سارىباي سۇلتان ۇلى قالمىرزاەۆ
سەنبى, 28 شىلدە 2012 7:27
64 جاسقا قاراعان شاعىندا, ءوزىنىڭ ۇزاق جىلعى جەمىستى قىزمەتى ارقىلى ەلىمىزدىڭ الەۋمەتتىك-ەكونوميكالىق دامۋىنا, قازاقستان مەملەكەتىنىڭ قۇرىلۋىنا جانە نىعايۋىنا قوماقتى ۇلەس قوسقان تالانتتى ۇيىمداستىرۋشى جانە باسشى سارىباي سۇلتان ۇلى قالمىرزاەۆ قايتىس بولدى.
سەنبى, 28 شىلدە 2012 7:27
64 جاسقا قاراعان شاعىندا, ءوزىنىڭ ۇزاق جىلعى جەمىستى قىزمەتى ارقىلى ەلىمىزدىڭ الەۋمەتتىك-ەكونوميكالىق دامۋىنا, قازاقستان مەملەكەتىنىڭ قۇرىلۋىنا جانە نىعايۋىنا قوماقتى ۇلەس قوسقان تالانتتى ۇيىمداستىرۋشى جانە باسشى سارىباي سۇلتان ۇلى قالمىرزاەۆ قايتىس بولدى.
س.س.قالمىرزاەۆ 1949 جىلى 10 ماۋسىمدا جامبىل وبلىسىنداعى شۋ اۋدانىنىڭ «جاڭا جول» اۋىلىندا تۋعان. ماسكەۋ ەكونوميكا-ستاتيستيكا ينستيتۋتىن بىتىرگەننەن كەيىن ونىڭ ەڭبەك جولى ەلىمىزدىڭ حالىق شارۋاشىلىعى كەشەنىمەن تىعىز بايلانىستى بولدى. ول ەكونوميستەن قازاق كسر ستاتيستيكا جونىندەگى مەملەكەتتىك كوميتەتى توراعاسىنىڭ ورىنباسارىنا دەيىنگى ەڭبەك جولىنان ءوتىپ, كەيىننەن قازاقستان رەسپۋبليكاسى مەملەكەتتىك م ۇلىكتى باسقارۋ ءجونىندەگى مەملەكەتتىك كوميتەتىنىڭ ءتوراعاسى, جامبىل وبلىسىنىڭ اكىمى, قازاقستان رەسپۋبليكاسى ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ (قارجى پوليتسياسى) توراعاسى بولدى.
ونىڭ قازاقستان رەسپۋبليكاسى پرەزيدەنتى اكىمشىلىگىنىڭ باسشىسى, كەيىننەن مەملەكەت باسشىسىنىڭ ءىس باسقارۋشىسى قىزمەتتەرىن اتقارعان كەزەڭى ايرىقشا جەمىستى بولدى. س.س. قالمىرزاەۆتىڭ باسشىلىعىمەن ەلىمىزدىڭ پرەزيدەنت اكىمشىلىگىن اقمولاعا كوشىرىپ, تولىققاندى قىزمەت جۇرگىزۋگە بەيىمدەۋ قىسقا مەرزىم ءىشىندە قامتاماسىز ەتىلدى. ول جاڭا استانامىزدىڭ قۇرىلىسىن جۇرگىزۋگە, ماڭىزدى اكىمشىلىك جانە الەۋمەتتىك نىساندار سالۋ ىسىنە بەلسەنە اتسالىستى.
مول تاجىريبە, ءبىلىم مەن كاسىبيلىك, تاپسىرىلعان ىسكە زور جاۋاپكەرشىلىك وعان قوعامدا لايىقتى بەدەل اكەلىپ, قۇرمەتكە بولەدى.
س.س.قالمىرزاەۆتىڭ ەڭبەگى جوعارى مەملەكەتتىك ماراپاتتارمەن: «پاراسات», «قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ» وردەندەرىمەن, كوپتەگەن مەدالدارمەن اتاپ ءوتىلدى.
ءوزىنىڭ بارلىق كۇش-جىگەرىن, ءبىلىمى مەن تاجىريبەسىن ەلىمىز بەن حالقىمىزدىڭ يگىلىگىنە جۇمساعان ول قازاقستاننىڭ ناعىز پاتريوتى بولدى.
