قوس ۇمىتكەر
سەيسەنبى, 19 ماۋسىم 2012 7:41
ەرلى-زايىپتى جەڭىل اتلەتشى كارپوۆتار وليمپياداعا بىرگە بارادى
ءتورت جىلدا ءبىر اينالىپ سوعاتىن بۇل ءدۇبىرلى دودانىڭ ارعى-بەرگى تاريحىندا ءبىر شاڭىراقتىڭ شامشىراقتارى قويان-قولتىقتاسا جارىسقا قاتىسۋى سيرەك وقيعا بولسا, قازاق ەلى اتىنان وسىلايشا سايىسقا تۇسۋشىلەردىڭ جۇبى جاراسقان ەكى ساڭلاقتى العاشقىلارىنىڭ ءبىرى دەۋگە بولادى. سپورت جانكۇيەرلەرى قاۋىمىنا ولاردى ارتىق تانىستىرىپ جاتۋدىڭ قاجەتتىگى بولا قويماس.
سەيسەنبى, 19 ماۋسىم 2012 7:41
ەرلى-زايىپتى جەڭىل اتلەتشى كارپوۆتار وليمپياداعا بىرگە بارادى
ءتورت جىلدا ءبىر اينالىپ سوعاتىن بۇل ءدۇبىرلى دودانىڭ ارعى-بەرگى تاريحىندا ءبىر شاڭىراقتىڭ شامشىراقتارى قويان-قولتىقتاسا جارىسقا قاتىسۋى سيرەك وقيعا بولسا, قازاق ەلى اتىنان وسىلايشا سايىسقا تۇسۋشىلەردىڭ جۇبى جاراسقان ەكى ساڭلاقتى العاشقىلارىنىڭ ءبىرى دەۋگە بولادى. سپورت جانكۇيەرلەرى قاۋىمىنا ولاردى ارتىق تانىستىرىپ جاتۋدىڭ قاجەتتىگى بولا قويماس.
دميتري جانە يرينا كارپوۆتار ەسىمدەرى كوپتەن بەرى الىسقا تانىمال, جەڭىل اتلەتيكا بويىنشا ازيا, ەۋروپا, الەم بىرىنشىلىكتەرىنىڭ بىرنەشە ءدۇركىن جۇلدەگەرلەرى.
الدىمەن دميتري كارپوۆ جايلى ايتقاندا, ونسايىس بويىنشا «ۆ» توبىندا بىلتىر چەحيانىڭ كلادنو قالاسىندا وتكەن حالىقارالىق جارىستا لوندون وليمپياداسىنا بارۋعا جول اشقان ليتسەنزيانى جەڭىپ العان بولاتىن. قازاقستان ۇلتتىق قۇراما كومانداسىنىڭ بەلدى ءبىر مۇشەسى تۇرعىسىندا سودان بەرى تىنىمسىز ۇدايى دايىندىق ۇستىندە. «قازىر ناعىز سپورتتىق بابىمدامىن. ەشتەڭەگە الاڭسىزبىن. جان-جاقتى جاتتىعۋعا جاعداي جاسالدى. نامىس تۋىن جوعارى ۇستاۋعا بەرىكپىن», دەيدى ول. داۋىسىندا نىق سەنىم, جۇزىندە جىگەر بار. باپكەرلەرى ايتقانداي, سول قۋانتادى.
مۇنىڭ الدىندا افينا, بەيجىڭ وليمپيادالارىنا قاتىسىپ, بىرىنشىسىندە قولا جۇلدەگەر اتانىپ, ەكىنشىسىندە جولى بولماي قالىپ, ەندىگى كەزەكتەگى ءۇشىنشى ايقاستا ۇزاق جىلعى جيناقتاعان بار ونەرىن ايانباي جۇمساۋعا بەكىنگەن جىگىتتىڭ ءوزى مەجەلەگەن تۇعىردان كورىنۋگە كۇش سالۋعا قۇلشىنىسى بايقالادى. ال كوزدەلگەن اسۋ بولسا-بولماسىن بيىك. ەسەنى اعىلشىن جەرى تورىندە قايتارۋ كوپتەن كوكەيىن تەسكەن وي ەكەنىن, بۇدان كەيىن مۇنداي مۇمكىندىك تۋار-تۋماستىعىن جاسىرمايدى. مۇنى جەڭىل اتلەتيكامەن شۇعىلدانۋعا بالا كەزىنەن باۋلىعان اكەسى ۆاسيلي ءبىر جاعىنان قۇلاعىنا قۇيىپ باعۋدا كورىنەدى.
