ماڭعىستاۋدان لوندونعا اتتانعان ۇلان
سارسەنبى, 18 شىلدە 2012 7:34
ماڭعىستاۋدىڭ قازاق سپورتىنداعى سالماعى ءازىر بوكستىڭ تارازىسىنا ءتۇسىپ تۇر. بۇعان دەيىن اتى ەردوس جاڭابەرگەنوۆپەن شىققان ولكە لوندون وليمپياداسىنداعى ءۇمىتىن ادىلبەك نيازىمبەتوۆكە ارتىپ وتىر. الەم حالقى سىلتىدەي تىنىپ نازار اۋداراتىن ۇلكەن رينگكە قازاقستاننىڭ كوك بايراعىن جەلبىرەتە بەت الاتىن توعىز سايىپقىران بوكسشىمىزدىڭ ءبىرى ول.
سارسەنبى, 18 شىلدە 2012 7:34
ماڭعىستاۋدىڭ قازاق سپورتىنداعى سالماعى ءازىر بوكستىڭ تارازىسىنا ءتۇسىپ تۇر. بۇعان دەيىن اتى ەردوس جاڭابەرگەنوۆپەن شىققان ولكە لوندون وليمپياداسىنداعى ءۇمىتىن ادىلبەك نيازىمبەتوۆكە ارتىپ وتىر. الەم حالقى سىلتىدەي تىنىپ نازار اۋداراتىن ۇلكەن رينگكە قازاقستاننىڭ كوك بايراعىن جەلبىرەتە بەت الاتىن توعىز سايىپقىران بوكسشىمىزدىڭ ءبىرى ول.
ءا.نيازىمبەتوۆ 23 جاستا. 10 جاسىندا اتاسىنىڭ جەتەكتەۋىمەن العاش اۋىلداعى قازاق كۇرەسى ۇيىرمەسىنىڭ تابالدىرىعىن اتتاعان ول ارتىنشا بوكس سەكتسياسىنا اۋىستى. قارشاداي ۇلدىڭ بۇلاي ەتۋىنە ەشكىم كەڭەس تە بەرگەن جوق, ەشكىم قولقالاعان دا جوق. ءوز تۇيسىگى, ءوز تاڭداۋى. انىعىندا, ءوز قابىلەتىڭە قاراي ارەكەتتەنۋدىڭ ناتيجەلى بولاتىندىعىنىڭ ناقتى كورىنىسى.
ون ءۇش جىل ءۇزىلىسسىز جاتتىعۋمەن ءوتتى, سپورت زالدىڭ تابالدىرىعىن كۇن قۇرعاتپاي اتتاۋدى داعدىعا اينالدىردى. راسىندا, اتا-اناسى ۇلدارىنان ۇلكەن سپورتشى شىعادى دەپ ويلاماپتى, تەك ەر بالانىڭ سپورتتان حاباردار جانە قايراتتى بولعانى ءجون دەگەن قىزىعۋشىلىقپەن قاراعان. ۇلدارى 6-سىنىپتا وقىپ جۇرگەندە وزبەكستاننىڭ جىزاق قالاسىندا ا.ۆاداۋوۆتى ەسكە الۋ تۋرنيرىنەن اۋىلدان اتتانعان 7 ءجاسوسپىرىمنىڭ اراسىنان جالعىز ءوزى جەڭىمپاز بولىپ ورالعاندا دا كەزدەيسوقتىق رەتىندە قابىلداعان. ءبىراق, تاستۇلەك قىراننىڭ توماعاسى سىپىرىلار جۇلدىزدى ءسات الدا ەكەن, ياعني جاڭاوزەنگە جۇمىسقا ورنالاسقان اكەسى ءسابيت ۇلى جايلى قازاق جەرىندەگى جاتتىقتىرۋشىلارعا ايتادى. كوپ ۇزاماي كىشكەنتاي ءادىلبەكتى جاڭاوزەنگە الدىرىپ, اقتاۋدا وتكەن سايىسقا قاتىستىرىپ بايقايدى. رينگتە جۇدىرىقتاي ءتۇيىلىپ, اسىقتاي ءۇيىرىلىپ بالاڭ قاداممەن ويناق سالعان ۇلاننىڭ بويىنان وزىندىك ماشىق-ءمانەردى اڭعارعان كانىگى جاتتىقتىرۋشىلار – مارات جاكيەۆ پەن جەڭىس جارىلعاپوۆ ءسابيت اعاعا ادىلبەكتى اقتاۋدا قالدىرسا, وزدەرى باۋلىپ-باپتايتىنىن ايتىپ ۇسىنىس بىلدىرەدى.
