مەملەكەت باسشىسى قاسىم-جومارت توقاەۆ شاۆكات ميرزيوەۆكە تۇڭعىش پرەزيدەنت – ەلباسى ن.ءا.نازارباەۆتىڭ سالەمىن جەتكىزىپ, ونىڭ قازاقستان مەن وزبەكستان قارىم-قاتىناستارىنىڭ دامۋىنا سىڭىرگەن ولشەۋسىز ەڭبەگىن ەرەكشە اتاپ ءوتتى.
– ءبىز شاعىن قۇرامداعى كەزدەسۋ كەزىندە ساباقتاستىقتىڭ ساقتالىپ, مەملەكەتتەرىمىز اراسىنداعى قارىم-قاتىناستاردى ودان ءارى نىعايتۋ ءۇشىن بارلىق كۇش-جىگەرىمىزدى جۇمساۋعا ۋاعدالاستىق, – مەملەكەت باسشىسى.
قازاقستان پرەزيدەنتى قازىرگى ساياسات ەكى مەملەكەتتىڭ ۇلتتىق مۇددەسىنە تولىقتاي سايكەس كەلەتىنىن اتىپ ءوتىپ, كەلىسسوزدەر بارىسىندا قول جەتكىزىلگەن كەلىسىمدەردى جۇزەگە اسىرۋ ءۇشىن ۇكىمەتارالىق كوميسسيانى ۇكىمەت باسشىلارىنىڭ دەڭگەيىنە كوتەرۋ تۋرالى شەشىم قابىلدانعانىن ايتتى.
– ءبىز وزبەكستاننىڭ دامۋىن زور قىزىعۋشىلىقپەن باقىلاپ وتىرامىز. سىزدەر بىرقاتار باعىت بويىنشا رەفورمالار جۇرگىزىپ, سونىڭ ىشىندە مەملەكەتتىك باسقارۋدى, ەكونوميكانى ليبەراليزاتسيالاۋدى جەتىلدىرىپ, حالىقتىڭ ءال-اۋقاتىن ارتتىرۋ ىسىندە تاڭقالارلىق جەتىستىكتەرگە قول جەتكىزدىڭىزدەر, – دەدى قاسىم-جومارت توقاەۆ.
شاۆكات ميرزيوەۆ قاسىم-جومارت توقاەۆتىڭ پرەزيدەنت رەتىندەگى العاشقى مەملەكەتتىك ساپارىن وزبەكستاننان باستاعانىنا توقتالىپ, بۇل قادامنىڭ ستراتەگيالىق ارىپتەستىكتى تەرەڭدەتىپ, قالىپتاسقان قارىم-قاتىناستاردى جالعاستىرۋعا باعىتتالعانىن اتاپ ءوتتى.
– قازاقستانمەن دوستىق قارىم-قاتىناستى, تاتۋ كورشىلىكتى نىعايتۋ – وزبەكستاننىڭ سىرتقى ساياساتىنىڭ باسىم باعىتى. نۇرسۇلتان ءاباش ۇلى نازارباەۆ ەكەۋمىز ەكى ەل اراسىنداعى قارىم-قاتىناستاردىڭ بەرىك ىرگەتاسىن قالاپ, ءوزارا بايلانىستى جاڭا دەڭگەيگە كوتەرە الدىق, – دەپ تۇيىندەدى شاۆكات ميرزيوەۆ.
سونىمەن قاتار, مەملەكەتتەر باسشىلارى كەڭەيتىلگەن قۇرامداعى كەزدەسۋدە ەكىجاقتى جانە حالىقارالىق بايلانىستارداعى وزەكتى ماسەلەلەر جونىندەگى, ناقتىراق ايتقاندا, بۇۇ, يسلام ىنتىماقتاستىق ۇيىمى جانە ارالدى قۇتقارۋ حالىقارالىق قورى اياسىنداعى مۇددەلەرى مەن ۇستانىمدارى سايكەس كەلەتىنىن اتاپ ءوتتى.
كەلىسسوزدەر بارىسىندا تاراپتار قۇقىق قورعاۋ ورگاندارى, ارنايى قىزمەت جانە قورعانىس ۆەدومستۆولارى سالاسى بويىنشا قاۋىپسىزدىك پەن تۇراقتىلىقتى, تىعىز ىقپالداستىقتى قامتاماسىز ەتۋ, جولاۋشىلار جانە جۇك تاسىمالداۋ ءىسىن, ءوزارا ساۋدا جانە ونەركاسىپ كووپەراتسياسىن جانداندىرۋ ماسەلەلەرىن تالقىلادى.
