەگە قول جەتكىزە الامىز», – دەدى قالا اكىمى باقىت سۇلتانوۆ «ينۆەستيتسيالاردى تارتۋ ماسەلەلەرى» تاقىرىبىندا وتكەن ۇكىمەت وتىرىسىندا.
جالپى قالا باسشىلىعى قالانىڭ ينۆەستيتسيا تارتۋ ادىستەرىن قايتا قاراعان. اكىمنىڭ ايتۋىنشا, حالىقارالىق قارجى ورتالىعىندا قۇرىلعان ەكوجۇيە - بىرەگەي قۇقىقتىق رەجيمى بار جالعىز الاڭ. ول قاۋىپسىز ينۆەستيتسيالاۋعا بارلىق جاعداي جاساپ جاتىر.
«سوندىقتان حالىقارالىق قارجى ورتالىعىمەن بىرلەسىپ ينۆەستيتسيا تارتۋ بويىنشا جول كارتاسىن ازىرلەدىك», – دەدى ول. قازىر قالادا ينۆەستورلاردىڭ ماسەلەلەرىن تەز ارادا شەشەتىن «استانا ينۆەست» ارنايى ۇيىمى جۇمىس ىستەيدى («ءبىر تەرەزە» قاعيداسى بويىنشا). ينۆەستيتسيا تارتۋ جۇمىستارىندا سينەرگيا قۇرۋ ماقساتىندا حالىقارالىق قارجى ورتالىعىنىڭ اۋماعىندا «استانا ينۆەستتىڭ» فرونت-كەڭسەسى اشىلادى.
«جالپى بىزدە جۇمىس بارىسىندا سوماسى 3 ترلن تەڭگە شاماسىنداعى 200-دەن استام جوبا بار, ونىڭ 45-ءى شەتەل ينۆەستورلارى مەن ترانسۇلتتىق كورپوراتسيالاردىڭ قاتىسۋىمەن ىسكە اسۋدا. بيىل اتالعان جوبالاردان 120 ملرد.تەڭگە ينۆەستيتسيا تۇسەدى دەپ كۇتىلۋدە», – دەدى ب. سۇلتانوۆ. قالا اكىمى, ارنايى ەكونوميكالىق ايماقتىڭ اۋماعىن 8 مىڭ گەكتارعا كەڭەيتۋ قاجەت ەكەندىگىن ايتتى.
«وسى جەرلەرگە كەلگىسى كەلەتىن الەۋەتتى ينۆەستورلار بار, ونىڭ ىشىندە 10 ءىرى كومپانيا 430 ملرد تەڭگە سوماسىنداعى كوپ فۋنكتسيونالدى تۇرعىن ءۇي كەشەندەرىنىڭ قۇرىلىسىن باستاۋعا دايىن. تەك وسى جوبالاردان بيىل 100 ملرد تەڭگە ينۆەستيتسيا تارتۋعا بولادى», – دەدى قالا اكىمى. ۋاكىلەتتى مەملەكەتتىك ورگاندارمەن بىرلەسىپ ەلوردانىڭ حالىقارالىق كولىكتىك قولجەتىمدىلىگىن قامتاماسىز ەتۋ باعىتىندا جۇمىس جۇرگىزىلۋدە. «اۋە قولجەتىمدىلىك – نۇر-سۇلتان قالاسىن وڭىردەگى الدىڭعى قاتارلى قارجى ورتالىقتارىنىڭ ءبىرى رەتىندە جايعاستىراتىن باستى فاكتور. ءىرى قارجى استانالارى اراسىنداعى تۇراقتى تىكەلەي رەيستەر شەتەل ينۆەستورلارى مەن تۋريستەردىڭ كەلۋىن ارتتىرادى. ەلباسىنىڭ تاپسىرماسىنا سايكەس اقش, جاپونيا, ەۋروپا, تاياۋ شىعىس جانە ازيا ەلدەرىمەن تۇراقتى تىكەلەي اۋەقاتىناستارىن ورناتۋدى ءارى قاراي جالعاستىرۋ قاجەت», – دەپ اتاپ ءوتتى ب. سۇلتانوۆ.
