وسى رەتتە كونفەرەنتسيانىڭ كۇن تارتىبىندە پارتيانىڭ XVIII سەزىندە نۇرسۇلتان نازارباەۆ تاپسىرعان «باقىتتى وتباسى», «قۇتتى مەكەن» جانە «حالىققا كومەك» اتتى اۋقىمدى ۇلتتىق جوبالاردى جۇزەگە اسىرۋ بارىسى تالقىلاندى.
نۇر-سۇلتان قالاسىنىڭ مونيتورينگ جانە جەدەل ارەكەت ەتۋ ورتالىعىنىڭ باسشىسى جاننات ءدۇبىروۆا بايانداما جاساپ, استانادا «حالىققا كومەك» قازىردىڭ وزىندە قالا تۇرعىندارىمەن كەرى بايلانىس جۇيەسىن قالىپتاستىرۋدىڭ ءتيىمدى قۇرالى بولىپ وتىرعانىن ايتتى.
ءبىر ايدىڭ وزىندە IKomek109 بىرىڭعاي بايلانىس ورتالىعىنا پارتيانىڭ قوعامدىق قابىلداۋىنان 800-دەن اسا ءوتىنىش قابىلدانعان. وسىلايشا بۇل ءارتۇرلى الەۋمەتتىك ماسەلە بويىنشا ازاماتتارعا كومەك كورسەتۋدىڭ «تەرەزەسىنە» اينالادى.
سونىمەن قاتار باسقوسۋدا «باقىتتى وتباسى» ۇلتتىق جوباسى جونىندە «مەدينا» جەكەمەنشىك بالاباقشالاردىڭ باسشىسى ءمادينا اجىكەنوۆا ءسوز قوزعادى. ول جوبانى ىسكە اسىرۋ ماقساتىندا الەۋمەتتىك-ەكونوميكالىق شارالار, قۇقىق قورعاۋ, وتباسى ينستيتۋتىن كۇشەيتۋ سياقتى ءۇش ءمىندەتتىڭ ايقىندالعانىن, ۇكىمەت مەن اكىمدىكتەر بىرلەسىپ ارنايى جول كارتاسىن ازىرلەگەنىن تىلگە تيەك ەتتى.
كەزدەسۋ سوڭىندا جينالعان قاۋىم Nur Otan پارتياسىنىڭ كەزەكتەن تىس ءحىح سەزىنىڭ جۇمىسىنا قاتىساتىن دەلەگاتتاردى انىقتادى.
ورىنبەك وتەمۇرات,
نۇر-سۇلتان
