انا رۋحىنا تاعزىم
دۇيسەنبى, 12 ناۋرىز 2012 7:55
ايالى الاقان, جان جىلىتار ءسوز, ەرتەڭگە ەسىك اشار جول نۇسقاۋشى انا اقىلىنا نە جەتسىن! ءبىزدىڭ انامىز قايتسەم دە ۇل-قىزىمدى ادال ازامات, ەرتەڭگى ەلدىڭ تىرەگى بولاتىن ادام ەتەم دەپ جانتالاسىپ ءجۇرىپ, ءومىرىنىڭ ءدام-تۇزى تاۋسىلعانىن ءوزى دە سەزبەي قالىپتى.
دۇيسەنبى, 12 ناۋرىز 2012 7:55
ايالى الاقان, جان جىلىتار ءسوز, ەرتەڭگە ەسىك اشار جول نۇسقاۋشى انا اقىلىنا نە جەتسىن! ءبىزدىڭ انامىز قايتسەم دە ۇل-قىزىمدى ادال ازامات, ەرتەڭگى ەلدىڭ تىرەگى بولاتىن ادام ەتەم دەپ جانتالاسىپ ءجۇرىپ, ءومىرىنىڭ ءدام-تۇزى تاۋسىلعانىن ءوزى دە سەزبەي قالىپتى.
مىنە, سودان بەرى 10 جىلدىڭ ءجۇزى ءوتتى. انامنىڭ ءجۇزىن كورىپ, اقىلمەن ويلانا وتىرىپ ايتقان ءاربىر ءسوزىن ەندى ەستۋگە زار بولىپ ءجۇرمىز. ونىڭ ورنىن تولتىرار ەشكىم جوق. سول ءبىر قيىن ساتتە جانىمىزدى قويارعا جەر تاپپاي, ەندىگى ءومىرىمىز نە بولماق دەپ وتىرعاندا كوكپەكتىدەگى ق.راەۆ اتىنداعى بالالار ۇيىنە تاپ بولدىق. سودان بەرى قارىنىمىزدى اشتىرماي, كيىمىمىزدى بۇتىندەپ, مەيىرىمدىلىك تانىتىپ, انا ورنىنا انا, اكە ورنىنا اكە بولا بىلگەن بالالار ۇيىندەگى تاربيەشى ۇستازدارىمىزعا ايتار العىسىمىز شەكسىز. مۇندا جانارى جاسقا, جۇرەگى مۇڭعا تولى جەتكىنشەكتى كەلگەننەن-اق جىلى جۇزدەرىمەن قارسى الىپ, ءوز تۋعان بالالارىنداي قابىلداعان اپا-اعالارىمىز سان ۇلتتىڭ بالالارىن تاربيەلەۋدە. ۋاقىت وتە كەلە باسقا سالعان ىسكە كوندىگىپ, كوڭىلىمىز سابىر تاپتى. جانى جايساڭ ادامداردىڭ ءتالىمىنىڭ ارقاسىندا ءبارىمىز ءبىر ءۇيدىڭ بالاسىنداي ءبىر-بىرىمىزگە قامقور بولدىق. سول باۋىرلارىمىزدىڭ ىشىندە اتا-اناسىنىڭ كىم ەكەنىن, قايدا ەكەنىن دە بىلمەيتىندەرى قانشاما؟! بالالارىن بۇل دۇنيەگە اكەلىپ, دالاعا تاستاعان اتا-انالاردى قۇداي ءوزى كەشىرمەس. ەسەيگەلى ءوز ءومىرىمىزدى, بولاشاعىمىزدى ءوزىمىز ويلاۋ كەرەك ەكەندىگىن بىزدەر جاقسى بىلەمىز. سودان دا جەتىمدەر ءۇيىن جاڭادان اشقان بالالاردى كورگەندە جانىمىز اشيدى. ءيا, اتا-اناسى تاعدىردىڭ جازۋىمەن دۇنيەدەن قايتقان بالالاردىڭ باسقا قامقورشىسى بولماسا, امالى جوق, جەتىمدەر ءۇيىن پانالارى ءسوزسىز. ال جەڭىل ويلاپ, ارزان كۇلكى مەن ارام پيعىلدىڭ ناتيجەسىندە دۇنيە ەسىگىن اشىپ, بىراق اكە مەن اناعا قاجەتسىز بولىپ قالعان ءسابيدىڭ تاعدىرىنا جۇرەگىڭ قان جىلايدى. ءبىز ومىردەن وتكەن انامىزدى اڭساپ, ورالمايتىنىن بىلسەك تە ءاربىر تاڭىمىزدى اڭساۋمەن, ساعىنىشپەن اتىرامىز, ال اتا-اناسى ءتىرى, ويىنا كەگەنىن ىستەپ, بالاسىن ەسىنەن شىعارعان انانى ساعىنا كۇتىپ تەرەزەگە تەلمىرگەن بالانى كورگەندە كوزىڭە جاس كەلەدى. تەگىن, ءدىنىن, ءدىلىن ءبىلمەيتىن, انا مەيىرىمىن سەزىنبەگەن بالا ەسەيە كەلە تاعدىرىنا نارازى بولادى. ءتىپتى كەيبىرى سول رەنىشىن اشۋ-ىزاعا اينالدىرىپ, قاتىگەز بوپ وسسە, كىمگە وكپەلەرسىڭ. ءاي, جاس انا ەرتەڭ ءسابيىڭنىڭ ءومىرى جارقىن, بولاشاعى ايقىن بولسىن دەسەڭ بالاڭا شاماڭنىڭ كەلگەنىنشە جىلۋ بەر. بالاڭ ەشكىمگە ءجاۋتەڭدەمەسىن دەسەڭ ءار قادامىڭدى اڭداپ باس دەگىم كەلەدى. بالاڭا سەنەن باسقا جىلۋ بەرەتىن ادام جوق. راس, مەملەكەت ولاردى ءوز قامقورلىعىنا العان.
دەگەنمەن, انانى ەشكىم دە الماستىرا المايدى. قايران انام, سەنى بالالارىڭ ساعىنا ەسكە الادى, قايتەيىك, امال نەشىك. سەن دۇنيەدەن وتكەندە 5 ايلىق بولىپ شىرىلداپ جاتقان باقتيزاڭ ءبۇگىندە ەلگە تانىلىپ, ءبىلىمدى, اقىلدى قىز بولىپ ءوسىپ كەلەدى. ايتسە دە, ءبىز ءوزىمىزدى باقىتتى سەزىنە المايمىز. ءيا, ءبىز باقىتتى بولۋ ءۇشىن سەن جانىمىزدا بولۋىڭ كەرەك. ءبىزگە تەك سەنىڭ جىلۋىڭ جەتپەيدى, بالالارىڭ قانشا قۋانسا دا ارعى جاعىندا ءبىر مۇڭ ۇيالاپ تۇرادى, ول مۇڭ ءومىر باقي جازىلمايدى. ەندىگى اللادان سۇرارىم, باۋىرلارىما اماندىق, دەندەرىنە ساۋلىق بەرە گور دەپ تىلەيمىن. ماعان ولاردىڭ اماندىعىنان باسقا ەش نارسەنىڭ قاجەتى جوق.
ايگۇل زاكەنوۆا.
