كونفەرەنتسيا جۇمىسىنا ەۋرازيا جانە ۇلى جىبەك جولى ەلدەرىنىڭ باس مۇفتيلەرى, ءدىن قايراتكەرلەرى, ءدىني سالاداعى مەملەكەتتىك ورگانداردىڭ باسشىلارى, لاۋازىمدى تۇلعالار, زيالى قاۋىم وكىلدەرى, جالپى 300-گە جۋىق دەلەگات قاتىستى.
كونفەرەنتسيا قاتىسۋشىلارىن اقپارات جانە قوعامدىق دامۋ ءمينيسترى داۋرەن اباەۆ قارسى الدى.
«جاستاردىڭ رۋحاني-ونەگەلىك, زياتكەرلىك دامۋى, سونداي-اق ونىڭ الەۋمەتتىك قولداۋ ماسەلەلەرى ءبىزدىڭ مەملەكەتىمىزدىڭ باستى باسىمدىقتارى بولىپ تابىلادى. بيىلعى جىلى قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ «2019 – جاستار جىلى» دەپ جاريالاعان يگى باستاماسىنىڭ اياسىندا اتقارۋشى بيلىك جاڭا مۇمكىندىكتەردى قۇرۋ ماسەلەلەرىنە بايىپتى نازار اۋداردى. سوعان وراي, ۇكىمەت جەرگىلىكتى اتقارۋشى ورگاندارمەن بىرلەسە وتىرىپ, بىرقاتار ماڭىزدى شارالار قولدانۋدا. بۇل شارالار جاستاردىڭ الەۋەتىن دامىتۋ, ولاردى جۇمىسپەن قامتۋ, وتباسىلىق قۇندىلىقتاردى دارىپتەۋ, بوس ۋاقىتتى ۇيىمداستىرۋ جانە جاستاردىڭ باستامالارىن قولداۋ, كاسىپكەرلىك جانە ەرىكتى قىزمەتتى قولداۋ ءۇشىن جاعدايلار جاساۋعا باعىتتالعان», - دەپ اقپارات جانە قوعامدىق دامۋ ءمينيسترى داۋرەن اباەۆ ءسوز باستادى.
ءمينيستردىڭ ايتۋى بويىنشا, بۇل باعىتتا اسىرەسە دىندەر ينستيتۋتى جاستارعا ۇلكەن اسەر ەتەدى.
«ەلوردامىزدا ەلباسىنىڭ باستاماسىمەن الەمدىك جانە ءداستۇرلى دىندەر كوشباسشىلارى سەزىنىڭ وتكىزىلىپ تۇرۋى دا وسىنىڭ ايعاعى بولسا كەرەك. قازاقستان ۇلى دالانىڭ رۋحاني مۇرالارى داستۇرىمىزبەن ساباقتاسىپ كەتكەن يسلام قاعيدالارىن قۇرمەتتەيدى. الايدا زايىرلى, كوپۇلتتى مەملەكەتتەرگە ءتان, وزگە نانىم-سەنىم وكىلدەرىنىڭ دە تاڭداۋىنا شەكتەۋ قويمايدى. كوپكونفەسسيالى ءارتۇرلى ۇلت وكىلدەرى تاتۋ-ءتاتتى عۇمىر كەشىپ وتىرعان قوعامدا بىرلىك پەن بەيبىتشىلىكتى ساقتاۋ ءبىرىنشى كەزەكتەگى ماسەلە. سوندىقتان دا بۇل قاعيدادان تايمايمىز» - دەدى ۆەدومستۆا باسشىسى.
سونىمەن قاتار, پلەنارلىق وتىرىس بارىسىندا رەسەي مۇفتيلەرى كەڭەسى مەن رەسەي فەدەراتسياسىنىڭ مۇسىلماندارى ءدىني باسقارماسىنىڭ توراعاسى, جوعارعى ءمۇفتي جانە قازاقستان مۇسىلماندارى ءدىني باسقارماسىنىڭ توراعاسى, وزبەكستان مۇسىلماندارى ءدىني باسقارماسىنىڭ توراعاسى, قىتاي يسلام اسسوتسياتسياسىنىڭ توراعاسى, موڭعوليا ءمۇفتيى جانە فينليانديا يسلام ورتالىعىنىڭ توراعاسى ءسوز سويلەدى.
بۇگىنگى تاڭدا «رۋحاني جىبەك جولى» جوباسىنىڭ قاتىسۋشىلارىنىڭ بىرلەسىپ كۇش سالىسۋىنىڭ ارقاسىندا قازاقستان, رەسەي جانە ورتالىق ازيا مەملەكەتتەرىنىڭ مۇسىلماندارى ءدىني باسقارمالارى مەن قىتايداعى ميلليونداعان مۇسىلمان قاۋىمداستىعىنىڭ اراسىندا تۇراقتى بايلانىس ارنالارى قۇرىلدى. «رۋحاني جىبەك جولى» حالىقارالىق جوباسى جاھاندانۋ ءداۋىرىنىڭ ماسەلەلەرىن شەشۋگە دايەكتى, جەمىستى تاسىلدەردى دامىتۋ ءۇشىن سەنىمدى نەگىز بولدى.
