جيىنعا ۆيدەوكونفەرەنتس بايلانىسى ارقىلى پارتيانىڭ وبلىستىق فيليالى توراعالارىنىڭ ءبىرىنشى ورىنباسارلارى جانە پارتيا ايماقتىق فيليالدارىنىڭ قىزمەتكەرلەرى دە قاتىستى. ءىس-شارا بارىسىندا پارتيا توراعاسى بەرگەن تاپسىرمالاردى ورىنداۋ بارىسى تالقىلانىپ, ونىڭ ناقتى جولدارى ءسوز بولدى.
ءسوز باسىندا ماۋلەن اشىمباەۆ كەزەكتەن تىس پرەزيدەنت سايلاۋىن وتكىزۋ تۋرالى شەشىمنىڭ وتە ورىندى ءارى ۋاقىتىلى قابىلدانعانىن اتاپ ءوتتى. سونداي-اق ول پرەزيدەنتتىڭ بۇل جاۋاپتى شەشىم بويىنشا ەلباسىمەن اقىلداسقانىنا, پارلامەنتتەگى قوس پالاتا سپيكەرىمەن, پرەمەر-مينيسترمەن كەڭەسكەنىنە, كونستيتۋتسيالىق كەڭەستىڭ كەلىسىمىنە جۇگىنگەنىنە جانە پارلامەنتتەگى پارتيا جەتەكشىلەرىمەن كەزدەسكەنىنە نازار اۋدارىپ, «Nur Otan» پارتياسىنىڭ اتالعان تاريحي شەشىمدى قولدايتىنىن جەتكىزدى.
– ءبىز قازاقستان پرەزيدەنتى قاسىم-جومارت توقاەۆتىڭ كەزەكتەن تىس پرەزيدەنت سايلاۋىن وتكىزۋ تۋرالى شەشىمىن تولىعىمەن قولدايمىز. بۇل بيلىكتىڭ تۇراقتىلىعى مەن ەلدىڭ بىرلىگىن نىعايتۋ ءۇشىن قابىلدانعان ۋاقىتىلى ءارى وتە ورىندى شەشىم. «Nur Otan» پارتياسى سايلاۋ ناۋقانىنا تاس-ءتۇيىن دايىن. ول ءۇشىن ءبىز ءوزىمىزدىڭ ۇيىمداستىرۋشىلىق, كادرلىق, ساياسي جانە اقپاراتتىق الەۋەتىمىزدى پايدالانىپ, زاڭ اياسىندا جۇمىس ىستەيمىز. سايلاۋ ەلىمىزدەگى تۇراقتىلىق پەن بىرلىكتىڭ ودان ءارى كۇشەيۋىنە وڭ اسەرىن تيگىزىپ, حالىقتى ەلباسىنىڭ ساياساتى اياسىندا جاڭا ماقساتتارعا جەتەلەيدى دەپ سەنەمىز, – دەدى ماۋلەن اشىمباەۆ.
سونىمەن قاتار ول سايلاۋعا «Nur Otan» پارتياسىنىڭ بەلسەندى تۇردە قاتىساتىنىن جەتكىزدى.
– ەلىمىزدەگى جەتەكشى ساياسي پارتيا رەتىندە «Nur Otan» پرەزيدەنت سايلاۋىنا بەلسەندى تۇردە قاتىسادى. پارتيا توراعاسىنىڭ تاپسىرماسىنا سايكەس پارتيامىز سايلاۋعا قاتىسۋ ءۇشىن ءوز كانديداتىن ۇسىنادى. سوعان بايلانىستى بۇگىن نۇرسۇلتان ءابىش ۇلى نازارباەۆ 2019 جىلدىڭ 23 ساۋىرىندە پارتيانىڭ كەزەكتەن تىس XIX سەزىن شاقىرۋ تۋرالى قاۋلىعا قول قويدى. سول سەزدە «Nur Otan» اتىنان سايلاۋعا قاتىساتىن كانديداتتىڭ ەسىمى بەلگىلى بولادى, – دەدى ماۋلەن اشىمباەۆ.
ودان بولەك, ءىس-شارادا «Nur Otan» پارتياسىنىڭ ەلباسى ساياساتىنىڭ ودان ءارى جالعاسۋىنىڭ باستى كەپىلى ەكەنى تۋرالى ايتىلدى.
– ءبىزدىڭ ساياسي ۇيىم ەلباسى انىقتاپ بەرگەن جاڭعىرۋ جۇمىستارى مەن ەلىمىزدىڭ قازىرگى دامۋ قارقىنىنىڭ ءارى قاراي ساقتالۋى ءۇشىن جۇمىس ىستەيدى. تۇڭعىش پرەزيدەنتىمىزدىڭ تىكەلەي باستاماسىمەن قولعا الىنعان اۋقىمدى ەكونوميكالىق, الەۋمەتتىك, ساياسي جانە رۋحاني جاڭعىرۋلار پارتيا مەن مەملەكەتىمىزدىڭ الداعى جۇمىس باعىتتارىنىڭ نەگىزگى باسىمدىعى بولىپ قالا بەرەدى, – دەدى «Nur Otan» پارتياسى توراعاسىنىڭ ءبىرىنشى ورىنباسارى.
جيىن سوڭىندا ماۋلەن اشىمباەۆ پارتيانىڭ ورتالىق اپپاراتى مەن بارلىق دەڭگەيدەگى فيليالدارىنا جانە باستاۋىش پارتيا ۇيىمدارىنا الداعى سايلاۋ ناۋقانىنا قاتىستى بىرقاتار ناقتى تاپسىرمالار بەردى.