سارىباي سۇلتان ۇلى قالمىرزاەۆتىڭ جارقىن بەينەسى ءبىزدىڭ جۇرەگىمىزدە ءاردايىم ساقتالادى.
قازاقستان رەسپۋبليكاسىنىڭ ۇكىمەتى
قازاقستان رەسپۋبليكاسىنىڭ پرەزيدەنتى اكىمشىلىگى.
ىسكەر ازامات, تالاپشىل باسشى ەدى
تال بەسىككە تيگەن جاۋىرىننىڭ ءبىر كۇنى جەر بەسىككە دە تيەتىنى بەلگىلى عوي. ءايتسە دە, كۇنى كەشە عانا كوز الدىمىزدا جايراڭداپ ءجۇرگەن جاننىڭ كەنەتتەن باقيلىققا اتتانىپ كەتە بارعانىنا كوڭىل ءشىركىندى ءبىر دەگەننەن سەندىرۋ قيىن-اق. الپىستىڭ اسۋىنان كەشە عانا اسقانداي كورىنەتىن سارىباي سۇلتان ۇلى قالمىرزاەۆتىڭ بەيمەزگىل ورتامىزدان ۇزاپ سالا بەرۋى دە بىزگە سونداي وقىس ءارى جايسىز اسەر ەتىپ وتىر.
مەن سارىباي سۇلتان ۇلىن ول كىسى قازاقستان رەسپۋبليكاسى پرەزيدەنتىنىڭ اكىمشىلىگىن باسقارعان جىلدارى كوبىرەك تانىپ-ءبىلدىم دەسەم بولادى. ءبىر بوساعادا ىنتىماقتاسا ءجۇرىپ جۇمىس ىستەدىك. جۇمىس بابىنداعى ماجىلىستەردە ءجيى باس قوسىپ وتىردىق. ول كىسى جاقسى ۇيىمداستىرۋشى بولۋمەن قاتار, تالاپشىل باسشى دا ەدى. سونىمەن ءبىرگە, ونىڭ بويىنا ءاردايىم ءادىل بولۋعا دەگەن ءبىر ۇمتىلىس پەن قازاقى قايىرىمدىلىق سياقتى جاقسى قاسيەتتەر دە ءتان بولاتىن.
ول پرەزيدەنت اكىمشىلىگىنە استانامىز اقمولاعا اۋىسار تۇستا جانە اۋىسقاننان كەيىنگى العاشقى جىلداردا باسشىلىق جاسادى. ارينە, ول ءوزى وتە قاۋىرت تا قيىن كەزەڭ ەدى عوي. ويتكەنى, جاڭا ەلوردامىزعا پرەزيدەنت اكىمشىلىگىنىڭ قىزمەتكەرلەرىنىڭ سانى جارتىسىنان اسا قىسقارىپ كەلدى. ءبىراق, ارينە, ودان جۇمىس كولەمى كوبەيە ءتۇسپەسە, ازايا قويعان جوق. ەلباسىمىزدىڭ ءوزىنەن باستاپ, قىزمەتكەرلەردىڭ ءبارى دە ۋاقىتپەن ساناسپاي, كۇن-ءتۇن قاتىپ جۇمىس ىستەدى.
مىنە, سول كەزدە سارىباي سۇلتان ۇلىنىڭ ىسكەرلىگى دە, باسقارۋشىلىق تالانتى مەن تالاپشىلدىعى دا ايقىن كورىندى. ول سول سانى جاعىنان شەكتەۋلى ۇجىمنىڭ كۇشىمەن مەملەكەت باسشىسىنىڭ قىزمەتىن كىدىرىسسىز قامتاماسىز ەتە ءبىلدى. ىشكى جانە حالىقارالىق دەڭگەيدەگى ءىس-شارالاردىڭ ءبارى دە كوڭىلدەگىدەي جۇزەگە اسىپ جاتتى.
