«اتىراۋ مۇناي جانە گاز-2019» 18-ءشى سولتۇستىك كاسپي وڭىرلىك كورمەسىنىڭ ماقساتى - اتىراۋ وبلىسىنىڭ ينۆەستيتسيالىق الەۋەتى تۋرالى, ناقتى جوبالارعا جانە ايماقتىڭ ەكونوميكاسىنا ينۆەستيتسيالار تارتۋ تۋرالى حاباردار ەتۋ.
ءىس-شاراعا ورتالىق جانە جەرگىلىكتى مەملەكەتتىك ورگانداردىڭ, ۇلتتىق كومپانيالار مەن دامۋ ينستيتۋتتارىنىڭ, قازاقستانداعى ديپلوماتيالىق ميسسيالاردىڭ وكىلدەرى, شەتەلدىك جانە وتاندىق ينۆەستورلار شاقىرىلدى.
وبلىس اكىمى نۇرلان نوعاەۆ قۇتتىقتاۋ سوزىندە وتكەن جىلمەن سالىستىرعاندا قاتىسۋشىلاردىڭ سانى ايتارلىقتاي وسكەندىگىن سونداي-اق, كورمەگە الەمنىڭ 20 ەلىنەن مۇناي, گاز جانە قۇرىلىس سالاسىندا 2000-نان استام ساراپشى قاتىسقاندىعىن اتاپ ءوتتى.
- بۇل كورمە 18-ءشى رەت وتكىزىلۋدە. قاتىسۋشىلاردىڭ سانى ارتىپ كەلە جاتقان سايىن, كومپانيالاردىڭ گەوگرافياسى كەڭەيەدى. بۇگىندە ەلىمىزدە قولايلى ينۆەستيتسيالىق احۋال قالىپتاستى. بۇل ءۇشىن ەلىمىزدە ەلباسى نۇرسۇلتان ءابىش ۇلى مەن قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ تاپسىرماسى بويىنشا بارلىق قاجەتتى جاعدايلار جاسالۋدا. وسىعان وراي بۇگىنگى كۇنى ءبىزدىڭ وبلىستا 50-دەن استام ەلدىڭ 1000-نان استام وكىلدەرى جۇمىس ىستەيدى. بۇگىنگى كۇنى بارلىق قاتىسۋشىلار جاڭا سەرىكتەستەر مەن دوستار تاباتىنىنا سەنىمدىمىن. ساتتىلىك تىلەيمىن, - دەدى اتىراۋ وبلىسىنىڭ اكىمى نۇرلان نوعاەۆ.
كورمەگە 50-دەن استام شەتەلدىك جانە قازاقستاندىق كومپانيا قاتىسىپ جاتىر, ونىڭ 30-ى رەسەيلىك, ولار ونەركاسىپتىك جانە مۇناي-گاز سەكتورىنداعى بارلىق جابدىقتارىمەن تانىستىردى.
«اتىراۋ مۇناي جانە گاز-2019» جىل سايىنعى كورمەسى قازاقستان رەسپۋبليكاسى ەنەرگەتيكا مينيسترلىگى, اتىراۋ وبلىسىنىڭ اكىمدىگى, «قازمۇنايگاز» ۇك اق, KAZENERGY قاۋىمداستىعى, «كازسەرۆيس» قازاقستان سەرۆيستىك كومپانيالارى وداعى جانە قازاقستان مۇنايشىلار قوعامى جانە گەولوگتاردىڭ قولداۋىمەن وتەدى.
اتىراۋ
