بالا تۋ كورسەتكىشى 1000 تۇرعىنعا شاققاندا سوڭعى بەس جىلدا تۇراقتى تومەندەپ وتىرعان. مىسالى, وتكەن جىلدىڭ وزىندە 1000 ادامعا شاققاندا 13,2 بالادان كەلگەن, (جىل بويى 11500 نارەستە دۇنيەگە كەلگەن), بۇل كورسەتكىش رەسپۋبليكا بويىنشا 21,7 قۇرايدى. ۇستىمىزدەگى جىلدىڭ ءبىرىنشى توقسانىندا وبلىس كورسەتكىشى 3,23 بولدى.
وبلىستا 222 مىڭ بالا كوتەرەتىن جاستاعى ايەل بار. پەرزەنتحانالاردا 420 توسەك بار, سونىڭ 203 توسەگى انا مەن نارەستەگە ارنالعان جانە گينەكولوگيالىق توسەكتەر. جىلدىڭ ءبىرىنشى توقسانىندا جانگەلدين اۋدانىندا ءبىر انا ءولىمى ورىن الدى. قازىر ءتيىستى ورىنداردىڭ وسى وقيعا بويىنشا تەكسەرۋى ءجۇرىپ جاتىر. القا وتىرىسىندا توقسان قورىتىندىسىن بايانداعان وبلىستىق قوعامدىق دەنساۋلىق ساقتاۋ دەپارتامەنتىنىڭ باسشىسى ورال بەكماعامبەتوۆ بۇل وقيعانىڭ الدىن الۋعا بولاتىندىعىن جاسىرمادى. وبلىس اكىمى ارحيمەد مۇحامبەتوۆ جانگەلدين اۋداندىق اۋرۋحاناسىنىڭ باس دارىگەرى قۋات الماعامبەتوۆكە قاتاڭ ەسكەرتۋ جاسادى, ەگەر قايتالانسا, جۇمىستان بوساتۋعا دەيىن باراتىنىن ايتتى. ءوڭىر باسشىسى اينالدىرعان 12 مىڭ تۇرعىنى بار اۋداندا اياعى اۋىر ايەلدەردىڭ كۇتىمىن, تەكسەرىلۋىن ۋاقىتىلى قاداعالاۋ كەرەكتىگىن, انا مەن بالا دەنساۋلىعىنا سالعىرتتىق كەشىرىلمەيتىنىن دە ەسكە سالدى.
قوستاناي
