«تۇڭعىش پرەزيدەنت - ەلباسى ن.ءا.نازارباەۆ ۇكىمەتتىڭ 2019 جىلعى 30 قاڭتارداعى كەڭەيتىلگەن وتىرىسىندا: «ەلدىڭ ءۇشىنشى جاڭعىرۋى ءۇشىن نەگىزگى كاپيتالعا جىلىنا جالپى ىشكى ونىمگە 30%-دان اساتىن دەڭگەيدە ينۆەستيتسيالار تارتۋ قاجەت» دەگەن بولاتىن. ول: «ناقتى سەكتور مەن ينفراقۇرىلىمدىق جوبالاردى قارجىمەن قامتاماسىز ەتۋ بويىنشا جۇيەلى شەشىمدەر ازىرلەنسىن» دەپ, سونداي-اق دامىعان ەلدەردەن ينۆەستورلارعا باسا نازار اۋدارا وتىرىپ, ينۆەستيتسيالار تارتۋدىڭ كەشەندى ەكوجۇيەسىن جاساۋدى تاپسىردى. بۇل تاپسىرمالاردى ىسكە اسىرۋ – ۇكىمەت ءۇشىن ەرەكشە ماڭىزدى مىندەت» دەدى مينيستر.
مينيسترلىك اقپاراتىنا سۇيەنسەك, 2017 جىلى جاھاندىق تىكەلەي ينۆەستيتسيالار كولەمى 23%-عا, 2018 جىلى ول 19%-عا, 1,2 ترلن اقش دوللارىنا دەيىن تومەندەگەن (2016 جىلى 1.86 ترلن اقش دوللارى, 2017 جىلى 1.47 ترلن اقش دوللارى, 2019 جىلى 1.2 ترلن اقش دوللارى). تيىسىنشە, ينۆەستيتسيالىق اعىندار ءۇشىن الەمدە, اسىرەسە دامۋشى ەكونوميكالار اراسىندا باسەكەلەستىك كۇرت وسۋدە.
ول ءۇشىن كورشىلەس ەلدەردىڭ ناتيجەسىنە كوز سالساق.
ماسەلەن, 2019 جىلعى 15 ناۋرىزدا قىتاي «شەتەلدىك ينۆەستيتسيالار تۋرالى» جاڭا زاڭ قابىلدايدى. ساراپشىلاردىڭ باعالاۋى بويىنشا بۇل 10 جىل ىشىندە ولاردىڭ ەكونوميكاسىنا 1.5 ترلن اقش دوللارىن تارتۋعا مۇمكىندىك بەرەدى.
رەسەيدە بىرنەشە جىل بۇرىن تىكەلەي ينۆەستيتسيالار قورى قۇرىلعان بولاتىن. قازىردىڭ وزىندە 50-دەن اسا جوباعا 1.5 ترلن رۋبلدەن استام سوماعا ينۆەستيتسيالار جۇزەگە اسىرىلدى. بۇل رەتتە تارتىلاتىن شەتەلدىك ينۆەستيتسيالارعا مەملەكەتتىك ينۆەستيتسيانىڭ تەپە-تەڭدىگى 7-گە 1-ءدى قۇرايدى.
رەسەيدە نەگىزگى كاپيتالعا ينۆەستيتسيالار دەڭگەيى جالپى ىشكى ءونىمنىڭ 21%-ىن قۇرايدى, ال قازاقستاندا بۇل جالپى ىشكى ءونىمنىڭ 19%-ىنان از. وزبەكستان رەسپۋبليكاسىندا اعىمداعى جىلدىڭ قاڭتارىندا 1 ملرد دوللار كاپيتالىمەن تىكەلەي ينۆەستيتسيالار قورى قۇرىلدى.
قازاقستاندا جالپى ينۆەستيتسيالار اعىنىنىڭ وسۋىنە قاراماستان تازا ينۆەستيتسيالار كولەمى 2016 جىلعى 8.5 ملرد دوللارمەن سالىستىرعاندا وتكەن جىلى 3.8 ملرد دوللاردى قۇراپ, ەكى ەسەدەن كوپ قۇلدىرادى.
«سونداي-اق, وكىنىشكە وراي, ءبىزدىڭ ەكونوميكامىزدىڭ شيكىزاتتىق ەمەس سەكتورلارىنا تىكەلەي شەتەلدىك ينۆەستيتسيالار ولاردىڭ جالپى كولەمىنىڭ ۇشتەن ءبىر بولىگىن عانا قۇرايتىنىن اتاپ ءوتۋ كەرەك.سوندىقتان, بىزگە ساپالى ينۆەستيتسيالار تارتۋ ءۇشىن جاڭا ءتيىمدى تەتىكتەر قۇرۋ اسا ماڭىزدى» دەدى ءا.سمايىلوۆ.
اتالعان ماسەلەلەردى جۇزەگە اسىرۋ ءۇشىن وسى سالاداعى ينفراقۇرىلىمدى مۇقيات قايتا قاراۋ قاجەتتىلىگى تۋىنداعانى تۋرالى ايتا وتىرا, «جوعارىدا باياندالعاندى ەسكەرە وتىرىپ, پرەمەر-ءمينيستردىڭ تاپسىرماسى بويىنشا وسى ماسەلە جونىندە ۇسىنىستار ازىرلەۋ ءۇشىن ارنايى جۇمىس توبى قۇرىلدى» دەدى.
