جارىستىڭ كورىگى ەندى قىزادى
سارسەنبى, 13 ماۋسىم 2012 7:17
پولشا مەن ۋكراينادا ءوتىپ جاتقان ەۋروپا چەمپيوناتىنىڭ العاشقى اينالىمى دۇيسەنبى كۇنى اياقتالدى.
وسى كۇنى 1 تۋردىڭ سوڭعى ويىندارى كيەۆ پەن دونەتسك قالالارىندا D توبىنداعى فرانتسيا مەن انگليا, ۋكراينا مەن شۆەتسيا قۇرامالارىنىڭ اراسىندا ءوتتى. بۇل ويىنداردا الاڭ يەلەرى شۆەدتەردى 2:1 ەسەبىمەن جەڭسە, العاشقى ويىن 1:1 ەسەبىمەن تەڭ اياقتالدى.
سارسەنبى, 13 ماۋسىم 2012 7:17
پولشا مەن ۋكراينادا ءوتىپ جاتقان ەۋروپا چەمپيوناتىنىڭ العاشقى اينالىمى دۇيسەنبى كۇنى اياقتالدى.
وسى كۇنى 1 تۋردىڭ سوڭعى ويىندارى كيەۆ پەن دونەتسك قالالارىندا D توبىنداعى فرانتسيا مەن انگليا, ۋكراينا مەن شۆەتسيا قۇرامالارىنىڭ اراسىندا ءوتتى. بۇل ويىنداردا الاڭ يەلەرى شۆەدتەردى 2:1 ەسەبىمەن جەڭسە, العاشقى ويىن 1:1 ەسەبىمەن تەڭ اياقتالدى.
جالپى, وسى قۇرامالاردى بۇرىننان ءبىر-بىرىمەن ەجەلگى قارسىلاس بولىپ العان كوماندالار دەي المايمىز. فرانتسيا مەن انگليا وسىعان دەيىن 30 رەت كەزدەسسە, ەۋرو ءتۋرنيرى سياقتى جاۋاپتى سىنداردا كوپ كەزدەسە قويماعان. سول سياقتى ۋكراينا مەن شۆەتسيا قۇرامالارى دا وسى كەزگە دەيىن 3 رەت قانا كەزدەسۋ وتكىزسە, سونىڭ بىرەۋىندە ۋكراينا, ەكىنشىسىندە شۆەدتەر جەڭسە, ءۇشىنشى كەزدەسۋدە قارسىلاستار تەڭ ەسەپپەن تارقاسقان ەكەن. سولاي دەسەك تە وسى ەلدىڭ قۇرامالارى ەۋرو-2012 تۋرنيرىندەگى العاشقى كەزدەسۋلەرىندە ءبىر-ءبىرىن بۇرىننان بىلەتىن كوماندالار سياقتى وينادى. مۇنى اۋەلى, كوماندالاردىڭ قارسىلاستارىن جاقسى زەرتتەپ, ەۋرو ءتۋرنيرى سياقتى جاۋاپتى سىندارعا تىڭعىلىقتى دايىندىقپەن كەلگەندەرىمەن بايلانىستىرۋعا بولادى.
