جوعارى ءبىلىمدى دارىگەرلەر مەن ورتا ءبىلىمدى مەديتسينا قىزمەتكەرلەرىن قوسقاندا, بارلىعى مىڭ قارالى مەديتسينا مامانى قاجەت. اۋىلدىق ەلدى مەكەندەردە 100 دارىگەرگە, ورتا مەديتسينا ماماندارىنان اكۋشەركا مەن فەلدشەرلەرگە زارۋلىك باسىم.
وبلىستىق دەنساۋلىق ساقتاۋ باسقارماسىنىڭ باسشىسى ۆياچەسلاۆ دۋدنيك ارقالىق, جىتىقارا قالالارى مەن ناۋرىزىم, قارابالىق اۋداندارىندا اكۋشەر-گينەكولوگ, التىنسارين, قامىستى, ناۋىرزىم, تاران, قاراسۋ اۋداندارىندا رەانيماتولوگ دارىگەردىڭ جوق ەكەنىن ايتتى.
«ماماندارمەن قامتاماسىز ەتۋدە ءبىرشاما جۇمىستار دا جۇرگىزىلىپ كەلەدى. مىسالى وتكەن جىلى ماماندارعا ءبىر رەت بەرىلەتىن جاردەماقى مەن باسپانا الۋ جانە پاتەر جالداۋعا 56 ميلليون تەڭگە جۇمسالدى. 2018 جىلى جەرگىلىكتى بيۋدجەتتەن 400 ميلليون تەڭگە قارجى ءبولىپ, ەلىمىزدەگى جەتەكشى مەدينا جوعارى وقۋ ورىندارىندا 100 دارىگەر دايىنداۋ جۇمىسى باستالدى» دەدى ۆياچەسلاۆ يۋرەۆيچ.
وبلىس اكىمدىگى بيىلدان باستاپ وبلىسقا كەلگەن مەديتسينا ماماندارىنا ارناپ ءبىرىنشى رەت تۇرعىن ءۇي سالۋدى جوسپارلاپ وتىر. القا وتىرىسىنا قاتىسقان وبلىس اكىمى ارحيمەد مۇحامبەتوۆ مەديتسينا ماماندارىن جاردەماقى مەن باسپانامەن قامتاماسىز ەتۋدى قايتا قاراۋ كەرەكتىگىن ايتتى.
«وسى باعدارلاما باستاۋ العان 2008-2009 جىلدارى ءار مامان جاردەماقىعا 170-180 مىڭ تەڭگە الاتىن. ول ۋاقىتتاعى ولشەممەن بۇل ولارعا اجەپتاۋىر كومەك بولاتىن, ال قازىر ولاي ەمەس, كومەك, جاردەماقى ءۇشىن بۇل ازدىق ەتەدى. ال باسپانانى ساتىپ الۋ وزەكتىلىگىن جويعان جوق, 1,5 مىڭ ايلىق كورسەتكىش, اۋىلدى جەرلەردە 3 ميلليون تەڭگەگە جاقسى ءۇي ساتىپ الۋعا بولادى. سوندىقتان قالاعا كەلەتىن ماماندارعا بيىل ءبىر رەت كورسەتىلەتىن جاردەماقى ءۇشىن 100 ميلليون تەڭگە, ال اۋىلعا باراتىن ماماندار ءۇشىن 134 ميلليون تەڭگە بولىنەدى» دەدى ارحيمەد بەگەجان ۇلى.
شامالاپ ايتقاندا 134 ميلليون تەڭگە اۋىلدىق جەرلەرگە باراتىن 100 مامانعا ماتەريالدىق كومەك كورسەتۋگە, 100 ميلليون تەڭگە قالاعا كەلەتىن 70 مامانعا جاردەماقى بەرۋگە جەتىپ قالاتىنىن ايتىلدى.
قوستاناي