12 جاسىنان جەڭىل اتلەتيكانى سەرىك ەتىپ كەلە جاتقان يرينا كارپوۆانىڭ دا قوساعى دميتري سەكىلدى جوعارى دەڭگەيدەگى جارىستاردا جەڭىستەرى جەتكىلىكتى. وسى كوكتەمدەگى ەل چەمپيوناتىنىڭ «ب» توبىندا وليمپيالىق ءنورماتيۆتى ورىندادى. بۇل سپورتتىڭ بەسسايىس جانە جەتىسايىس تۇرلەرى بويىنشا باسقاسىن ايتپاعاننىڭ وزىندە پاريجدەگى, حەلسينكيدەگى, وساكاداعى الەمدىك بىرىنشىلىكتەر مەن قاتارىنان ءۇش وليمپياداعا قاتىسۋشى جانە ودان ولجاسىز ورالماعان ساڭلاق رەتىندە شەبەرلىگى دە, تاجىربيەسى دە شىڭدالعان. ءساتىن سالسا, لوندوندا قازاقستان تۋىن جوعارى جەلبىرەتۋگە ۇمىتتەنەدى. جانىندا قولداۋشىسى ءارى كەڭەسشىسى سۇيىكتى قوساعى بولۋى قايراتىن قايراپ, جىگەرىن جانيتىندىعىنا سەنەدى. يرينا دا دميتري ماقساتىن الاۋلاتىپ, قازاقستاندىق جەڭىل اتلەتيكانىڭ تاريحىندا وشپەس ءىز تاستاۋعا قۇشتار. اكە-شەشەلەرىنىڭ چەمپيون اتانۋىن اتا-اجەسىنىڭ قولىنداعى قوس بۇلدىرشىندەرى دە كۇتۋدە.
ءبىرى قاراعاندىدا قاناتتانىپ, ءبىرى وسكەمەننەن ءوسىپ, وزدەرى وقىعان جوعارى وقۋ ورىندارىنىڭ, ورتالارىنىڭ ماقتانىشىنا اينالىپ, ومىردە دە, سپورتتا دا تاعدىر توعىستىرعان ەرلى-زايىپتى جەڭىل اتلەتشىلەرگە بارشا قازاقستاندىق جانكۇيەرلەر زور سەنىم ارتادى. دميتري مەن يرينا كارپوۆتاردىڭ باپكەرلەرى شاكىرتتەرىنىڭ ءدۇبىرلى دوداعا تىڭعىلىقتى دايىندىقپەن كەلىپ وتىرعاندىعىن, قانداي دا جەڭىسكە جەتۋگە شەبەرلىكتەرى شىڭدالىپ, ءتاجىريبەلەرى تولىسىپ, تالپىنىستارى تاۋدايلىعىن ايتۋدا. مىڭداعان تىلەۋقورلار سولاي بولۋىن قالايدى. بۇعان دەيىن ايتارلىقتاي اسۋلاردى العان قوس ۇمىتكەر جاڭا بيىكتەرگە جەتۋدە الەمنىڭ تۇكپىر-تۇكپىرىنەن كەلىپ, كۇش سىناساتىن باسەكەلەستەرى وسال ەمەستىگىن بىلەدى. نەسى بار, وليمپيادا دابىلى سوعان شاقىرسا, كارپوۆتار سوندا جارىپ شىعۋعا دايىن.
ايقىن نەسىپباي,
«ەگەمەن قازاقستان».
قاراعاندى.
