الما مەدەتقىزى باسقارىپ وتىرعان پەداگوگيكالىق ۇجىم 2007 جىلدان بەرى ءۇش ءتىلدى ءبىلىم بەرۋ باعىتىندا دارىندى بالالارعا ارنالعان مەكتەپ رەتىندە ناتيجەلى جۇمىس جاساۋدا. ءبىلىم بەرۋ سالاسىندا نازارباەۆ زياتكەرلىك مەكتەپتەرى مەن كەمبريدج ۋنيۆەرسيتەتىمەن بىرلەسە جۇمىس ىستەۋدە. مۇعالىمدەردىڭ كاسىبي قوعامداستىعى اياسىندا ءوز تاجىريبەلەرىن رەسپۋبليكا كولەمىندە فورۋمدار مەن سەمينارلار ارقىلى شەبەرلىك ساباقتار ۇلگىسىندە وتكىزۋدە.
مەكتەپ ۇجىمىنىڭ ءىس - تاجىريبەلەرى وسىعان دەيىن وتكىزىلگەن «كوپتىلدىلىك-الەمدىك ءبىلىم كەڭىستىگىنە ينتەگراتسيالانۋدىڭ نەگىزگى شارتى» تاقىرىبىنداعى رەسپۋبليكالىق عىلىمي - ادىستەمەلىك سەمينار ارقىلى تاراتىلدى. سوڭعى 5 جىلدا مەكتەپتە 60-تان اسا ادىستەمەلىك ازىرلەمەلەر دايىندالىپ, 24 مۇعالىم پەداگوگيكالىق يدەيالار فەستيۆالىنىڭ وبلىستىق, رەسپۋبليكالىق دەڭگەيىندە لاۋرەات اتانىپ, 35 مۇعالىمنىڭ اۆتورلىق جوبالارى ۇزدىك دەپ تانىلدى. 56 - وقۋشى حالىقارالىق عىلىمي جوبالار كونكۋرسىندا, وبلىستىق دەڭگەيدە – 62 وقۋشى, رەسپۋبليكالىق دەڭگەيدە -34 وقۋشى جۇلدەگەر اتانىپ, الەمنىڭ 11 مەملەكەتىندە بولىپ, حالىقارالىق دەڭگەيدە عىلىمي جوبالارىن قورعاعان.
مەكتەپتىڭ «رۋحاني جاڭعىرۋ» كابينەتىندە ۇستازدارمەن جىلى جۇزدەسكەن كۇلاش ءشامشيدينوۆا بىلاي دەدى:
-ءبىلىم جانە عىلىم مينيسترلىگى ءوز تاراپىنان حيميا, فيزيكا, بيولوگيا, ينفورماتيكا پاندەرىن اعىلشىن تىلىندە وقىتاتىن ۇستازداردى دايىنداۋعا باستى نازار اۋدارىپ وتىر. ۇستازدارىمىزدى ءۇش تىلدە وقىتۋعا دايىندايمىز. ال مەكتەپ تە سوعان ساي دايىن بولۋى كەرەك قوي. مىنە, وسى تۇستا مەن شاكارىم اتىنداعى گيمنازيادان ۇلگى الىڭدار دەر ەدىم. بۇل مەكتەپ تاۋەلسىزدىك العاننان بەرى ءۇش تىلدە وقىتۋعا بەيىمدەلگەن. باسقا مەكتەپتەر دە ءۇش تىلدە وقىتۋعا دايىن بولۋلارى كەرەك. دەگەنمەن وقىتۋ بارىسىندا قاي ءتىلدى باسىمدىقپەن تاڭداپ الامىز دەيدى, ونى وقۋشىلار, اتا-انالار مەن مەكتەپ ۇجىمى ءوزى شەشەدى. ءبىز رەسپۋبليكاداعى مۇعالىمدەردىڭ «پەداگوگ» ستاتۋسىن كوتەرىپ, ەڭبەكاقىسىن ۋاقتىلى العاندى, تومەن جالاقى الاتىن مۇعالىم, كىتاپحاناشىلاردىڭ ەڭبەكاقىسىنا زاڭ اياسىندا ءتيىستى قوسىمشا تولەنۋلەرىنە مۇمكىندىك جاسايمىز.
مينيستر كۇلاش ءشامشيدينوۆا سەمەيدە سونداي-اق №49 مەكتەپتە جانە بىرقاتار ءبىلىم مەكەمەلەرىندە بولدى.
راۋشان نۇعمانبەكوۆا
«ەgemen Qazaqstan»
سەمەي
