وسىعان بايلانىستى قازاقستان رەسپۋبليكاسى پرەزيدەنتىنىڭ مەملەكەتتىك ءتىلدى ەركىن مەڭگەرۋى ءتيىس دەگەن ماسەلە بويىنشا ورتالىق سايلاۋ كوميسسياسىنىڭ مۇشەسى ءلاززات سۇلەيمەن بايانداما جاسادى. وندا ول قازاقستان رەسپۋبليكاسى پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەرۋىن (قازاقستان رەسپۋبليكاسى كونستيتۋتسياسىنىڭ 41-بابىنىڭ تالابى) قازاقستان رەسپۋبليكاسى ورتالىق سايلاۋ كوميسسياسىنىڭ قاۋلىسىمەن قۇرىلعان قۇرامىندا ءتىل ماماندارى جانە وزگە دە ماماندار بار كەم دەگەندە 5 ادامنان تۇراتىن لينگۆيستيكالىق كوميسسيانىڭ قورىتىندىسى انىقتايتىندىعىن ايتا وتىرىپ, قازاقستان رەسپۋبليكاسىنىڭ ورتالىق سايلاۋ كوميسسياسى ءبىلىم مينيسترلىگىمەن, جەتەكشى ۋنيۆەرسيتەتتىڭ رەكتورلارىمەن كەڭەس وتكىزىپ جانە ورتالىق سايلاۋ كوميسسياسىنىڭ جانىنداعى لينگۆيستيكالىق كوميسسيانىڭ قۇرامىنا قازاق ءتىلى مەن ادەبيەتى سالاسىنداعى كورنەكتى عالىمداردىڭ ۇسىنىلعانىن جەتكىزدى. اتاپ ايتقاندا, ەلىمىزگە بەلگىلى عىلىم دوكتورلارى, پروفەسسورلار مىرزاتاي جولداسبەكوۆ, ءادىل احمەتوۆ, عاريفوللا ەسىم, سەيىت قاسقاباسوۆ, گۇلتاس قۇرمانباي جانە ەردەن قاجىبەك ۇسىنىلدى.
مىنە, وسىعان بايلانىستى قازاقستان رەسپۋبليكاسىنىڭ ورتالىق سايلاۋ كوميسسياسىنىڭ «قازاقستان رەسپۋبليكاسىنىڭ پرەزيدەنتتىگىنە كانديداتتاردىڭ مەملەكەتتىك ءتىلدى ەركىن مەڭگەرگەندىگىن انىقتاۋ ءجونىندەگى لينگۆيستيكالىق كوميسسيانى قۇرۋ تۋرالى» 2015 جىلعى 27 اقپانداعى №6/263 قاۋلىسىنىڭ لينگۆيستيكالىق كوميسسيا قۇرامى بولىگىنە وزگەرىستەر ەنگىزىلدى.
ال قازاقستان رەسپۋبليكاسى كونستيتۋتسيالىق كەڭەسىنىڭ «قازاقستان رەسپۋبليكاسى كونستيتۋتسياسىنىڭ 41-بابىنىڭ 2-تارماعىن رەسمي ءتۇسىندىرۋ تۋرالى» 1998 جىلعى 9 قازانداعى №280 قاۋلىسىنا سايكەس, «قازاقستان رەسپۋبليكاسى كونستيتۋتسياسىنىڭ 41-بابىنىڭ 2-تارماعى نورماسىنىڭ «مەملەكەتتىك ءتىلدى ەركىن مەڭگەرەتىن» دەگەن بولىگىن قازاق تىلىندە ساۋاتتى تۇردە وقيدى, جازادى, ءوز ويلارىن قينالماي وڭاي جەتكىزەدى جانە كوپشىلىك الدىندا ءسويلەي الادى دەپ ۇعۋ كەرەك» دەپ انىقتالعاندىعى بەلگىلى. سوعان وراي پرەزيدەنتتىككە كانديداتتى مەملەكەتتىك ءتىلدى ەركىن مەڭگەرگەندىگىن انىقتاۋ ءۇشىن ولاردان لينگۆيستيكالىق كوميسسيا ۇسىنعان تاقىرىپ بويىنشا كولەمى ەكى بەتتەن اسپايتىن جازباشا تاپسىرما جازۋ, سوسىن لينگۆيستيكالىق كوميسسيا ۇسىنعان كولەمى ءۇش باسپا بەتتەن اسپايتىن ءماتىندى وقۋ جانە لينگۆيستيكالىق كوميسسيا ۇسىنعان تاقىرىپ بويىنشا كوپشىلىك الدىندا ون بەس مينۋتتان كەم ەمەس ءسوز سويلەۋ تالاپ ەتىلمەك.
ول ءۇشىن جازباشا جاتتىعۋ, قازاق ادەبيەتى كلاسسيكتەرىنىڭ تۋىندىلارىن وقۋ جانە ەركىن تاقىرىپقا سويلەۋ ءۇشىن بىرنەشە تاقىرىپتاردى لينگۆيستيكالىق كوميسسيا الدىن الا ايقىندايدى, ۇمىتكەر ەمتيحانداعىداي تاپسىرمالاردىڭ ءۇش ءتۇرىنىڭ ارقايسىسىنان ءبىر بىردەن تاڭداپ الادى. بۇل ورايدا پرەزيدەنتتىككە كانديداتقا ەمتيحاننىڭ ءار كەزەڭىنە دايىندالۋ ءۇشىن جەتكىلىكتى ۋاقىت بەرىلەدى. ال جازباشا تاپسىرماعا قاجەت بولسا, ءبىر ساعاتتان كەم ەمەس ۋاقىت بەرىلەدى. سونىمەن قاتار 15 مينۋت كوپشىلىك الدىندا ءسوز سويلەۋگە دايىندالۋ ءۇشىن 1 ساعات ۋاقىت بەرىلەدى. ءسويتىپ لينگۆيستيكالىق كوميسسيانىڭ وتىرىسى اشىق جانە جاريالى بولادى, دەدى ل.سۇلەيمەن.
ال كانديداتتاردى تىركەۋدىڭ كەيبىر ماسەلەلەرى تۋرالى ءسوز العان ورتالىق سايلاۋ كوميسسياسىنىڭ مۇشەسى باقىت مەلدەشەۆ, سايلاۋ تۋرالى زاڭنىڭ 59-بابىنىڭ 2-تارماعىندا كانديداتتىڭ جانە ونىڭ زايىبىنىڭ تۇرعىلىقتى جەرى بويىنشا مەملەكەتتىك كىرىستەر ورگاندارىنا ۇسىنۋ مەرزىمى باستالعان ايدىڭ ءبىرىنشى كۇنىندەگى, ياعني 2019 جىلعى 1 ساۋىردەگى كىرىستەرى مەن مۇلكى تۋرالى دەكلاراتسيانى ۇسىنۋى كوزدەلگەن, دەدى.
سونداي-اق كانديداتتىڭ رەسپۋبليكا پرەزيدەنتىنىڭ مىندەتتەرىن ورىنداۋىنا كەدەرگى كەلتىرەتىن اۋرۋلارىنىڭ جوقتىعىن راستاۋ ءۇشىن وعان مەديتسينالىق كۋالاندىرۋ جۇرگىزىلەدى, ونىڭ قورىتىندىسى دەنساۋلىق جاعدايى تۋرالى ءتيىستى مەديتسينالىق قورىتىندىمەن رەسىمدەلەدى. ال مەديتسينالىق قورىتىندىعا قويىلاتىن تالاپتار دەنساۋلىق ساقتاۋ مينيسترلىگىمەن بىرلەسكەن نورماتيۆتىك-قۇقىقتىق اكتىمەن بەلگىلەنەدى.
جالپى بىرلەسكەن نورماتيۆتىك-قۇقىقتىق اكتىسىندە قازاقستان رەسپۋبليكاسىنىڭ پرەزيدەنتتىگىنە كانديدات رەتىندە تىركەۋگە كەدەرگى كەلتىرەتىن 107 اۋرۋ تىزبەسى كورسەتىلگەن. دەنساۋلىق جاعدايى تۋرالى مەديتسينالىق قورىتىندىنى كانديدات «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ كونستيتۋتسيالىق زاڭىنىڭ 59-بابىندا كوزدەلگەن قۇجاتتارمەن بىرگە كانديدات رەتىندە تىركەلۋ ءۇشىن ورتالىق سايلاۋ كوميسسياسىنا ۇسىنادى.
