ۇزاق جىلدار پروكۋراتۋرا سالاسىندا جەمىستى قىزمەت ىستەگەن كورنەكتى زاڭگەر عالىم ءباجىم ۇلى ەلەمەسوۆ ەلىمىزدىڭ قۇقىق قورعاۋ, زاڭ سالاسىن نىعايتۋ ىسىنە سۇبەلى ۇلەس قوسقان تۇلعالاردىڭ ءبىرى دەۋگە بولادى. اسىرەسە رەسپۋبليكانىڭ قۇقىق قورعاۋ ورگاندارى جۇمىسىن جەتىلدىرۋگە, زاڭدىلىقتى نىعايتۋعا زور ەڭبەك ءسىڭىردى. ءوزىنىڭ شەبەر ۇيىمداستىرۋشى ەكەنىن دە كورسەتە ءبىلدى.
ع.ەلەمەسوۆ وتىز جىلدان استام ءومىرىندە ءبىلىمىن قۇقىق قورعاۋ ورگاندارىنا, سونىڭ ىشىندە 15 جىلدان استامىن كوكشەتاۋ وبلىسىنا ارنادى. ول وبلىستىق پروكۋراتۋرانىڭ ءبولىم پروكۋرورىنان كسرو جوعارعى سوتىنىڭ مۇشەسى, قازاق كسر جوعارعى سوتىنىڭ توراعاسى, قازاق كسر باس پروكۋرورىنا دەيىن كاسىبي مانساپتىڭ بارلىق ساتىسىنان ابىرويمەن ءوتتى.
ءوزىنىڭ قاعيداتتىلىعىمەن, جوعارى بورىش سەزىمىمەن جانە جاۋاپكەرشىلىكپەن, ەڭبەكقورلىعىمەن ءجانە كاسىبيلىگىمەن ع.ب.ەلەمەسوۆ قىزمەتتەگى ارىپتەستەرىنىڭ, رەسپۋبليكا ازاماتتارىنىڭ اراسىندا شىن قۇرمەت پەن بەدەلگە يە بولدى.
ونىڭ باسشىلىق ەتۋىمەن رەسپۋبليكانىڭ پروكۋراتۋرا ورگاندارى الدىندا تۇرعان مىندەتتەردى تاباندى جانە قاعيداتتى شەشىپ, پروكۋرورلىق قاداعالاۋدى ودان ءارى جەتىلدىرۋ, زاڭدىلىق پەن ازاماتتاردىڭ قۇقىقتارىن قورعاۋدى قامتاماسىز ەتۋ بويىنشا اۋقىمدى جانە ءتيىمدى جۇمىس اتقاردى.
ع.ەلەمەسوۆتىڭ اتىنا جازىلعان العىس حاتتار بۇعان كۋا. ولاردا ع.ەلەمەسوۆ رەسپۋبليكا پروكۋراتۋراسىنا باسشىلىق ەتكەن كەزەڭدە قۇقىق قورعاۋ ورگاندارىنىڭ ءوزارا تۇسىنۋشىلىكتىڭ جانە ىسكەرلىك بايلانىستىڭ قۇرىلعانى ايتىلدى.
عالىم باجىم ۇلىمەن بىرگە جۇمىس جاساعان ازاماتتار, ەر جۇرەك, قايىرىمدى, ەڭبەكقور, ادامگەرشىلىگى زور ەرەكشە ازامات رەتىندە بىلەتىندەرىن ايتىپ, ەستەرىنە الادى.
ع.ەلەمەسوۆ پروكۋراتۋراداعى قاربالاس جۇمىستى دا ىستەي ءجۇرىپ, عىلىمي ەڭبەكپەن دە جان-جاقتى اينالىستى. زاڭ عىلىمىنا زور ۇلەس قوسىپ, وسى باعىتتا كوپتەگەن كوكەيكەستى ماقالالار جاريالادى. قۇقىق تاقىرىبىنا ەكى مونوگرافيا جازىپ, جارىققا شىعاردى. 1974 جىلى ماسكەۋدە كريمينولوگيا جانە قىلمىستىق قۇقىق ماماندىعى بويىنشا كانديداتتىق ديسسەرتاتسيا قورعادى.
ع.ەلەمەسوۆ 1-سىنىپتى مەملەكەتتىك ادىلەت كەڭەسشىسى سىنىپتىق شەنىنىڭ, «پروكۋراتۋرانىڭ قۇرمەتتى قىزمەتكەرى» ءتوس بەلگىسىنىڭ جانە «قازاق كرس-ءنىڭ ەڭبەك سىڭىرگەن زاڭگەرى» اتاعىنىڭ يەگەرى.
سونىمەن قاتار, «حالىقتار دوستىعى» وردەنىمەن جانە باسقا دا كوپتەگەن مەدالدارمەن ماراپاتتالعان.
زاڭ عىلىمدارىنىڭ كانديداتى, عالىم ع.ب.ەلەمەسوۆ قازاق كسر جوعارعى كەڭەسىنىڭ ح-ءحى شاقىرىلىم دەپۋتاتى, قازاقستان كومپارتياسى ورتالىق كوميتەتىنىڭ مۇشەسى بولىپ سايلانعان.
كوكشەتاۋ قالاسىنىڭ ءبىر كوشەسى ع.ەلەمەسوۆتىڭ قۇرمەتىنە اتالعان, وبلىس پروكۋراتۋراسىندا ونىڭ مۋزەيى جۇمىس ىستەيدى.
عالىم ەلەمەسوۆ جۇبايى ەكەۋى ءبىر ۇل, ءۇش قىزدى تاربيەلەپ ءوسىردى.
«جاقسىنىڭ اتى وشپەيدى» دەيدى دانا حالقىمىز. اتى اڭىزعا اينالعان, ارداقتى اعامىز ع.ب.ەلەمەسوۆتىڭ ەسىمى ءارقاشان ايتىلىپ, ءومىر جولى بىزگە, ۇرپاقتارىنا, پروكۋراتۋرا ورگاندارىنىڭ جاس ماماندارىنا ۇلگى-ونەگە بولىپ قالا بەرمەك.
تيمۋر تاشىمباەۆ,
اقمولا وبلىسىنىڭ پروكۋرورى
