قازاقستاندىق قوعام مەن مەملەكەت دامۋىنىڭ نەگىزگى باعىتتارى پرەزيدەنتتىككە ءۇمىتكەردىڭ سايلاۋالدى باعدارلاماسىنا ەنگىزىلەدى. سوندىقتان پرەزيدەنتتىك پوزيتسياعا ناقتى ۇمىتكەر ءۇشىن ەلەكتوراتتىڭ باسىم بولىگىنىڭ تۇپكىلىكتى داۋىس بەرۋى قازاقستاننىڭ دامۋىنداعى نەگىزگى بولاشاق باعىتتارىنىڭ جوباسىن ماقۇلداۋى بولىپ سانالادى. سايلاۋشىلاردىڭ داۋىستارىمەن راستالعان ولار تۇتاستاي مەملەكەتتىڭ جانە ونىڭ ناقتى قۇرىلىمدارىنىڭ ساياسي كۇشى بولادى. قازاقستان رەسپۋبليكاسىنىڭ پرەزيدەنتى ءوزىنىڭ سايلاۋالدى تۇعىرناماسىن جۇزەگە اسىرۋى ءتيىس.
قازاقستاندا ەلىمىزدىڭ تۇڭعىش پرەزيدەنتى – ەلباسى ن.ءا.نازارباەۆتىڭ ەرەكشە تۇلعاسى ارقاسىندا پرەزيدەنتتىك بيلىكتىڭ كۇشتى ينستيتۋتى قۇرىلدى. ەل ىشىندە جانە شەت مەملەكەتتەردە ءۇلكەن بەدەلگە يە نۇرسۇلتان نازارباەۆ ارقاشان قازاق حالقىنىڭ ءوز ساياساتىنا دەگەن قولداۋىن الۋ ءۇشىن سايلاۋعا ءتۇسىپ وتىردى.
بۇگىندە الەمدىك ەكونوميكا مەن گەوساياساتتا سىن-قاتەرلەر از ەمەس. سوندىقتان حالىق كەز كەلگەن ىقتيمال قاۋىپ-قاتەرلەرگە الاڭداۋشىلىق بىلدىرمەي قويمايدى.
تاۋەلسىزدىك جىلدارى اتا-بابالارىمىز ارمانداعان كوپتەگەن ماسەلەلەر ورىندالدى. ءبىز ءوز مەملەكەتىمىزدى, ەكونوميكامىزدى دامىتتىق, تۇتاستاي العاندا قازاقستان اۋماعىندا جاڭا ءومىردى قالىپتاستىردىق. قازاقستان بۇرىنعى كەڭەس وداعىنىڭ بارلىق ەلدەرىنىڭ ىشىندە ءبىر ادامعا شاققاندا جالپى كولەمدەگى شەتەلدىك ينۆەستيتسيالاردى تارتۋ بويىنشا ورتالىق ازيادا كوشباسشى بولدى. ءبىزدىڭ ەلىمىزگە دۇنيەجۇزىلىك بەدەلگە يە ءىرى كومپانيالار قىزىعۋشىلىق ءبىلدىردى. وسى ورايدا ءبىز ءۇشىن شەتەلدىك بيزنەس پەن ينۆەستورلار ەلىمىزدە سەنىمدىلىك جاعدايىندا جۇمىس ىستەي بەرۋى ماڭىزدى.
قازاقستانعا تەك شەتەلدىك ينۆەستورلار مەن بيزنەس قانا ەمەس, بۇكىل الەمدىك قوعامداستىق ورتالىق ازيا ايماعىنداعى كوشباسشى رەتىندە, حالىقارالىق قاتىناستاردى ۇيلەستىرۋدىڭ بەلسەندى جاقتاۋشىسى رەتىندە قارايدى. سوندىقتان مەملەكەتارالىق قاتىناستاردىڭ كونفيگۋراتسياسىندا قازاقستاننىڭ ۇلتتىق سەنىمنىڭ بەرىك مانداتىن العان پرەزيدەنتپەن تانىلۋى وتە ماڭىزدى.
پرەزيدەنتتىك سايلاۋدى ءوتكىزۋ تۋرالى جارلىققا قول قويۋ ارقىلى پرەزيدەنت ق.توقاەۆ العا ناقتى قادام جاسادى. بۇل باستامانى بارشا قازاقستاندىقتار قولداۋى قاجەت. مەملەكەت باسشىسى كونستيتۋتسيانىڭ كەپىلى رەتىندە ءسويلەپ, حالىقتى وسى جىلدىڭ 9 ماۋسىمىنداعى پرەزيدەنتتىك سايلاۋدا بەلسەندى قاتىسۋعا شاقىردى.
زارەما شاۋكەنوۆا,
پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى
