ارينە, ارميا ءتارتىبى قاتال. قاتال بولاتىن سەبەبى, ونىڭ ءمىندەتى ەلدىك ءىستى تالاپ ەتەدى. اسكەري قىزمەتشى وسى مىندەتى ءۇشىن جاۋاپ بەرەدى. سوندىقتان بۇل مىندەت كوپ ادامعا اتقارا الماس اۋىرلىق جۇكتەيتىن سەكىلدى كورىنەدى. الايدا وسىنىڭ ءوزى كەز كەلگەن جاسوسپىرىمدى ناعىز ادام بولۋعا باۋلايتىنى, شىڭدايتىنى ەسكەرىلە بەرمەيدى. جىلىنا ەكى رەت قارۋلى كۇشتەردىڭ جاس تولىمى اسكەري انت بەرەدى. ماسەلەن, بىلتىر كوكتەمدە قۇرلىق ءاسكەرلەرى مەن اۋە قورعانىسى كۇشتەرىنىڭ اسكەري بولىمدەرى مەن قۇرامالارىنا شاقىرىلعان ءتورت مىڭنان استام مەرزىمدى قىزمەتتەگى اسكەري قىزمەتشى وتانعا ادال بولۋعا انت بەردى. وسىنداي انت قابىلداعان سوڭ ولار كىشى مامانداردى دايارلاۋ باعدارلاماسى بويىنشا جاۋىنگەرلىك وقۋعا كىرىسەدى. جارتى جىلدان سوڭ ارتيللەريست, تانكيست, بايلانىسشى, اتقىش سياقتى اسكەري ماماندىقتارعا يە بولىپ, بىرىڭعاي, تولىققاندى وتان قورعاۋشى ساپىنا تۇرادى. ءوتكەن جىلى كۇزدە قارۋلى كۇشتەردىڭ, باسقا اسكەرلەرى مەن ءاسكەري قۇرامالارىنىڭ قاتارىنا 17 مىڭنان استام شاقىرۋ جاسىنداعى ازامات كەلدى.
ارميامىز ايبىندى دەگەن اتىنا زاتى ساي بولۋى ءۇشىن ونىڭ دايىندىعى دا جوعارى بولۋى كەرەك. بۇل ماقساتتا اسكەري جاتتىعۋلار ۇنەمى جۇرگىزىلىپ وتىرادى. سونىڭ ىشىندە قاي كەزدە بولماسىن دەسانتشىلار اسكەردىڭ باستى قۋاتى ەكەنى بەلگىلى. دەسانتتىق-شابۋىلداۋ ءاسكەرلەرىندە ولاردىڭ وزىنە ءتان دايارلىعىنىڭ نەگىزى – اۋە-دەسانتتىق دايىندىق بويىنشا ساباقتار. وقۋ-جاتتىعۋ, سەكىرۋلەرىن كوپتەگەن اسكەري قىزمەتشى ورىندايدى. بارلىق جەرۇستى ەلەمەنتتەردى «ۇزدىك» دەگەن باعاعا ورىنداعان جانە وزدەرىنىڭ ءىس-قيمىلدارىنىڭ ورىندالۋىن جەتىك مەڭگەرگەن كۋرسانتتار عانا سەكىرۋگە رۇقسات الادى. وسىنداي اسكەري ونەردىڭ شىڭداۋى ارقاسىندا ارمياداعى كوپتەگەن جاس ازامات ومىردەن ءوز جولىن تاپتى. ماسەلەن, ءوتكەندە قاپشاعايدا دەسانتتىق-شابۋىلداۋ اسكەرلەرىنىڭ قازاق كۇرەسىنەن چەمپيوناتى ءوز مارەسىنە جەتتى. وندا 80 كەلىدەن اسا سالماق دارەجەسىندە 30-دان اسا پالۋان تارتىسقا ءتۇستى. سايىس قورىتىندىسى بويىنشا 61993 اسكەري ءبولىمىنىڭ اسكەري قىزمەتشىسى اعا سەرجانت م.قوجانتاەۆ جەڭىمپاز اتاندى. ەكىنشى ورىن 32363 اسكەري ءبولىمىنەن كەلگەن مەرزىمدى قىزمەتتەگى سارباز ە.سىرگەبايعا بۇيىرسا, ءۇشىنشى ورىندى 61993 ءاسكەري ءبولىمىنىڭ اعا سەرجانتى ن.ساياباەۆ ەنشىلەدى. ال نەمىستىڭ گامبۋرگ قالاسىندا تاەكۆوندودان (WT) وتكەن «Germany Open-2019» رەيتينگتىك تۋرنيرىندە ارميا سپورتشىسى نۇرسۇلتان ماماەۆ 74 كەلىگە دەيىنگى سالماق دارەجەسىندە ءۇشىنشى ورىندى يەلەندى.
