رۋحانيات • 09 ءساۋىر، 2019

قىزدار ۋنيۆەرسيتەتى «75 جىلعا – 75 يگىلىكتى ءىس» جوباسىن باستادى

قازاق ۇلتتىق قىزدار پەداگوگيكالىق ۋنيۆەرسيتەتىنىڭ 75 جىلدىعىنا وراي ارنايى ەكولوگيالىق جوبا باستاۋ الدى. بۇل تۋرالى وقۋ ورنىنىڭ ءباسپاسوز جانە قوعاممەن بايلانىس ءبولىمىنىڭ باسشىسى جاندار اسان مالىمدەدى.

ايناش ەسالى

«75 جىلعا – 75 اعاش» دەپ ات قويىپ ايدار تاققان شارا الماتى قالاسىنداعى حيميا-بيولوگيا باعىتىنداعى نازارباەۆ زياتكەرلىك مەكتەبىندە ءوتتى. پەداگوگيكالىق وقۋ ورنىنىڭ ۇجىمى مەن ستۋدەنتتەرى جانە مەكتەپ وقۋشىلارى قاتىسقان جيىننىڭ رەسمي بولىمىندە قىزدار ۋنيۆەرسيتەتىنىڭ رەكتورى گاۋحار الدامبەرگەنوۆا ءسوز الىپ، باستامانىڭ ماڭىزىنىا توقتالدى.

– ەلباسى نۇرسۇلتان نازارباەۆتىڭ تاريحي شەشىمدەرىنىڭ ارقاسىندا قازاقستان «جاسىل ەكونوميكانى» ىسكە اسىرۋعا باعىتتالعان بىرقاتار باستامالاردىڭ ۇيىتقىسىنا اينالىپ وتىر. باستامالاردى ىسكە اسىرۋ بيزنەس پەن عىلىمنىڭ كۇشىن بىرىكتىرۋدى، مەملەكەت پەن حالىقارالىق ۇيىمداردىڭ جۇيەلى قارىم-قاتىناس قۇرۋىن تالاپ ەتەدى. بۇل ىسكە وتاندىق جوعارى وقۋ ورىندارى دا ەلەۋلى ۇلەس قوسۋى ءتيىس دەپ ويلايمىن. ۋنيۆەرسيتەتتىڭ 75 جىلدىعى قارساڭىندا جاراتىلىستانۋ فاكۋلتەتىنىڭ عالىمدارىنىڭ قولداۋىمەن وسىنداي يگىلىكتى ءىس قولعا الىنىپ وتىر. بۇل جوبا اداعى ۋاقىتتا ءوز جالعاسىن تاباتىن بولادى، – دەدى گاۋحار الدامبەرگەنوۆا.

سونىمەن قاتار جيىندا مەملەكەت جانە قوعام قايراتكەرى ءشامشا بەركىمباەۆا، ءتىل جاناشىرى، قىزدار ۋنيۆەرسيتەتىنىڭ تۇلەگى اسىلى وسمانقىزى، الماتى قالاسىنداعى حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ ديرەكتورى گۇلميرا موڭكەەۆا جانە جوبا اۆتورى، بيولوگيا عىلىمدارىنىڭ دوكتورى، پروفەسسور كەلىس جايلىباي ءسوز سويلەپ، قايىرى كوپ ىسكە تىلەكتەستىك ءبىلدىردى.

رەسمي راسىمنەن سوڭ وقۋ ورنىنىڭ ۇجىمى مەن مەكتەپ وقۋشىلارى ارنايى بولىنگەن الاڭعا سيمۆولدىق تاقتايشا ورناتىپ، كوشەتتەردى وتىرعىزدى. كەلىس جايلىبايدىڭ ايتۋىنشا، بىرەگەي جوبا الماتى قالاسىنىڭ ەكولوگيالىق احۋالىن جاقسارتۋعا ءوز سەپتىگىن تيگىزبەك.

– جوبا بارىسىندا وڭتۇستىك استاناداعى اۋا باسسەينى لاستانۋ دەڭگەيى جوعارى ايماقتاردا ارشا، ەمەن، ۇيەڭكى، اكاتسيا، بوزارشا جانە بورتەگۇل كوشەتتەرى وتىرعىزىلادى. بۇل وسكىندەر ۋنيۆەرسيتەتتىڭ جاراتىلىستانۋ فاكۋلتەتىنىڭ بازاسىنداعى ارنايى زەرتحانادا ەڭ ارزان ادىستەمە ارقىلى ءوسىرىلىپ، كۇتىپ-باپتالعان، – دەيدى عالىم.

جاراتىلىستانۋ فاكۋلتەتىنىڭ دەكانى قاجىمۇقان كىشىباەۆتىڭ سوزىنە قاراعاندا، بۇعان دەيىن الماتى قالاسىنداعى مەدەۋ شاتقالىندا ۋنيۆەرسيتەتتىڭ بيولوگ عالىمدارى مەن ستۋدەنتتەرى 1000-نان استام اعاش وتىرعىزعان. ەندى اتالعان شارا شاھاردىڭ وزگە دە ايماقتارىندا جۇزەگە اسىرىلماق. باستاما بولاشاقتا ەلىمىزدىڭ اۋماعىندا كۇتىلەتىن قۋاڭشىلىق، اپتاپ ىستىق پەن تابيعي اپاتتاردىڭ الدىن الۋعا سەپتەسەدى جانە جاستاردى ەكولوگيالىق پاتريوتيزمگە تاربيەلەيدى.

وسى ورايدا ايتا كەتەيىك، «75 جىلعا – 75 اعاش» جوباسى اياسىندا جالپى سانى 75 اعاش وتىرعىزىلدى. كوشەتتەردى نازارباەۆ زياتكەرلىك مەكتەبىنىڭ وقۋشىلارى كۇتىپ-باپتاپ تۇرماق.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز