كەڭەس ورتالىعىندا سالىق ەسەپتەرىن تاپسىرۋعا ارنالعان «سالىق تولەۋشىنىڭ كابينەتى» تەرمينالدارى, بازار اۋماعىندا سالىقتار مەن تولەمدەردى قابىلدايتىن كاسسالار ورنالاستىرىلعان.
ساتۋشىلارمەن كەزدەسكەن دەپارتامەنت باسشىسى ن. كوشەروۆ سالىق ەسەپتىلىگى نىساندارىن تولتىرۋ, ونلاين باقىلاۋ-كاسسا ماشينالارىن تىركەۋ, ونى قولدانۋى جانە سالىق زاڭناماسىنا ەنگىزىلگەن وزگەرىستەر مەن تولىقتىرۋلار تۋرالى مەملەكەتتىك كىرىستەر ورگاندارىنىڭ قىزمەتكەرلەرى ءتۇسىندىرۋ جۇمىستارىن جۇرگىزەتىنىن ايتىپ كەتتى. سونىڭ ناتيجەسىندە سالىق تولەۋشىلەر ەسەپتەرىن وزدەرى جولداي الادى. ياعني, سالىق تولەۋشىلەر ۋاقىتتارىن ۇنەمدەپ, ءوز جۇمىس ورىندارىنان الىستاماي وزدەرىنە ءتيىستى سالىق مىندەتتەمەلەرىن ورىندايدى.
– سىبايلاس جەمقورلىق جانە كولەڭكەلى ەكونوميكامەن كۇرەستىڭ ءبىر جولى – ونلاين باقىلاۋ-كاسسا ماشينالارىن قولدانۋ, - دەدى ن. كوشەروۆ.
ايتا كەتەيىك, 2018 جىلى وسى بازار كاسىپكەرلەرىنىڭ 30% سالىق ەسەپتەرىن ەڭ تومەنگى نەمەسە نولدىك كورسەتكىشتەرمەن تاپسىرعان بولسا, قازىرگى تاڭدا مەملەكەتتىك كىرىستەر دەپارتامەنتى قىزمەتكەرلەرى تاراپىنان اتقارىلعان جۇمىستار ناتيجەسىندە بازاردا ساۋدا جاسايتىن كاسىپكەرلەردىڭ 90% ونلاين باقىلاۋ-كاسسا ماشينالارىن ورناتىپ, اينالىمدارىن 6-7 ەسەگە ۇلعايتقان. 2018 جىلى ءبىر كاسىپكەر جىلىنا تەك 28,0 مىڭ تەڭگە تولەگەن بولسا, قازىر ءبىر اي ىشىندە 14,0 مىڭ تەڭگەگە جۋىق تولەپ وتىر.
– مەملەكەتىمىز بيزنەستى قولداپ, سىزدەردىڭ قىزمەتتەرىڭىزدى تەكسەرمەي, بارلىق جاعدايدى جاساپ جاتقانى بارىمىزگە ءمالىم, سول سەبەپتەن تابىستارىڭىزدى ايقىندايتىن, جاسىرمايتىن ۋاقىت كەلدى, بارلىقتارىڭىزدى ءوز جۇمىستارىڭىزدا باقىلاۋ-كاسسا ماشينالارىن قولدانۋعا, چەكتەردى ۇرىپ, ءوز تابىستارىڭىزدى ايقىن كورسەتۋگە شاقىرامىن, - دەدى مەگاپوليستىڭ باس سالىقشىسى.
جيىن سوڭىندا كاسىپكەرلەر مەن سالىقشىلار اراسىندا ديالوگ ءوتىپ, كاسىپكەرلەردىڭ ۇسىنىستارى ەسكەرىلىپ, الداعى ۋاقىتتا ەكى جاقتاما جۇمىس جاساۋدى نىعايتۋ كەلىسىلدى.
