وتىرىستى اشقان ماۋلەن اشىمباەۆ قازىرگى تاڭدا ەلىمىزدىڭ اسا ماڭىزدى تاريحي كەزەڭدى باستان وتكەرىپ جاتقانىنا نازار اۋداردى.
– الدىمىزدا ۇلكەن ساياسي ناۋقان – پرەزيدەنت سايلاۋى تۇر. ەلباسىمىزدىڭ تاپسىرماسىنا سايكەس بۇل سايلاۋعا ءبىزدىڭ پارتيامىز دا بەلسەندى تۇردە قاتىسادى. سوعان بايلانىستى ەرتەڭ ەلباسى, پارتيا توراعاسىنىڭ قاتىسۋىمەن پارتيانىڭ كەزەكتەن تىس XIX سەزىن وتكىزىپ, الداعى سايلاۋعا قاتىساتىن كانديداتىمىزدى ۇسىنامىز, – دەدى ماۋلەن اشىمباەۆ.
سونداي-اق ول قازاقستاننىڭ تۇڭعىش پرەزيدەنتى – ەلباسى, پارتيا توراعاسىنىڭ ابىروي-بەدەلى مەن دانا باسشىلىعىنىڭ ارقاسىندا «Nur Otan» پارتياسىنىڭ 20 جىلدىڭ ىشىندە ەلىمىزدەگى مۇشەلەرى ەڭ كوپ, جەتەكشى ساياسي كۇشكە اينالعانىن ايتىپ ءوتتى. سوندىقتان پارتيانىڭ الداعى نەگىزگى مىندەتى ەلباسى ساياساتىن ءارى قاراي جالعاستىرۋ, سوعان باستى كەپىل بولۋ جانە تۇڭعىش پرەزيدەنتىمىز انىقتاپ بەرگەن بارلىق ستراتەگيالىق ماقساتتارعا قول جەتكىزۋ بولىپ قالا بەرمەك.
– «Nur Otan» ەلباسى انىقتاپ بەرگەن ەلىمىز ءۇشىن ماڭىزدى قۇندىلىقتار – تاۋەلسىزدىك, جالپىۇلتتىق بىرلىك, باسەكەگە قابىلەتتى قۋاتتى ەكونوميكا, ءبىلىمدى وركەندەگەن قوعام جانە بۇكىل الەم مويىنداعان بەدەلدى مەملەكەت قۇرۋ سياقتى باسىمدىقتاردى ساقتايدى. وسى ماقساتتارعا قول جەتكىزۋ ءۇشىن پارتيانىڭ ۇزاقمەرزىمدى ساياسي كوشباسشىلىعىن ساقتاپ, ونى ءارى قاراي نىعايتۋ كەرەك. بۇل – بىزگە جۇكتەلگەن ۇلكەن جاۋاپكەرشىلىك, – دەدى پارتيا توراعاسىنىڭ ءبىرىنشى ورىنباسارى.
سونىمەن قاتار ماۋلەن اشىمباەۆ پرەزيدەنت سايلاۋىنا قاتىساتىن نۇروتاندىق كانديداتتىڭ ەسىمىن ەرتەڭگى سەزدە ەلباسى ايتاتىنىنا دا كوڭىل ءبولدى.
– قازاقستاننىڭ تۇڭعىش پرەزيدەنتىنىڭ ۇسىنىسىمەن ءبىزدىڭ پارتيامىزدان ەل پرەزيدەنتتىگىنە كانديدات ۇسىنۋ بيلىك ساباقتاستىعىنىڭ ماڭىزدى فاكتورى بولىپ سانالادى جانە «Nur Otan» پارتياسىنىڭ ەلباسى ساياساتىن تولىعىمەن ءارى قاراي جالعاستىراتىنىن كورسەتەدى, – دەدى «Nur Otan» پارتياسى توراعاسىنىڭ ءبىرىنشى ورىنباسارى.
پارتيا جارعىسىنىڭ 9.1-تارماعىنا سايكەس قازاقستان رەسپۋبليكاسىنىڭ پرەزيدەنتتىگىنە پارتيا اتىنان كانديدات ۇسىنۋ تەك پارتيانىڭ جوعارى باسشىلىق ورگانى – سەزدىڭ شەشىمىمەن جۇزەگە اسىرىلادى. وسىعان وراي اتالعان ماسەلەنى سەزدىڭ كۇن تارتىبىنە شىعارۋ جونىندە پارتيا ساياسي كەڭەسىنىڭ مۇشەلەرى: پارلامەنت سەناتىنىڭ دەپۋتاتى اسقار بەيسەنباەۆ, پارتيانىڭ «سوكولوۆ-سارىباي تاۋ-كەن بايىتۋ وندىرىستىك بىرلەستىگى» فيليالى توراعاسىنىڭ ءبىرىنشى ورىنباسارى الەكساندر ماكارەنكو جانە «G38» جاس كوشباسشىلار قورى» قوعامدىق قورىنىڭ جەتەكشىسى ايسۇلۋ ەرنيازوۆا ءسوز سويلەپ, بۇل جايتتىڭ ماڭىزى تۋرالى ايتتى. سونىڭ ناتيجەسىندە پارتيا ساياسي كەڭەسىنىڭ مۇشەلەرى قازاقستان رەسپۋبليكاسىنىڭ پرەزيدەنتتىگىنە كانديدات ۇسىنۋ تۋرالى ماسەلەنى پارتيانىڭ XIX سەزىنىڭ قاراۋىنا ەنگىزۋ تۋرالى ۇسىنىستى قولداپ, كوتەرىلگەن ماسەلە بويىنشا ساياسي كەڭەستىڭ قاۋلىسى قابىلداندى.
ودان بولەك, وتىرىستا كەزەكتەن تىس XIX سەزدىڭ جۇمىس ورگاندارى – ماندات, ەسەپ, رەداكتسيا كوميسسيالارىنىڭ جانە سەزد حاتشىلىعىنىڭ جەكە قۇرامدارى قارالىپ, ۇسىنىلدى.
جيىن سوڭىندا پارتيا توراعاسىنىڭ ءبىرىنشى ورىنباسارى ەرتەڭگى سەزدىڭ ەل دامۋى ءۇشىن ماڭىزى زور ەكەنىن تاعى ءبىر مارتە ەسكە سالدى.
– وزدەرىڭىز كورىپ وتىرعانداي, سەزدىڭ قاراۋىنا ەلىمىزدىڭ ءارى قاراي دامۋى ءۇشىن وتە ماڭىزدى ماسەلەلەر شىعارىلىپ وتىر. سوندىقتان الداعى ۇلكەن ءىس-شارالاردىڭ ابىرويمەن وتۋىنە بارشامىز ءبىر كىسىدەي اتسالىسايىق, – دەدى ماۋلەن اشىمباەۆ.
