«قولدانىستاعى تەتىكتەرگە ەگجەي-تەگجەيلى تالداۋ جۇرگىزىلدى, وسال جەرلەر انىقتالدى, اعىمداعى قىزمەتتىڭ تيىمسىزدىك سەبەپتەرى بەلگىلەندى. قازىرگى ۋاقىتتا مەملەكەتتىك ورگاندار مەن ۇيىمدار اراسىنداعى ءىس-قيمىلداردى جالپى ۇيلەستىرۋ جوق. ينۆەستيتسيالىق كليماتتى قالىپتاستىرۋمەن مينيسترلىكتەر, ۇلتتىق كومپانيالار, اكىمدىكتەر جانە باسقالار اينالىسادى. بىراق ولاردىڭ اراسىندا بايلانىس جوق», دەدى ءا.سمايىلوۆ.
بۇدان سوڭ ول استانا حالىقارالىق قارجى ورتالىعىندا جاسالعان قۇرالدار پايدالانىلمايتىنىن اتاپ ءوتتى.
«الەمدىك ينۆەستيتسيالىق قوعامداستىق ءۇشىن تۇسىنىكتى فورماتتا راسىمدەلگەن جانە ۇسىنىلعان تارتىمدى جوبالاردىڭ سانى جەتكىلىكسىز. ەلدىڭ ينۆەستيتسيالىق ءيميدجىن شەتەلدە ىلگەرىلەتۋ جونىندەگى جۇمىس ءتيىستى دەڭگەيدەن ءالى الىس. وسى جۇيەلى پروبلەمالاردى شەشۋ ءۇشىن جۇما كۇنى (2019 جىلعى 19 ساۋىردە) جۇمىس توبىنىڭ ۇسىنىستارى نەگىزىندە ۇكىمەت «قازاقستان رەسپۋبليكاسىنا شەتەلدىك ينۆەستيتسيالار تارتۋ جونىندەگى شارالاردى كۇشەيتۋ تۋرالى» قاۋلى قابىلدادى. وسى قاۋلىمەن شىن مانىندە ينۆەستيتسيالار تارتۋ بويىنشا جۇمىستىڭ جاڭا ارحيتەكتۋراسى جاسالدى», دەدى ول.
ونىڭ ايتۋىنشا, بۇل ەلىمىزدەگى ينۆەستيتسيالىق قىزمەتتىڭ جاعدايىن ساپالى تۇردە جاقسارتۋ ءۇشىن سەرپىن بولماق.
«جاڭا ارحيتەكتۋرادا پرەمەر-ءمينيستردىڭ توراعالىعىمەن ينۆەستيتسيالار تارتۋ ماسەلەلەرى جونىندەگى ۇيلەستىرۋ كەڭەسى ەرەكشە ءرول اتقاراتىن بولادى. وعان ستراتەگيالىق ينۆەستيتسيالىق جوبالاردى ىسكە اسىرۋدىڭ ەرەكشە شارتتارىن ۇسىنۋ جونىندەگى وكىلەتتىكتەر زاڭنامالىق دەڭگەيدە بەكىتىلەتىن بولادى. بۇل ينۆەستيتسيالىق جوبالاردى ءتيىمدى ىسكە اسىرۋ ءۇشىن قاجەتتى شەشىمدەردى تەز جانە جەدەل قابىلداۋعا مۇمكىندىك بەرەدى», دەدى مينيستر.
مينيسترلىكتىڭ اقپاراتىنا سايكەس, كەڭەس قۇرامىنا قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى, قازاقستان رەسپۋبليكاسى پرەمەر-ءمينيسترىنىڭ ينفراقۇرىلىمدىق دامۋ ماسەلەلەرى جونىندەگى ورىنباسارى, نەگىزگى مينيسترلىكتەردىڭ (ادىلەت, سىرتقى ىستەر, ۇلتتىق ەكونوميكا, يندۋستريا جانە ينفراقۇرىلىمدىق دامۋ, ەنەرگەتيكا, اۋىل شارۋاشىلىعى, ىشكى ىستەر), استانا حالىقارالىق قارجى ورتالىعىنىڭ, ۇلتتىق باسقارۋشى حولدينگتەردىڭ, ۇلتتىق كومپانيالاردىڭ, «اتامەكەن» ۇلتتىق كاسىپكەرلەر پالاتاسىنىڭ ءبىرىنشى باسشىلارى, سونداي-اق جوعارعى سوتتىڭ, باس پروكۋراتۋرانىڭ جانە ۇلتتىق قاۋىپسىزدىك كوميتەتىنىڭ باسشىلارى كىردى.
«ينۆەستيتسيالار جونىندەگى ومبۋدسمەن بولىپ قازاقستاننىڭ پرەمەر-ءمينيسترى تاعايىندالعانىن اتاپ ءوتۋ ماڭىزدى. استانا حالىقارالىق قارجى ورتالىعى ينۆەستيتسيالاردى تارتۋ جانە قازاقستان رەسپۋبليكاسىنىڭ ينۆەستيتسيالىق ءيميدجىن ىلگەرىلەتۋ جونىندەگى جۇمىستى ۇيلەستىرۋ بويىنشا بىرىڭعاي ورتالىق بولىپ ايقىندالاتىن بولادى. ول وڭىرلىك ينۆەستيتسيالىق حاب بولادى», دەدى ءا.سمايىلوۆ.
