سالىنباي قالعان سالەم
سارسەنبى, 27 ماۋسىم 2012 6:27
وكىنىشسىز ءومىر بولماس, ءسىرا. جاس تا بولسام وزەگىمدى ورتەگەن ءبىر وكىنىشىمدى كوپشىلىكپەن ءبولىسسەم دەيمىن. مۇمكىن ءوزىم سەكىلدى قاتارلاس قۇربىلارىما ساباق بولار.
وسىدان بىرەر جىل بۇرىن شۋ وڭىرىندەگى قوسپانوۆتار اۋلەتىنە كەلىن بولىپ ءتۇستىم. تابالدىرىقتى وڭ اياقپەن اتتاعان اق بوساعامدى ءار كەز قۇرمەت تۇتامىن. قازاقتىڭ ەجەلگى ءداستۇرى بويىنشا ۇلكەن كىسىلەرگە ءيىلىپ سالەم سالۋدان جاڭىلعان ەمەسپىن. بۇل ءداستۇردى ەسكىلىكتىڭ سارقىنشاعى دەپ ەمەس, جاسى ۇلكەن كىسىلەردى سىيلاپ, ىزەت كورسەتكەندىكتىڭ بەلگىسى دەپ بىلەمىن. ءاربىرىنىڭ «كوپ جاسا, باقىتتى بول, ءۇبىرلى-ءشۇبىرلى بول» دەگەن العىسى كوڭىلىمدى مارقايتىپ, مەرەيىمدى ارتتىرادى.
سارسەنبى, 27 ماۋسىم 2012 6:27
وكىنىشسىز ءومىر بولماس, ءسىرا. جاس تا بولسام وزەگىمدى ورتەگەن ءبىر وكىنىشىمدى كوپشىلىكپەن ءبولىسسەم دەيمىن. مۇمكىن ءوزىم سەكىلدى قاتارلاس قۇربىلارىما ساباق بولار.
وسىدان بىرەر جىل بۇرىن شۋ وڭىرىندەگى قوسپانوۆتار اۋلەتىنە كەلىن بولىپ ءتۇستىم. تابالدىرىقتى وڭ اياقپەن اتتاعان اق بوساعامدى ءار كەز قۇرمەت تۇتامىن. قازاقتىڭ ەجەلگى ءداستۇرى بويىنشا ۇلكەن كىسىلەرگە ءيىلىپ سالەم سالۋدان جاڭىلعان ەمەسپىن. بۇل ءداستۇردى ەسكىلىكتىڭ سارقىنشاعى دەپ ەمەس, جاسى ۇلكەن كىسىلەردى سىيلاپ, ىزەت كورسەتكەندىكتىڭ بەلگىسى دەپ بىلەمىن. ءاربىرىنىڭ «كوپ جاسا, باقىتتى بول, ءۇبىرلى-ءشۇبىرلى بول» دەگەن العىسى كوڭىلىمدى مارقايتىپ, مەرەيىمدى ارتتىرادى.
اكەمىز ءابدىاشىم مەن انامىز توعجاننىڭ قاراشاڭىراعى قوناقتان ارىلعان ەمەس. كىسىلەردىڭ ءبىرى شىعىپ بارا جاتسا, ەكىنشىسى كىرىپ كەلە جاتادى. ءبىر كۇنىمىز قوناقسىز وتپەيدى. ەگەر تاڭەرتەڭگىلىك شايعا ەشكىم كەلمەي قالسا, تۇسكى اسقا اكەمىز كوشەدەن ءوتىپ بارا جاتقان اۋىلداستاردى ءوزى داۋىستاپ شاقىرىپ ەرتىپ كەلەدى.
ءبىر كۇنى ادەتتەگىدەي تۇسكى استى قامداپ جاتقان كەزىم. ۇيگە اكەمىزبەن بىرگە ءبىر توپ كىسى ەرىپ كەلدى. بارلىعىنا دا بويعا سىڭگەن ادەتىم بويىنشا ءيىلىپ سالەم سالىپ جاتىرمىن. ول كىسىلەر العىستارىن ايتىپ, قولدارىن شايىپ تورگى بولمەگە ءوتىپ كەتتى. قوناقتار جايعاسىپ بولدى-اۋ دەگەن كەزدە تاباق تارتپاق بولىپ ۇلكەندەر وتىرعان بولمەگە كىردىم. كىرگەن بەتتە ءتور جاقتا وتىرعان اكەمىزدىڭ اتالاس ءىنىسى بولىپ كەلەتىن ماعاۋيا اعاعا كوزىم ءتۇستى. اڭقىلداعان اقجارقىن, كەڭپەيىل كىسى بولاتىن. «جاڭاعى كىرگەن ءبىر توپ كىسىلەردىڭ ىشىندە جوق سياقتى ەدى… قالاي بايقاماي قالدىم ەكەن؟..» ەندى كوپشىلىكتەن ەرەكشەلەپ قاراتىپ سالەم سالۋعا ىڭعايسىزداندىم. جاس بولعاندىقتان با, بىلمەيمىن, ۇياڭدىعىم جەڭىپ ءۇنسىز قالدىم. ءوزى دە مەنى ۇيالتپايىن دەگەندەي قاسىنداعى كىسىلەرمەن اڭگىمەلەسىپ وتىرا بەردى. ەت جەلىندى, سورپا ءىشىلدى.
سىرتقا بەتتەپ بارا جاتقان كوپشىلىكتىڭ اراسىنان ماعاۋيا اعامىزدىڭ ءوزى ەرەكشەلەپ: «راحمەت, قالقام. اسىڭ ءدامدى بولىپتى » دەپ العىسىن ايتتى. ىشىمنەن سالەم سالماعانىما ودان سايىن وكىنىپ مەن قالدىم… «جارايدى, كەلەسى كەزدەسكەندە ەرەكشە ءيىلىپ تۇرىپ سالەم سالارمىن» دەپ ءوزىمدى ءوزىم جۇباتىپ قويامىن. ارادا بىرەر كۇن ءوتتى-اۋ دەيمىن. «ماعاۋيا اعا قايتىس بولىپتى» دەگەن سۋىت حاباردى كورشىدەن ەسىتتىم. ءوز قۇلاعىما ءوزىم سەنبەدىم.
تويدان شىققان ماعاۋيا اعامىز كولىك اپاتىنان قايتىس بولىپتى. ماشينادا بىرگە بولعان قوس بالاپانى امان. ارتىندا ورىمدەي جاس بالالارى قالدى. اعايىندار وسىعان دا شۇكىرشىلىك ەتىپ جاتتى. ال سول كەزدەگى مەنىڭ جان ءدۇنيەمدەگى الاساپىراندى سوزبەن ايتىپ جەتكىزۋ قيىن. «ۇيگە كەلگەندە نەگە دەر كەزىندە بايقامادىم ەكەن؟ نەگە سالەم سالمادىم ەكەن؟ نەگە ۇياڭدىق تانىتتىم ەكەن؟» دەگەن ساۋالدار كوپكە دەيىن مازالادى. وسىلايشا سالىنباي قالعان سالەم ءۇشىن ءوزىمدى ءوزىم كىنالاپ جۇرگەنىمە ءبىر جىلعا جۋىقتاپتى.
گۇلنۇر ابدىاشىمكەلىنى.
جامبىل وبلىسى, شۋ اۋدانى.
