جارمەڭكەگە الماتىداعى 50 قۇرىلىس كومپانياسى قاتىسپاق. ولار كەلگەن ازاماتتارعا قولدا بار تۇرعىن ءۇي تۋرالى, باعاسى مەن ونى «7-20-25» باعدارلاماسى ارقىلى ساتىپ الۋ مۇمكىندىگى تۋرالى تولىق اقپارات بەرەدى. سونىمەن قاتار, ەكىنشى دەڭگەيدەگى بانكتەردىڭ وكىلدەرى مەن «باسپانا» يپوتەكالىق ۇيىمىنىڭ ماماندارى كەڭەس بەرمەك.
«ءبىز قازاقستاننىڭ ءىرى قالالارىندا ءوتىپ جۇرگەن پاتەر جارمەڭكەلەرىنە ەكىنشى جىل قاتىسىپ وتىرمىز. جارمەڭكەلەر ءوزىنىڭ تيىمدىلىگىن دالەلدەدى, ولار ساتۋشىلاردىڭ, ساتىپ الۋشىلاردىڭ جانە بانكتەردىڭ ءبىر الاڭدا باس قوسۋىنا جاقسى مۇمكىندىك بەرەدى. ەگەر وتكەن جىلى الماتى قالاسىنداعى جارمەڭكەگە 35 قۇرىلىس كومپانياسى قاتىسسا, بيىل ولاردىڭ سانى 50-دەن اسىپ وتىر. قۇرىلىسشىلاردىڭ «7-20-25» باعدارلاماسىنا دەگەن قىزىعۋشىلىعى ارتىپ وتىرعانىن ەسكەرسەك, ەندى تۇرعىن ءۇي كەشەندەرىنىڭ دەرەكقورىن جۇيەلى تۇردە جاڭارتىپ وتىرۋ قاجەتتىلىگى تۋىندايدى. وسى تۇرعىدان مامانداندىرىلعان ينتەرنەت-سەرۆيستەردىڭ ۇلكەن قولداۋىن سەزىنەمىز», – دەدى «باسپانا» يپوتەكالىق ۇيىمىنىڭ باسشىسى قايرات التىنبەكوۆ.
ەكى كۇن ىشىندە جارمەڭكەگە الماتىنىڭ 6 مىڭنان استام تۇرعىنى مەن قوناقتارى قاتىسادى دەپ كۇتىلۋدە. «7-20-25» باعدارلاماسى بويىنشا الماتىدا پاتەر العىسى كەلەتىندەرگە بۇل وتە جاقسى مۇمكىندىك ەكەنىن دە ەسكەرتە كەتەيىك.
