ماسكەۋلىك اسقاق ونەردى باعالاۋشىلار «استانا وپەرا» ترۋپپاسىنا ىستىق ىقىلاستارىن ءبىلدىرىپ, شىنايى ءىلتيپاتتارىن كورسەتتى. لىق تولى زال تىك تۇرا ارتىستەرگە توقتاماستان قول سوعىپ, ولاردىڭ ءاربىر كورسەتكەن تاعزىمدارىنا «براۆو!» دەپ ءۇن قاتتى.
قويىلىمنان كەيىن اتاقتى يمپرەساريو روبەرتو دجوۆاناردي ءوز اسەرىمەن ءبولىستى.
- ءبىر سوزبەن ايتقاندا, عاجايىپ ترۋپپا, ا.اسىلمۇراتوۆا كەرەمەت جۇمىس اتقارعان. ارتىستەر تىپتەن تاماشا, قويىلىم وتە جوعارى دەڭگەيدە جاسالعان. ولاردىڭ يتالياداعى ونەر كورسەتۋلەرىنە قۋانا-قۋانا باردىق. يتالياندىقتار قازاقستاندىق ترۋپپانى جاقسى بىلەدى, ولاردىڭ بىزدەگى گاسترولى كەزىندە, ءبارى مىندەتتى تۇردە سىزدەردىڭ ارتىستەرىڭىزدى كورۋگە اسىعادى, جەتەكشى سوليست باقتيار ادامجاندى تانيدى. جاقىندا ول ريمدە ونەر كورسەتتى. وسى قىستا ترۋپپانىڭ ورىنداۋىندا پ.چايكوۆسكيدىڭ «ششەلكۋنچيك», «اققۋ كولى» بالەتتەرىن تاماشالادىق. ولاردىڭ جاڭا قويىلىمىنا كەلۋ – ۇلكەن قۋانىش, ونەر كورسەتۋلەرى ايرىقشا بولدى!
گالا-كەشكە ايگىلى بالەت جانە تەاتر سىنشىلارى دا كەلدى.
«مۋزىكالنايا جيزن» جۋرنالىنىڭ اتاقتى ءارى قۇرمەتتى تەاتر سىنشىسى الەكساندر فيرەر «استانا وپەرا» تەاترىنىڭ ترۋپپاسى كەرەمەت كۇيدە ەكەنىن اتاپ ءوتتى.
- «شەحەرازادا» بالەتى كەرەمەت جەتكىزىلگەن, سوليستەرى وتە تاماشا. اسىرەسە, الەمدىك دەڭگەيدەگى پرەمەر باقتيار ادامجان مەن جاس ءارتىس اناستاسيا زاكلينسكايا – وتە سۇيكىمدى قىز, ول تارتىمدى, البىرت, مۋزىكاعا قابىلەتتى, يكەمدى. تاماشا سپەكتاكل, ترۋپپا ونى وتە جاقسى ورىندادى. ولاردىڭ بۇگىنگى جاساعانى, قالاي بيلەگەنى, بارلىعى شىن مانىندە عاجاپ بولدى. ءبارى جاقسى دايىندالعان. كوركەمدىك جەتەكشىسى التىناي اسىلمۇراتوۆا وراسان زور جۇمىس اتقارعان. ارينە, وسى بالەتتىڭ قويۋشى بالەتمەيستەرى اندريس ليەپا دا قاجىرلى ەڭبەك ەتكەن. سىزدەردى وسى ساحناداعى ونەر كورسەتۋلەرىڭىزبەن قۇتتىقتاۋعا بولادى.
الەمدەگى ەڭ كوپ – ءۇش جارىم ميلليون تارالىمى بار «موسكوۆسكي كومسومولەتس» گازەتىنىڭ تەاتر سالاسىنداعى سىنشىسى پاۆەل ياششەنكو دا «استانا وپەرا» ونەرىنە ەڭ جوعارى باعا بەردى.