سارىباي سۇلتان ۇلى جۇمىسقا تالاپتى قاتتى قويۋ ارقىلى اكىمشىلىكتىڭ جۇمىسىن جاقسى ۇيلەستىرىپ قانا قويماي, قىزمەتكەرلەردىڭ تۇرمىستىق جاعدايلارىنا دا سول كەزدىڭ مۇمكىندىگىنىڭ اياسىندا كوپ كوڭىل ءبولىپ وتىراتىنىن كوزىمىز كوردى. الماتىدان كەلگەن قىزمەتكەرلەردىڭ تەز ارادا ءپاتەرلى بولۋىن نازاردا ۇستادى. ءوزى باس بولا ءجۇرىپ, شەتەلدەن كەلىپ جاتقان قانداس باۋىرلارىمىزدىڭ ءبىر بولىگىنىڭ ءوز اتامەكەنىنە تەزىرەك جەرسىنىپ كەتۋىنە قامقور بولا ءبىلدى. وسىنداي ناقتى كومەكتى سەزىنگەندە, الىستان ات ارىتىپ كەلگەن, تۇرمىس جاعدايى تومەن قايسىبىر ورالمان اعايىندارىمىزدىڭ قاتتى قۋانعانىن كوزىمىز كوردى.
ءبىز بىلەتىن سارىباي سۇلتان ۇلى ءوز ءومىرىندە وتە جاۋاپتى قىزمەتتەردى اتقاردى. ءاردايىم ەلباسىمىزدىڭ وزىنە ارتقان سەنىمىن ابىرويمەن اتقارۋعا تىرىستى. كوپ جىلدار بويى قاۋىرت جاعدايدا اتقارىلاتىن جاۋاپتى جۇمىستار, ارينە, ادامنىڭ دەنساۋلىعىنا دا تەرىس اسەر ەتپەي قويمايتىنى بەلگىلى. سىرتتاي قايراتتى دا سىرباز كورىنەتىن سارىباي سۇلتان ۇلىنان ەرتەرەك كوز جازىپ قالۋىمىزدا مۇنىڭ دا ءوز اسەرى بار شىعار.
بىراق ادامنىڭ ءومىرى قانشا جىل جاساۋىمەن ەمەس, قانشا ءىس ءبىتىرۋىمەن, ەلىنە, حالقىنا قانشالىقتى قىزمەت ەتۋىمەن ولشەنەدى دەپ جاتادى عوي. ول ءبىزدىڭ جادىمىزدا ءاردايىم ەلى ءۇشىن ايانباي ەڭبەك ەتكەن بىلىكتى مامان, ىسكەر دە تالاپشىل باسشى, اقجارقىن, قامقور ازامات رەتىندە قالادى دەپ ويلايمىن.
ماحمۇت قاسىمبەكوۆ,
قازاقستان رەسپۋبليكاسى
پرەزيدەنتى كەڭسەسىنىڭ باستىعى.
جاۋاپكەرشىلىكتى جوعارى قويعان جان
سارىباي باۋىرىمدى رەسپۋبليكالىق ستاتيستيكا مەكەمەسىندە ءبولىم باستىعى بولىپ قىزمەت ىستەپ جۇرگەن كەزىندە العاش كورىپ ەدىم. ول كەزدە مەن جامبىل وبلىستىق پارتيا كوميتەتىنىڭ اۋىل شارۋاشىلىعى ءبولىمىنىڭ مەڭگەرۋشىسىمىن. وبلىس باسشىلىعى مەنى رەسپۋبليكالىق ستاتيستيكا كوميتەتىنە بارىپ, وڭىرگە قاتىستى ءبىر ماڭىزدى ماسەلەنى انىقتاپ شەشىپ كەلۋگە جۇمسادى دا سارىباي سۇلتان ۇلى ەكەۋمىز وسى ماسەلەمەن شۇعىلداندىق. سول كەزدە ول ماعان ىسكەر ءارى ۇستامدى جانە جىگەرلى ازامات رەتىندە كورىندى.
ەلىمىز ءوز تاۋەلسىزدىگىنە يە بولعان العاشقى جىلدارى سارىباي رەسپۋبليكالىق م ۇلىكتى باسقارۋ جونىندەگى كوميتەتتە اسا جاۋاپتى جۇمىسپەن شۇعىلداندى. سول كۇردەلى دە قيىن ىستە ول ءوزىن بىلىكتى, جاۋاپكەرشىلىكتى تەرەڭ سەزىنە الاتىن تۇلعا رەتىندە تانىتتى. مىنە, وسىدان كەيىن ەلباسىنىڭ سەنىمىنە يە بولىپ, قىزمەت باسپالداقتارىندا جەدەل كوتەرىلدى. پرەزيدەنت اكىمشىلىگىن باسقاردى. قارجى پوليتسياسىنىڭ باستىعى بولدى. قاي جەردە بولماسىن, ءوزىنىڭ موينىنا العان جۇمىسىنا بارىنشا بەرىلىپ ەڭبەك ەتتى دەپ ايتۋعا بولادى.