ەردىڭ باعى ەل مەن جەردىڭ كيەسىن اڭساعان بولۋى كەرەك, ءادىلبەكتىڭ دە جۇلدىزى قازاق جەرىنە, كيەلى ماڭعىستاۋعا كەلىپ, ءوز اعالارى الدىندا جاتتىققان سوڭ جارقىراي ءتۇستى. اۋىل اراسىنداعى سايىستاردا تالاي رەت توپ جارعان ادىلبەك 2007 جىلى ازيا چەمپيونى اتانىپ, ءوزىن مويىنداتا ءتۇستى. 2008, 2009 جىلدارى قاتارىنان قازاقستان چەميونى بولسا, 2010 جىلى موڭعوليادا وتكەن ستۋدەنتتەر چەمپيوناتىنان قولا ءجۇلدەمەن ورالدى.
ول ءۇشىن تابىستى جىل 2011 جىل بولدى. بۇل جىلى باكۋدە ءوتكەن الەم چەمپيوناتىندا 2-ورىندى يەلەنىپ, لوندون وليمپياداسىنا جولدامانى قانجىعاسىنا بايلاپ قايتتى. وسىلايشا ءار جىلىن سپورتپەن وزەكتەستىرە ورگەن نيازىمبەتوۆ ميلليونداعان وتانداستارى اراسىنان ەل ءۇمىتىن ارقالاپ شىققان اعالارىمەن بىرگە لوندونعا اتتانادى.
جەرلەستەرى «جەڭىسپەن جولىعايىق!» دەپ اق تىلەكپەن, «ماڭعىستاۋدىڭ ويىنداعى 362 اۋليە جار بولسىن!» دەگەن اق باتامەن الىس جولعا اتتاندىرىپ سالعان ادىلبەك قازىر استانادا دايىندىعىن دامىتۋ ءۇستىندە. 81 كگ. سالماق دارەجەسىندە سىنعا تۇسەتىن ول قارسىلاستارىنىڭ وسال بولمايتىنىن بىلەدى, ويتكەنى وليمپياداعا تەك ءاربىر ەلدىڭ ساقاداي سايلانعان ساڭلاق سپورتشىلارى كەلەتىنىن جاقسى ءتۇسىنەدى. العاشقى رينگتەن باستاپ, فينالدىق ويىندار سىندى ۇلكەن تايتالاسپەن وتەتىن سىندا ءوز سەنىمىن سەرىك ەتەتىنىن, تاۋەلسىز قازاقستاننىڭ مەرەيى ءۇشىن بار جىگەرىن جۇمسايتىندىعىن تەلەفون ارقىلى جەتكىزدى.
«ول وتباسىمىزداعى ەكى ۇلدىڭ كەنجەسى, ەكى قارىنداسى بار. كىشى قىزىم قۇمار كەكۋشينكاي-كاراتەدەن سپورت شەبەرلىگىنە كانديدات. سپورت جولى وڭاي ەمەس قوي, كۇندە ەرتە تۇرىپ جۇگىرىپ, ءبىر تىنىم تاپپايتىن بالامدى كەيدە ايايمىن. بىراق, وسى قيىندىقتاردىڭ بارلىعى وعان وليمپياداعا جول اشتى. قازىر جاتسام-تۇرسام تىلەگىن تىلەپ ءجۇرمىن, ول وزىنە سەنىم ارتقان كۇللى قازاقتىڭ ءجۇزىن جەرگە قاراتپاسا ەكەن دەيمىن», دەيدى اكەسى ءسابيت.
كەشە عانا اقتاۋ قالاسىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتى سپورت فاكۋلتەتىنىڭ ديپلومىن يەلەنگەن ءا.نيازىمبەتوۆ لوندون وليمپياداسىنا جوعارى ءبىلىمدى سپورتشى رەتىندە قاتىسپاق. «باعىڭ مەن بابىڭ قاتار اتويلاسىن!» بارشا قازاقتىڭ تىلەگى وسى ەكەندىگى انىق.
مارات جاكيەۆ, جاتتىقتىرۋشىسى:
– سپورتشىعا كەرەگى – ەڭبەكقورلىق, تاباندىلىق, جاۋاپكەرشىلىك. ادىلبەكتە وسى قاسيەتتەر بار. ماقساتىنا جەتۋ جولىندا ءوزىن اياماي قامشىلايتىنى ۇنايدى. بابىنا كەلۋ ءساتىن رينگكە شىعار ءساتكە توقايلاستىرىپ وتىرمىز, ءايتپەسە بابىنا بۇگىن كەلسە, ەرتەڭ ناقتى قاجەت ساتتە قوجىراپ كەتۋى ءمۇمكىن. بىلايعى حالىق تۇسىنە بەرمەۋى دە مۇمكىن, سپورتتىڭ ءوز قاعيدالارى مەن تالاپتارى, تەرميندەرى, كەرەك دەسەڭىز ىرىم-تىيىمى دا بولادى. سوندىقتان, ادىلبەكتىڭ جاراۋ قالىپقا تۇسكەن قالپىن كەيىنگە ىعىستىرىپ وتىرمىز. وليمپياداعا سايدىڭ تاسىنداي ىرىكتەلگەن جىگىتتەر كەلەدى, بارلىعى دا باستى قارسىلاس. ادىلبەك بۇرىن كۋبالىق حۋليو لاكرۋزبەن ەكى رەت كەزدەسىپ, العاشىندا ودان ۇتىلىپ, ەكىنشىسىندە ەسەپتى تۇزەتكەن بولاتىن. رەسەيدىڭ بەرەنى ەگور مەحونتسەۆتەن ەكى رەت ۇتىلىپ قالعان ەدى. مۇمكىن, وليمپيادا وسى ولقىلىقتىڭ ورنىن تولتىرۋعا بەرىلگەن مۇمكىندىك بولار؟
قىسقاسى, قازاقتىڭ قارا بالاسىنىڭ قايراتىن ەندى لوندون تورىنەن كورەتىن بولامىز.
سەرگەي پاحوموۆ, ماڭعىستاۋ وبلىستىق تۋريزم, دەنە ءتاربيەسى جانە سپورت باسقارماسىنىڭ باستىعى:
– ەلباسى سپورت سالاسىن كوتەرۋگە, تۇرعىنداردى سپورتقا تارتۋعا باسا نازار اۋدارىپ, ناقتى تاپسىرمالار بەرىپ وتىر. جىل سايىنعى جولداۋلارىندا جانە كەشەگى «جالپىعا ورتاق ەڭبەك قوعامىنا» وراي بەرگەن 20 تاپسىرماسىندا سپورتتى دامىتۋ تۋرالى ايتىلدى. سوندىقتان, ماڭعىستاۋدا سپورت سالاسىن دامىتۋ ءۇشىن قىرۋار جوسپارلار بار. سپورت زالدار سانىنىڭ جەتىسپەۋشىلىگىن ازايتۋ, سپورت سارايى مەن سپورت قالاشىعىن سالۋ جانە وليمپيادا سپورتشىلارىن دايدىنداۋ – جۇمىسىمىزدىڭ باستى ماقساتى. ءبىزدىڭ وبلىستان XXX جازعى وليمپيا ويىندارىنا بوكستان ادىلبەك نيازىمبەتوۆ پەن جەڭىل اتلەتيكادان دەنيس سەمەنوۆ ليتسەنزيا الدى. ال نيازىمبەتوۆ – تالاي سىننان وتكەن جۇيرىك قوي, باستى سەنىمىمىز دە ونىڭ جاۋاپكەرشىلىگىندە. جاقسىلىقپەن جولىن توسامىز.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
