ريددەرگە 7 جىلدا 860 ادام كوشىپ كەلدى

2013 جىلدان بەرى جۇمىس كۇشى مول، حالقى تىعىز قونىستانعان وڭىرلەردەن (الماتى، قىزىلوردا، جامبىل، تۇركىستان، ماڭعىستاۋ وبلىستارى جانە شىمكەنت قالاسى) شىعىس قازاقستانعا، ونىڭ ىشىندە ريددەر قالاسىنا ەڭبەك رەسۋرستارىن تارتۋ جۇمىستارى بەلسەندى جۇرگىزىلىپ جاتقانى بەلگىلى.

قالادا 283 جۇمىس ورنى بوس تۇر

وسى ۋاقىت ارالىعىندا «جۇمىسپەن قامتۋدىڭ جول كارتاسى – 2020» جانە «2017-2021 جىلدارعا ارنالعان ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلامالارى ارقىلى كەنشىلەر شاھارىنا 860 ادام قونىس اۋدارىپتى (مۇنىڭ 193-ءى - جەتىم جانە اتا-اناسىنىڭ قامقورلىعىنسىز قالعان بالالار، 667-ءى - قونىس اۋدارۋشىلار، ونىڭ 20-سى - "سەرپىن" باعدارلاماسىنىڭ تۇلەكتەرى). 170 وتباسى مەملەكەتتىك تۇرعىن ءۇي قورىنان پاتەرمەن قامتاماسىز ەتىلىپ، قالعان بولىگىنە ءبىر جىلعا تۇرعىن ءۇيدى جالعا الۋعا سۋبسيديا تولەنىپتى.  باتىس التايداعى شاعىن شاھارعا ەلىمىزدىڭ ءار تارابىنان مىڭعا جۋىق ادام كوشىپ كەلسە دە، ءالى دە ماماندارعا زارۋلىك بار. «ريددەرگە قونىس اۋدارامىن دەۋشىلەرگە ەسىگىمىز اشىق. 283 جۇمىس ورنى بوس تۇر. بىزگە نەگىزىنەن مۇعالىمدەر مەن دارىگەرلەر كەرەك. ويتكەنى، قازىر قالادا جۇمىس ىستەپ جۇرگەن مۇعالىمدەردىڭ 60 پايىزى زەينەتكەرلەر. 40-تان استام ادام زەينەتكەرلىك جاسقا جاقىنداپ قالدى. دارىگەرلەر دە سولاي، ولاردىڭ 30 پايىزى زەينەتكەرلەر»، - دەيدى قالا اكىمى جومارت مۇراتوۆ.

ريددەر قالالىق جۇمىسپەن قامتۋ ورتالىعىنىڭ ديرەكتورى اسەت ەرسايىنوۆ 2013-2019 جىلدار ارالىعىندا شاھارعا 66 مۇعالىم، 45 مەديتسينا قىزمەتكەرى (ونىڭ 12-ءسى دارىگەر)، 294 ءارتۇرلى ماماندىق يەلەرى (ماركشەيدەرلەر، جۇرگىزۋشىلەر، ەلەكتر گازىمەن دانەكەرلەۋشىلەر، مەتاللۋرگتەر، گەولوگ، كەنشىلەر، باعدارلاماشىلار، ت.ب) كەلگەنىن،  7 ادام قايتا دايارلاۋ كۋرسىن وتكەنىن، 3 ادام جاڭا بيزنەس-يدەيالاردى ىسكە اسىرۋ ءۇشىن گرانت العانىن ايتادى. «ءبىز ريددەرگە قالامىزدا سۇرانىسقا يە مامانداردى شاقىرامىز. 2019 جىلى 35 وتباسىن (105 ادام) قونىستاندىرۋ جوسپارلانىپ وتىر. بۇگىنگى تاڭدا 20 وتباسى (47 ادام) قونىس اۋداردى»، - دەيدى ول.

جاس وتباسى، جاس مەتاللۋرگتەر

كەزىندە دىنمۇحاممەد قوناەۆ كەنشى بولىپ ەڭبەك ەتكەن ريددەر ازەلدەن مەتاللۋرگتەرگە قۇتتى مەكەن سانالادى. قازىر شاھارداعى كەنىشتەردە جۇمىس ىستەيتىن قاراكوزدەردىڭ قاتارى كوبەيىپ كەلەدى. سونىڭ ءبىرى – «قازتسينك» جشس-ىنە قاراستى ريددەر مەتاللۋرگيا كەشەنىنىڭ قىزمەتكەرى، قىزىلوردا وبلىسى، شيەلى اۋدانىنىڭ تۋماسى ماقسۇت سەيىتكامال. ماقسۇت 2014-2017 جىلدارى «سەرپىن» باعدارلاماسى ارقىلى ريددەر اگرارلىق كوللەدجىن ءتامامداپتى. سول جىلى بىردەن جۇمىسقا ورنالاسىپتى. ومىرلىك جارى الماگۇل امىرەنوۆامەن وسى وقۋ ورنىنىڭ قابىرعاسىندا تانىسىپ، كوڭىل جاراستىرىپ، شاڭىراق قۇرىپتى. «2017 جىلى وقۋدى ءبىتىرىپ، كوشى-قون باعدارلاماسىنا كەزەككە تۇرىپ، پاتەر جالداعانعا سۋبسيديا الدىق. 2018 جىلى باسپانالى بولدىق. قازىر وزىممەن بىرگە تۋعان ءىنىم ۇلان «قازتسينكتە» جۇمىس ىستەپ جاتىر. ريددەردە تۇرىپ جاتقانىمىزعا 5 جىلداي ۋاقىت بولدى. ۇيرەنىپ قالدىق. ەل جاققا اراسىندا بارىپ تۇرامىز»، - دەيدى ماقسۇت.

الماگۇل امىرەنوۆا قازىر ريددەر قالالىق جۇمىسپەن قامتۋ ورتالىعىندا جۇمىس ىستەيدى. «ءوزىم الماتى وبلىسىنىڭ تالعار اۋدانىنانمىن. ماقسۇت ەكەۋمىز «سەرپىن» باعدارلاماسىمەن بىرگە وقىدىق. بىرگە وقىپ ءبىلىم العاننان كەيىن وسىندا قالۋدى ۇيعاردىق. مەنىڭ قازىرگى جۇمىسىم سىرتتان كوشىپ كەلەتىن قونىس اۋدارۋشىلارمەن تىعىز بايلانىستى. ءوزىم دە ەلىمىزدىڭ باسقا وڭىرىنەن كوشىپ كەلگەننەن كەيىن ولاردىڭ جاعدايلارىن جاقسى تۇسىنەمىن»، - دەيدى ول.

شىعىس قازاقستان وبلىسى،

ريددەر قالاسى

سۋرەتتەردى تۇسىرگەن مەرەي قايناروۆ