مەنىڭ ويىمشا, سارىباي سۇلتان ۇلى ءوز ءومىرىندە كوپ ءىس تىندىرعان, مەملەكەت ءۇشىن ماڭىزدى ماسەلەلەرمەن شۇعىلدانعان ازامات. جامبىل وبلىسىندا اكىم قىزمەتىندە از ۋاقىت قانا جۇمىس ىستەگەنىمەن, ول جەردە دە حالىق ەسىندە قالارلىقتاي كوپتەگەن شارۋالارعا مۇرىندىق بولا ءبىلدى. ودان كەيىنگى قىزمەت اتقارعان جەرلەرىندە دە ءوز سوڭىندا جاقسى ءىز قالدىردى. سول ارقىلى حالقىنىڭ قۇرمەتىنە بولەندى.
وسىنداي تۇلعالى ازاماتتان ايىرىلىپ قالىپ وتىرمىز. مەن ءوزىم ونى ءومىردەن جاستاۋ كەتتى دەپ ەسەپتەيمىن. بۇلاي دەيتىنىم, ول جان-جاقتى تاجىريبە جيناقتاعان قايراتكەرلىك كەمەل شاعىنا ەندى كەلىپ ەدى. وسىعان قاراپ ونىڭ ەلىنە بەرەرى مول بولاتىن شىعار دەپ ويلايتىنمىن. بۇل ءۇمىتتى اياۋسىز اجال كەسىپ كەتتى.
ءبىزدىڭ قازاق حالقى و دۇنيە مەن بۇ دۇنيەنىڭ ايىرماسىن اجىراتا بىلگەن حالىق قوي. پەيىشتىڭ بار ەكەندىگىن, ءجانناتتىڭ بار ەكەندىگىن, جۇماقتىڭ بار ەكەندىگىن تۇسىنگەن, ولاردىڭ ارا-جىگىن اجىراتا ءبىلگەن قازاق سەكىلدى حالىق تىم از. وسىنى ەسكە الا وتىرىپ كونەدەن بىزگە جەتكەن ءداستۇر بويىنشا سارىباي سۇلتان ۇلىنىڭ يمانى سالامات, ارۋاعى رازى, و دۇنيەدە بارعان جەرى جارىق بولسىن دەيمىن.
ومىربەك بايگەلدى.
اسىلىمىز, ارداقتىمىز
مەملەكەت جانە قوعام قايراتكەرى, ەگەمەن ەلىمىزدىڭ قالىپتاسۋى مەن دامۋىنا ەرەكشە ۇلەس قوسقان حالقىمىزدىڭ اسىل ازاماتى سارىباي سۇلتان ۇلى قالمىرزاەۆتىڭ مەزگىلسىز قازاسى تۋرالى حاباردى ەستىگەندە, قابىرعام قايىستى. سۇم اجالعا امال بار ما, اينالاسىنا ىزگىلىك شۋاعىن شاشىپ تۇراتىن اياۋلى اعامىزدان قاپىدا ايىرىلىپ قالدىق.
ول كىسىمەن مەن العاش رەت 80-جىلداردىڭ اياعىندا ءبىلىم مينيسترلىگىندە قىزمەت ەتىپ جۇرگەنىمدە تانىسقان بولاتىنمىن. سول كەزدە اعامىز قازاق كسر مەملەكەتتىك ستاتيستيكا كوميتەتىندە قىزمەت ەتىپ جۇرگەن ەدى. سودان بەرى سارىباي سۇلتان ۇلىمەن كوپ جىلدار جۇمىس بابىمەن جاقسى قارىم-قاتىناستا بولدىق. ۇزاق جىلدار بويى ارالاسىپ جۇرگەنىمدە ول كىسىنىڭ كوپتەگەن قىرلارىن بايقادىم. اسىرەسە, وڭتۇستىك ءوڭىرلەردەگى اكىمدىك قىزمەتتەردە بولعانىمدا, سول وڭىرلەردىڭ ءتۇيتكىلدى ماسەلەلەرىمەن ەتەنە تانىس, ءومىرلىك تاجىريبەسى مول سارىباي سۇلتان ۇلى ماعان اعالىق اقىلىن ايتىپ, دۇرىس جولعا باعىتتاپ, اركەز جانىمنان تابىلاتىن.
ەل تاريحىنداعى اۋىر كەزەڭ – 90-جىلداردا ول جاۋاپتى قىزمەتتەر اتقارىپ, ەكونوميكامىزدىڭ ءوسىپ-وركەندەۋىنە ەلەۋلى ۇلەس قوستى. ءوزىنىڭ تاباندى قاسيەتتەرىمەن ۇنەمى الدا ءجۇردى. ابىرويلى قىزمەتى ءۇشىن تۋعان حالقىنىڭ العىسىنا بولەندى.
2010 جىلى وبلىس ورتالىعى وسكەمەندە العاش رەت اسا ءىرى ساياسي شارا – قازاقستان مەن رەسەيدىڭ ايماقارالىق ىنتىماقتاستىعىنىڭ VII فورۋمى ءوتتى. ساكەڭنىڭ تاجىريبەسى مول عوي, سوندا قوس مەملەكەتتىڭ پرەزيدەنتتەرى قاتىسقان حالىقارالىق فورۋمدى ۇيىمداستىرۋدا كوپ كومەك جاساپ, ءبىزدەرگە جاقسى باعىت-باعدار بەرىپ ەدى. سول ءىس-شارانى ۇيىمداستىرۋ بارىسىندا مەن سارىباي سۇلتان ۇلىن ەڭ سوڭعى رەت كورەتىنىمدى بىلمەپپىن.
سارىباي سۇلتان ۇلى ءوزىنىڭ جارقىن عۇمىرىنىڭ كوپ ۋاقىتىن ەلباسىمەن بىرگە وتكىزدى, ءاردايىم مەملەكەت باسشىسىنىڭ جانىنان تابىلىپ, بارلىق كۇش-قۋاتىن, ءجىگەرىن, ىزدەنىسى مەن ىسكەرلىگىن قازاقستاننىڭ ءوسىپ-وركەندەۋى مەن گۇلدەنۋىنە ارنادى.
زەرەكتىگى, ءوز ىسىنە اسقان جاۋاپكەرشىلىكپەن قارايتىنى, جاڭالىققا قۇمارلىعى ونى ءوز قاتارىنىڭ اراسىندا وزگەشەلەندىرىپ تۇراتىن. جولداستارىنىڭ اراسىندا وتە سىيلى بولدى. كوپشىل, اشىق, باۋىرمال مىنەزى جۇرتتى وزىنە تارتىپ تۇراتىن.
امال قانشا, اجالعا قارسى تۇرا المايمىز…
ورنى تولماس اۋىر قايعىعا ۇشىراپ وتىرعان مارقۇمنىڭ وتباسىنا, تۋىس-تۋعاندارى جانە جورا-جولداستارىنا قايعىرىپ كوڭىل ايتامىن.
بەردىبەك ساپارباەۆ,
شىعىس قازاقستان وبلىسىنىڭ اكىمى.
مەملەكەتشىل
مەملەكەت قايراتكەرى سارىباي سۇلتان ۇلى قالمىرزاەۆ ارامىزدان ماڭگىگە كەتتى دەگەندى ەستىپ, قابىرعام قايىسىپ, قولىما قالام الۋعا تۋرا كەلدى. ويتكەنى, بۇل مەنىڭ عانا ەمەس, ەلدىڭ دە قايعىسى دەپ ءتۇيدىم.
مەن ساكەڭدى 18 جاسىمنان ءبىلەمىن. لەنينگراد مەملەكەتتىك ۋنيۆەرسيتەتىندە وقىپ جۇرگەن كەزىم-ءدى. ءبىر كۇنى نەۆا وزەنىنىڭ بويىندا ءماسكەۋدەن كەلگەن قازاق جىگىتتەرىمەن كەزدەسىپ, تانىستىق. سولاردىڭ ىشىندەگى سارىباي سۇلتان ۇلى وزگەلەردەن ەرەكشەلەنىپ, العىر دا زەرەك ەكەندىگىن بايقاتتى. ادامگەرشىلىك قاسيەتى مول, ءبىلىمدى قازاق جىگىتىنىڭ ماسكەۋدەگى جوعارى ءبىلىم ورداسىنا ءوز كۇشىمەن ءتۇسىپ, ۇزدىك وقيتىنىن ارتىنان ەستىپ بىلدىك.
قازاقستان حالقى اسسامبلەياسىندا قىزمەتتە جۇرگەن كەزىمدە سارىباي سۇلتان ۇلى پرەزيدەنت اكىمشىلىگىنىڭ باسشىسى لاۋازىمىن اتقاردى. مەنىڭ ۇيىمداستىرۋشىلىق قابىلەتىمدى ەسكەرگەن بولۋى كەرەك, ءبىر كۇنى شاقىرتىپ الىپ: «وسى سەن اسسامبلەيانىڭ ستراتەگياسىن ءازىرلەسەڭ قايتەدى», دەگەن ۇسىنىسىن ايتتى. نەگىزگى وي اتالعان قۇجات قازاق حالقىنىڭ ۇلتارالىق تاتۋلىقتى قالىپتاستىرۋداعى قۇرالىنا اينالۋى ءتيىس. ياعني, وزگە دياسپورا وكىلدەرىنە قازاق حالقىنىڭ ءتىلى مەن مادەنيەتىن بىلۋىنە بارىنشا جاعداي جاساۋ. ستراتەگيا بىرىكتىرۋشى دىڭگەك ءرولىن اتقاراتىن بولعاندىقتان قولداۋ تاۋىپ, ارتىنان قابىلداندى دا. تاعى ءبىر ايتقانى, اسسامبلەيانىڭ دەڭگەيىن كەڭەسۋشى-كونسۋلتاتيۆتىك ورگاننان كونستيتۋتسيالىق ورگانعا اينالدىرۋ ارقىلى مەملەكەتتەگى تاتۋلىقتى ساقتاپ قالۋ-تىن.
سارىباي سۇلتان ۇلىنىڭ ەڭ ۇلكەن جاقسى قاسيەتى مەملەكەتشىل ادام بولدى. ءوز حالقىنا دەگەن سۇيىسپەنشىلىگىن ساقتاي ءبىلدى. جاس كەزىنەن قاي قىزمەتتى اتقارماسىن حالىق مۇددەسىن جوعارى قويا ءبىلەتىن. ەلباسىمىزدىڭ ەڭ سەنىمدى ءشاكىرتتەرىنىڭ ءبىرى ارتىنان كەز كەلگەن ءىستى ادال اتقاراتىن جاقسى ءارىپتەسىنە اينالدى.
ءوز باسىم ول كىسىنىڭ ادامي قاسيەتتەرىنە كۋا بولعان جان رەتىندە سوزىنە بەرىك, ىسىنە مىعىم ەكەنىن جاقسى بىلەمىن. جاس مەملەكەتتىك قىزمەتكەرلەردىڭ تاربيەسىنە دە ءوزىندىك ۇلەسىن قوستى. سەن ءمىندەتتى تۇردە سول ءىستى اتقارا الاسىن, وعان سەنىڭ ءبىلىم-قابىلەتىڭ جەتەدى, دەپ ۇنەمى جاس ماماندارعا باعىت-باعدار بەرىپ وتىراتىن. ءتىپتى, جاس مەملەكەتتىك قىزمەتشىلەردى ءوزىنىڭ بالاسىنداي كورىپ تاربيەلەدى دە. مىنە, سونداي ۇستازدىق قابىلەتىنىڭ ارقاسىندا كاسىبي مامانداردى پرەزيدەنت اينالاسىنا توپتاستىرا ءبىلدى. بىرگە ءجۇرگەن ازاماتتاردىڭ باسىندا قانداي قيىن-قىستاۋ كۇن تۋماسىن ۇنەمى جاندارىنان تابىلاتىن. جانە دە ودان شىعۋعا قولۇشىن بەرۋشى ەدى.
اسىل ازاماتىمىز ورازا ايىنىڭ ەڭ قاسيەتتى جۇما كۇنى ءومىردەن وزىپ وتىر. جاس مەملەكەتىمىز تاۋەلسىزدىگىنىڭ قالىپتاسۋىنا ۇلەس قوسقان ەسىل ەردىڭ جاتقان جەرى جايلى, توپىراعى تورقا بولعاي.
جۇماتاي اليەۆ,
پارلامەنت ماجىلىسىنىڭ دەپۋتاتى.
