ونىڭ ايتۋىنشا, اوك-ءتى تسيفرلاندىرۋ شارالارىنىڭ اياسىندا ەلىمىزدە 20-دان استام تسيفرلاندىرىلعان فەرما, 4 مىڭنان استام وزىق دامىعان فەرما پايدا بولادى. اۋىل شارۋاشىلىعى مينيسترلىگى تسيفرلى فەرما, دامىعان فەرما جانە بازالىق فەرما دەگەن ءۇش ءتۇرلى دەڭگەيدى قاراستىرىپ وتىر. وسى ءۇش دەڭگەيدەگى فەرمالاردىڭ ارقايسىسىنا ءتان ارتىقشىلىقتارى بولادى. وبلىس اكىمدىكتەرىمەن بىرلەسىپ جۇرگىزىلگەن ساراپتاما ناتيجەسى بويىنشا, قازىرگى تاڭدا قازاقستاندا 114 دامىعان فەرما مەن 10 تسيفرلى فەرما بار.
– بۇل – جاقسى باستاما. دەگەنمەن, اكىمدىكتەر شارۋاشىلىقتاردىڭ تسيفرلى دامۋىنا مەملەكەتتىك شارالار ارقىلى ودان ءارى قولداۋ كورسەتۋگە ءتيىس, – دەدى ك.ابدۋللاەۆ.
وسى جيىندا ايتىلعانداي, سۋارمالى ەگىن القاپتارىن ۇلعايتۋعا دا مينيسترلىك تاراپىنان ەرەكشە ماڭىز بەرىلىپ وتىر. بۇگىنگى تاڭدا رەسپۋبليكا بويىنشا سۋارمالى القاپتاردىڭ جالپى اۋماعى – 1,4 ميلليون گەكتار, ياعني بارلىق ەگىن القابىنىڭ 7 پايىزى شاماسىندا. الداعى ۋاقىتتا ونى 3,5 ميلليون گەكتارعا جەتكىزۋ كەرەك. ك.ابدۋللاەۆتىڭ ايتۋىنشا, قازاقستاندىق فەرمەرلەردىڭ وسى سۋارمالى جەرلەردەن الاتىن ءونىمىنىڭ كولەمى شەتەلدىك فەرمەرلەردىڭ ءونىمىنەن 2,4 ەسە از كورىنەدى. دەگەنمەن, ءتيىستى ينجەنەرلىك جۇمىستار ءجۇرگىزىلىپ, زاماناۋي تەحنولوگيالار ەنگىزىلگەننەن كەيىن وتاندىق فەرمەرلەر دە يزرايلدەگى شارۋالار سياقتى مول ءونىم الاتىن بولادى.