فرانتسيا-انگليا قۇرامالارىنىڭ كەزدەسۋىندە فرانتسيا جاعىنان فرانك ريبەري, سامير ناسري, كاريم بەنزەما, اعىلشىنداردان دجون تەرري, ستيۆەن دجەرارد جاقسى ويىن ورنەگىن كورسەتتى. فرانتسيا قۇراماسىن اۋىز ەكى تىلمەن «ءۇش جولاقتىلار» دەپ اتايدى. وسى «ءۇش جولاقتىلار» ءبىر رەت 1998 جىلى الەم چەمپيونى بولسا, 1984 جانە 2000 جىلدارى ەكى رەت ەۋروپا چەمپيونى اتاعىن جەڭىپ العان كوماندا. كەزىندە جيۋست فونتەن, رايمون كوپا, ميشەل پلاتيني, زينەددين زيدان, تەرري انري, ديدە دەشامپ سىندى جاسىل الاڭدا جاسىنداي جارقىلداعان اياقدوپ شەبەرلەرىنىڭ جولىن قازىر ەۋرو تۋرنيرىندە فرانك ريبەري, كاريم بەنزەما, سامير ناسريلەر جالعاستىرۋدا. ءبىر قىزىعى, وسى ۇشەۋى 2000 جىلى ەۋروپا چەمپيونى بولعان زينەددين زيدان, نيكوليا انەلكا سياقتى يسلام ءدىنىن قابىلداعان ويىنشىلار. فرانتسيا قۇراماسى وسى ءۇش «نوياننىڭ» كومەگىمەن بيىلعى چەمپيوناتتا جۇلدەلى ورىندار ءۇشىن تالاسۋعا بار كۇشىن سالۋدا. ال انگليا قۇراماسى بيىلعى باسەكەگە پرەمەر-ليگادا وينايتىن ءبىراز ويىنشىلارىن اكەلە المادى. مىسالى, فرانك لەمپارد جاراقاتىنا بايلانىستى كەلە الماسا, «چەلسيدىڭ» تاعى ءبىر ويىنشىسى گارري كەيحيلل, «مانچەستەر يۋنايتەدتىڭ» قورعاۋشىسى ريو فەرديناند, دجەك ۋيلشەر جارىسقا قاتىسپايتىن بولدى. سولاي دەسەك تە, ولار دا كەلەسى اينالىمعا شىعىپ, كەزىندە انگليانىڭ اتىن الەمگە شىعارعان چارلتون, مۋر, شيلتون, لينەكەر, ۋوددل سياقتى ويىنشىلاردىڭ جولىن قايتالاۋعا ۇمىتتەنىپ وتىر.
D توبىنداعى ۋكراينا مەن شۆەتسيا قۇرامالارى دا كەلەسى كەزەڭگە وتۋدەن ءۇمىتتى. زلاتان يبراگيموۆيچتىڭ سوققان دوبىنان كەيىن 1:0 ەسەبىمەن جەڭىلىپ جاتقان ۋكراينالىقتاردىڭ قارسىلاستار قاقپاسىنا ەكى بىردەي دوپ سوعاتىنىن ەشكىم ويلاماعان ەدى. بۇل ۋكراينانىڭ سپورت شەجىرەسىندە ءوز الاڭىندا نامىسقا تىرىسىپ, ەڭ جاقسى ويىن كورسەتكەن, مىنەز كورسەتكەن ويىنى بولدى.
كەشە كەشكە ا توبىنداعى كەزەكتى ويىندار ءوتتى. اۋەلى گرەكيا مەن چەحيا قۇرامالارى كەزدەسسە, ودان كەيىن ۆارشاۆانىڭ ۇلتتىق ستاديونىنىڭ الاڭىنا پولشا مەن رەسەي كوماندالارى شىقتى. العاشقى ويىندا 2:1 ەسەبىمەن چەحتار قارسىلاستارىن جەڭدى. ال پولياكتار مەن رەسەيلىكتەر اراسىنداعى كەزدەسۋ استانا ۋاقىتىمەن كەش ءبىتكەندىكتەن, ونىڭ ءناتيجەسىن كەلەسى جولى حابارلاۋدى ءجون كورىپ وتىرمىز.
بۇل كەزدەسۋلەردىڭ تارتىستى وتەتىنى قازىردەن بەلگىلى بولىپ وتىر. رەسەي ا توبىندا 3 ۇپايمەن ءبىرىنشى ورىندا تۇرسا, پولشانىڭ الاڭ يەلەرى رەتىندە قالاي بولسا دا وسى ويىندا جەڭىسكە جەتىپ, كەلەسى اينالىمعا شىعۋعا امال-ارەكەت جاسايتىنى ءسوزسىز. ونىڭ ۇستىنە ەۋرو تۋرنيرى باستالماي جاتىپ, «ورىستار, العا!» دەپ ۇرانداتقان ءبىر توپ رەسەيلىكتەردىڭ پولشا ۇشاقتارىنىڭ ستيۋاردتارىن تەپكىگە العانى بار. وسى سوراقى قىلىق ينتەرنەتتە جاريالانىپ, بۇكىل الەمگە تاراپ كەتتى.
داستان كەنجالين,
«ەگەمەن قازاقستان».