انشىلەرىمىزدىڭ دە, سپورتشىلارىمىزدىڭ دا دەنى اسكەردە قىزمەت ەتكەنىن ايتقان ءجون جانە قايسىبىرى ءالى دە اسكەري قىزمەتتەرىن جالعاستىرۋدا. مىسالى, بەلگىلى پروديۋسەر ق.بولمانوۆ ارنايى اسكەري باتالوندا وزات قىزمەت ەتكەن. ال وليمپيادا چەمپيونى د.بالاندين دا «دينامو» سپورت قوعامىندا ءاسكەري قىزمەتىن وتكىزگەن. اۋىر اتلەت نيدجات راحيموۆ تا وسى «دينامو» سپورت قوعامىنان شىققان. بەلگىلى حوككەيشى دامير رىسپاەۆ الماتى قالاسىنداعى ورتالىق سپورت كلۋبىندا اسكەري قىزمەتىن وتەگەن. بەلگىلى ەسترادا ءانشىسى ءبۇركىت رەسپۋبليكالىق ۇلاندا قىزمەت ەتتى. ايتا بەرسە, مۇنداي مىسالداردى كوپتەپ كەلتىرۋگە بولادى. سوندا وسىنداي بەلگىلى ادامداردىڭ كوپشىلىگى ارميا ولارعا ۇلكەن سەرپىلىس بەرگەنىن ايتادى.
ويتكەنى مەكتەپ, جوعارى وقۋ ورىندارى كەيدە بەرە الماعان ءتارتىپ, قايسارلىق, توزىمدىلىك, سەنىمدىلىك سەكىلدى ومىردە اسا قاجەت قاسيەتتەردىڭ ورنىن ارميا تولتىرادى. تالاي ءالجۋاز بوزبالانىڭ ارمياعا بارىپ كەلگەننەن كەيىن ناعىز ازامات بولىپ قالىپتاسىپ كەتەتىنى جاسىرىن ەمەس. ال ارميانىڭ وزىنە قالاعان سالاسىن تاڭداپ, سوندا قىزمەت ەتەم دەپ تالپىنعان جاس ەڭ اۋەلى ءوز دەنساۋلىعىن كۇتىپ ۇستايتىندىعى بەلگىلى. ماسەلەن, پرەزيدەنتتىك پولك قاتارىندا ەڭ ۇزدىك اسكەري قىزمەتشىلەر عانا مىندەتىن اتقارادى. سەبەبى مەملەكەتتىك كۇزەت قىزمەتى ەلىمىزدىڭ ۇلتتىق قاۋىپسىزدىگىن قامتاماسىز ەتۋ كۇشتەرىنە جاتاتىن بولعاندىقتان مۇندا ىرىكتەۋ وتە قاتاڭ جۇرگىزىلەدى. وسى ورايدا الدىمەن مكق قىزمەتكەرلەرى بۇل باعىتتاعى جۇمىستى جىل سايىن جەتىلدىرۋ ۇستىندە. ماسەلەن, بىلتىر اسكەرگە شاقىرتۋ كوميسسياسىنىڭ جۇمىس ناتيجەسىندە 295 جاس ساربازدىڭ 255-ءى ارناۋلى ورتا جانە جوعارى ءبىلىم العان ەكەن. سالىستىرمالى تۇردە ايتساق, 2016 جىلى لايىقتى ءبىلىمى بار ۇمىتكەرلەردىڭ سانى 195-ءتى قۇراعان بولاتىن. بۇل دەگەنىمىز – اسكەري قىزمەتتى ساپالى وتكەرۋگە ءارى قىزمەت ساتىسىمەن جوعارىلاۋداعى وتە ماڭىزدى فاكتور.
ازاماتتىق قىزمەتكە تۇراردا دا اسكەري بورىشىن وتەگەن جاسقا جول بەرىلەدى. ونىڭ ءۇستىنە بۇرىنعىداي ەمەس, قازىرگى كۇنى ءاسكەردە كەلىسىمشارتپەن قىزمەت ەتۋ ۇردىسكە اينالدى. ول ءۇشىن اسكەري قىزمەتشىگە جالاقى تولەنەدى. پاتەرمەن دە قامتاماسىز ەتىلەدى. اسكەر ءىسىندە وسىنداي زور ناتيجەلەرگە جەتىپ جاتقان ولاردىڭ وتباسىن باسپانامەن قامتاماسىز ەتۋ دە ءداستۇرلى جولعا قويىلعان. ءماسەلەن, وتكەن جىلى سەمەي قالاسىنىڭ «يۋنوست» شاعىناۋدانىندا «شىعىس» وڭىرلىك قولباسشىلىعىنىڭ ءاسكەري قىزمەتشىلەرىنە قىزمەتتىك پاتەر كىلتتەرىن سالتاناتتى تۇردە تاپسىرۋ ءراسىمى ءوتتى. «بۇگىن ءبىز سۋ جاڭا ءپاتەردىڭ كىلتىن الدىق جانە مەنىڭ قۋانىشىم شەكسىز. مەنىڭ ويىمشا اسكەري قىزمەت وتكەرۋ ءۇشىن بۇل كەرەمەت ىڭعايلىلىق پەن ءمۇمكىندىك بەرەدى. بولمەلەر كەڭ, جارىق, پاتەردە بارلىعى دايىن. جيھاز بەن جەكە زاتتارىمىزدى الىپ كىرۋ عانا قالدى», دەپ 44736 اسكەري ءبولىمىنىڭ كومانديرى مايور دۋمان ءبىلالوۆ ءوز قۋانىشىمەن ءبولىستى. اسكەري قىزمەتشىلەردى الەۋمەتتىك قورعاۋ ماسەلەسى قر قك جوعارعى باس قولباسشىسى جانە قر قورعانىس ءمينيسترىنىڭ ۇدايى باقىلاۋىندا تۇر.
