«وتانداستار قورى» كەاق پرەزيدەنتىنىڭ كەڭەسشىسى ماعاۋيا سارباسوۆ ءوز سوزىندە كەزدەسۋدى ۇيىمداستىرعان قازاقستاننىڭ فرانتسياداعى وكىلەتتى ەلشىسى جان عاليەۆ مىرزاعا جانە ەلشىلىك ۇجىمىنا العىسىن ءبىلدىرىپ, قور قىزمەتىنىڭ جالپى ۇستانىمى مەن جوسپار-جوبالارىنا توقتالدى.
«قازاق ەلى تاۋەلسىزدىك جىلدارىندا الىستاعى اعايىنعا قولداۋ كورسەتۋدى ەستەن شىعارعان ەمەس. ەلباسى تاپسىرماسىمەن قۇرىلعان «وتانداستار قورى» سونىڭ ايقىن دالەلى. قور ەلگە ورالعان قانداستارمەن بىرگە, شەتەلدەگى قازاق دياسپوراسىن قولداۋ باعىتىندا جۇمىس ىستەيدى. ول, ءوز كەزەگىندە, جىراقتاعى وتانداستارىمىزدىڭ قۇقىعىن قورعاۋ, مادەني جانە زياتكەرلىك الەۋەتىن ساقتاۋ, قازاق دياسپوراسىمەن مادەني, ىسكەرلىك جانە باسقا دا بايلانىستاردى نىعايتۋ, سونداي-اق تاريحي وتانعا ورالۋعا نيەتتى قانداستارعا قولايلى جاعداي جاساۋ سىندى ماقساتتاردى قامتيدى», - دەدى ماعاۋيا سارباسوۆ.
كەزدەسۋ بارىسىندا قانداستارىمىز كوكەيتەستى ماسەلەلەرىن جەتكىزىپ, قور وكىلدەرىنەن ولاردىڭ شەشىلۋ جولىن قاراستىرۋىن ءوتىندى. ماسەلەن, مۇستافا شوقاي اتىنداعى قازاق-فرانتسۋز «دوستىق» قوعامىنىڭ توراعاسى ياشار دينچ مىرزانىڭ ايتۋىنشا, فرانتسياداعى قازاق قوعامىنا لاتىن قارپىندەگى قازاق كىتاپتارى مەن قازاق-فرانتسۋز سوزدىكتەرى اۋاداي قاجەت. تۋعان ءتىلىن مەڭگەرۋگە نيەتتى قانداستارىمىز قازاقستاننىڭ جاقىن كۇندەرى تولىعىمەن لاتىن قارپىنە وتەتىندىگىنە, سونداي-اق جىراقتاعى قازاققا قولداۋ كورسەتۋگە باعىتتالعان «وتانداستار قورىنىڭ» قۇرىلعانىنا ريزاشىلىق ءبىلدىردى.
فرانتسياعا ءىسساپارى اياسىندا قور وكىلدەرى قازاق دياسپوراسىنىڭ ۇلىستىڭ ۇلى كۇنى ناۋرىز دۋمانىنا, فرانتسياداعى ەتنيكالىق قازاقتاردىڭ قۇراما كومانداسى ويناعان فۋتبول ليگاسىنا قاتىسىپ, پاريجدەگى مۇستافا شوقايدىڭ ەسكەرتكىشىنە بارىپ, گۇل شوقتارىن قويدى. سونداي-اق, «قورقىت» تۇڭعىش قازاق مادەنيەت ورتالىعىنىڭ جۇمىسىمەن تانىسىپ قايتتى.
سونىمەن قاتار, قور وكىلدەرى فرانتسياداعى اسىراندى قازاق بالالارىنىڭ وتباسى جاعدايىمەن تانىسىپ, ولاردىڭ قازاق ءتىلىن, مادەنيەتىن, تاريحىن مەڭگەرۋ مۇمكىندىكتەرى جايلى ءبىلىپ قايتتى.
