– ءبىزدىڭ ساياسي ۇيىم ەلباسى انىقتاپ بەرگەن جاڭعىرۋ جۇمىستارى مەن ەلىمىزدىڭ قازىرگى دامۋ قارقىنىنىڭ ءارى قاراي ساقتالۋى ءۇشىن جۇمىس ىستەيدى. تۇڭعىش پرەزيدەنتىمىزدىڭ تىكەلەي باستاماسىمەن قولعا الىنعان اۋقىمدى ەكونوميكالىق, الەۋمەتتىك, ساياسي جانە رۋحاني جاڭعىرۋلار پارتيا مەن مەملەكەتىمىزدىڭ الداعى جۇمىس باعىتتارىنىڭ نەگىزگى باسىمدىعى بولىپ قالا بەرەدى, – دەدى وبلىس اكىمى, Nur Otan پارتياسى وبلىستىق فيليالىنىڭ ءتوراعاسى ارحيمەد مۇحامبەتوۆ.
كونفەرەنتسيادا پارتيا مۇشەلەرى ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ رەكتورى, وبلىستىق ءماسليحات دەپۋتاتى الما دوسجانوۆا, پارتيانىڭ سوكولوۆ-سارىباي كەن ءوندىرۋ ءبىرلەستىگى اۋداندىق فيليالى ءتوراعاسىنىڭ ورىنباسارى الەكساندر ماكارەنكو ءسوز سويلەدى. ماسەلەن, ا.ماكارەنكو ەلىمىز ءوندىرىسىنىڭ كوشىن باستايتىن سوكولوۆ-سارىباي كەن ءوندىرۋ بىرلەستىگىنىڭ ۇلكەن ۇجىمى مەملەكەت باسشىسى قاسىم-جومارت توقاەۆتىڭ دەر ۋاقىتىنداعى شەشىمىن قىزۋ قولداپ وتىرعانىن ايتتى.
Nur Otan پارتياسىنىڭ حVIII سەزىندە پارتيا توراعاسى نۇرسۇلتان نازارباەۆ تاپسىرعان «حالىققا كومەك», «باقىتتى وتباسى», «اۋىل – ەل بەسىگى», «قۇتتى مەكەن» جوبالارى وڭىرلەردى الەۋمەتتىك-ەكونوميكالىق دامىتۋدىڭ تەتىگى. «قۇتتى مەكەن» جوباسى بويىنشا بيىل وبلىس وڭىرىندە جەرگىلىكتى ماڭىزى بار 531 شاقىرىم جول جوندەۋدەن وتەدى. مۇندا جولداردى نەگىزىنەن ورتا جوندەۋگە باسىمدىق بەرىلەدى. وسى جۇمىستاردىڭ 50 پايىزى رەسپۋبليكالىق, 50 پايىزى جەرگىلىكتى بيۋدجەتتەن قارجىلاندىرىلادى.
– اۋىلدىق جەرلەردى اۋىز سۋمەن قامتاماسىز ەتۋ جوبا بويىنشا قولعا الاتىن وتە ماڭىزدى جۇمىس بولىپ وتىر. وبلىستا بارلىعى 548 اۋىلدىق ەلدى مەكەن بار. سونىڭ 172-ءى عانا ورتالىقتاندىرىلعان اۋىز سۋ قۇبىرىمەن قامتاماسىز ەتىلگەن. 376 ەلدى مەكەن ورتالىقتاندىرىلماعان اۋىز سۋدى پايدالانادى جانە تاسىپ بەرىلەدى. 2020 جىلعا دەيىن ەلدى مەكەندەردى اۋىز سۋمەن قامتۋ ءۇشىن 22 جوبا جۇزەگە اسىرىلادى, وعان بيىل 7,8 ميلليارد تەڭگە قارجى ءبولىندى. بيىل 19 اۋىلعا ورتالىقتاندىرىلعان اۋىز سۋ قۇبىرى تارتىلاتىن بولادى, – دەدى پارتيانىڭ وبلىستىق فيليالىنىڭ توراعاسى, وبلىس اكىمى ارحيمەد مۇحامبەتوۆ.