- تاڭعالدىراتىن اسەر. ءبارىمىز التىناي اسىلمۇراتوۆانى بىلەمىز – ول الەمدىك بالەتتىڭ اڭىزى. مەن شولۋشى رەتىندە الەمدە نە بولىپ جاتقانىن, اتاپ ايتقاندا, قازاق بالەتىنىڭ جاي-كۇيىن باقىلاپ وتىرامىن. التىناي اسىلمۇراتوۆانىڭ ارقاسىندا «استانا وپەرا» جەتەكشى تەاترلار قاتارىنا قادام باسىپ كەلە جاتقانىن بايقايمىن. ءبىزدىڭ بۇگىنگى كورگەنىمىز – شىن مانىندە تاڭعاجايىپ جاسالعان.
بەس حالىقارالىق بالەت بايقاۋىنىڭ لاۋرەاتى ءارى كەلۆين كوۋ ستيپەندياسىنىڭ يەگەرى دجۋليان ماككەي, سونداي-اق, ۆەنگريا ۇلتتىق وپەرا تەاترىنىڭ پريماسى تاتيانا مەلنيك جانە گالا-باعدارلامانىڭ باسقا دا قاتىسۋشىلارى كاسىبي پىكىرلەرىن بىلدىرگەن, ولاردىڭ ويلارى ءبىر ارناعا تولىسقان – «استانا وپەرا» ترۋپپاسىنىڭ كەلەشەگى جارقىن, ارتىستەردىڭ ارقايسىسىنىڭ ۇلكەن دارىنى بار, ولاردىڭ اسقاق ونەردىڭ شىڭىنا قول جەتكىزەرى ءسوزسىز.
- باقتيار ادامجاننىڭ شەبەرلىگىنە تامسانا قارايمىن. العاش رەت ەكەۋمىز ريمدە جولىقتىق, مەنىڭشە, ول سىنشىلاردىڭ پىكىرىن قاجەت ەتپەيتىن دەڭگەيگە يە. «استانا وپەرا» تەاترى تۋرالى كوپ ەستىدىم, فوتوسۋرەتتەردەن كورىپ, زالدارىنىڭ اسەمدىگىنە ءتانتى بولدىم, – دەپ اتاپ ءوتتى دجۋليان ماككەي.
قازاقستاننىڭ تۇڭعىش پرەزيدەنتى, ەلباسى نۇرسۇلتان نازارباەۆتىڭ باستاماسىمەن سالىنعان «استانا وپەرا» تەاترى شىعارماشىلىق ۇجىمدارعا جوعارى دەڭگەيدەگى كوركەمدىك جوبالاردى جۇزەگە اسىرۋىنا مۇمكىندىك بەرۋدە, بۇعان بالەت ترۋپپاسىنىڭ كرەمل سارايىنداعى وراسان زور جەتىستىگى دالەل بولا الادى.
تەاتردىڭ جەتەكشى ءسوليسى, قازاقستاننىڭ ەڭبەك سىڭىرگەن قايراتكەرى, قازاق بالەتىنىڭ جۇلدىزى باقتيار ادامجان سىنشىلار مەن ارىپتەستەرىنىڭ عانا ەمەس, سونداي-اق كورەرمەندەردىڭ دە ەرەكشە ىقىلاسىن تۋعىزدى. ءبيشىنىڭ بيىك سامعاۋلارى, شىعىس پلاستيكاسى, ەرەكشە دارىندىلىعى مەن ينتەللەكتۋالدىق مۇلتكىسىز پانتوميمالىق قوزعالىستارى بالەت سىنشىلارىنىڭ جۇرەگىن جاۋلاپ الدى. ب.ادامجان پارتيانى اكتەرلىك تۇرعىدان كەرەمەت مەڭگەرگەنىن كورسەتە وتىرىپ, رولگە كەرەمەت توسەلدى, ونەرپازدى الەمدىك دەڭگەيدەگى ءارتىس دەپ كۇمانسىز ايتۋعا بولادى.
ونىڭ ساحناداعى سەرىگى – «استانا وپەرانىڭ» جاس ءارى ءبىتىم-بولمىسى كەلىسكەن ءسوليسى اناستاسيا زاكلينسكايا زوبەيدانىڭ پارتياسىن سومدادى. سەزىمتال, سىمباتتى, جەپ-جەڭىل ارۋدىڭ ساحناداعى قيمىلى كوركەم ەدى. ءارتىس ءوز كەيىپكەرىنىڭ كوڭىل-كۇيىن عانا ەمەس, سونىمەن بىرگە ءبىرتۇتاس بەينە قالىپتاستىرىپ, وسى ءرولدىڭ تەرەڭ پسيحولوگيزمى مەن ءدراماتيزمىن جەتكىزە ءبىلدى.
شاحريار مەن شاحەزمان بەينەلەرىن سۇڭعاق, ەڭسەلى ونەرپازدار جانىبەك يمانقۇلوۆ پەن يلدار شاكيرزيانوۆ ۇسىندى, ىم-يشارالارىنىڭ نانىمدى شىققانى سونشا, زال ولاردىڭ ەموتسياسىن ءاپ-ساتتە اڭعارىپ وتىردى. باس بەلسىزدىڭ رولىندە كەرەمەت ءبيشى ولجاس ماحانبەتاليەۆ ونەر كورسەتتى. كۇڭدەر – ادەلينا تولەپوۆا, ەركەجان ءجۇنىسوۆا, ايمان تاجىباەۆا, بەلسىزدەر – رۋسلان تەمىربەكوۆ, ولجاس انۋاربەك.
«استانا وپەرانىڭ» گاسترولدىك ساپارى اتالمىش سپەكتاكلدىڭ قويۋشى بالەتمەيستەرى, م.ليەپا اتىنداعى قايىرىمدىلىق قوردىڭ نەگىزىن قالاۋشى – رەسەيدىڭ حالىق ءارتىسى اندريس ليەپانىڭ شاقىرتۋى بويىنشا وتكەندىگىن اتاپ وتكەن ءجون. ايتا كەتەيىك, اندريس ماريسوۆيچ كەشتىڭ جۇرگىزۋشىسى ءارى رەجيسسەرى بولدى.
اندريس ليەپانىڭ «اۆتوگرافى ي يميدجي» جوباسى اياسىندا وتكەن «ۆاتسلاۆ نيجينسكي. بوگ تانتسا» گالا-كونتسەرتىنىڭ ءبىرىنشى بولىمىندە الەمدىك بالەت جۇلدىزدارى ونەر كورسەتتى. ولاردىڭ قاتارىندا: «كوۆەنت-گاردەن» كورولدىك تەاترىنىڭ پرەمەرى ۆاديم مۋنتاگيروۆ جانە داريا كليمەنتوۆا, يۋليا ماحالينا (مارين تەاترى), تاتيانا مەلنيك (ۆەنگريا مەملەكەتتىك وپەرا تەاترى), ەلەونورا سەۆەنارد (رەسەيدىڭ ۇلكەن تەاترى), برۋكلين ماك (ۆاشينگتون بالەتى), كساندەر پاريش (مارين تەاترى), دەنيس رودكين (رەسەيدىڭ ۇلكەن تەاترى) ت.ب. بار. ارتىستەر «قاسيەتتى كوكتەم», «پەترۋشكا», «ۇيقىداعى ارۋ», «جيزەل», «تاليسمان» بالەتتەرىنەن ءۇزىندى قويدى. ەكىنشى ءبولىم ءوز ونەرىمەن ماسكەۋلىك كورەرمەندى ءتانتى ەتكەن قازاقستاندىق ترۋپپاعا بەرىلدى.
