قازىرگى كەزدە الماتى اكىمدىگى وزىق تاجىريبەلەر نەگىزىندە ءتيىمدى ءارى ۇنەمدى جۇمساۋ قاعيداسى بويىنشا بيۋدجەت شىعىندارىن وڭتايلاندىرۋدا. بەلگىلى بولعانداي, بۇرىندارى پرەزيدەنت قاسىم-جومارت توقاەۆتىڭ تاپسىرماسى بويىنشا نەگىزسىز شىعىندار 5,5 ملرد. تەڭگەگە قىسقارىپ, «باقىتتى وتباسى» وڭىرلىك باعدارلامانى قارجىلاندىرۋعا اۋدارىلعان بولاتىن.
«نۇر وتان» پارتياسىنىڭ فراكتسياسىمەن بىرگە بيۋدجەت شىعىندارىنا قوسىمشا ساراپتاما جۇرگىزىلدى, سوندىقتان قوعامدىق كەڭەستىڭ قاراۋىنا تاعى 7 ميلليارد تەڭگەدەن استام قارجىنى قىسقارتۋ ۇسىنىلادى. بۇرىن قولداۋعا يە بولعان مەڭدىقۇلوۆ, شۋحوۆ كوشەلەرىندەگى جانە «بۋدەننىي», مەملەكەتتىك مۋزەي جانىنداعى «جۋرناليستەر» سكۆەرلەرىن, جاس قانات ىقشام اۋدانىنداعى ماياك پاركىن, 28 گۆاردياشىل-پانفيلوۆشىلار اتىنداعى ساياباقتى اباتتاندىرۋ جونىندەگى جوبالاردى كەيىنگە قالدىرۋ ۇسىنىلادى. بۇل جوبالاردى تۇرعىندار تالقىلاۋى ءتيىس دەپ ەسەپتەيمىن. جالپى, بيۋدجەت قالا تۇرعىندارىنىڭ پىكىرى نەگىزىندە قۇرىلادى. ءبىز شاعىمدار مەن ۇسىنىستاردى ۇنەمى زەرتتەۋدەمىز», - دەدى باۋىرجان بايبەك.
وسىلايشا, كەرى بايلانىس جۇيەسى رەتكە كەلتىرىلۋدە. الماتى اكىمدىگىنىڭ بارلىق الەۋمەتتىك جەلىلەردە رەسمي اككاۋنتتارى بار, تەك Instagram پاراقشاسىنا 200 مىڭعا جۋىق ادام جازىلعان. كۇن سايىن 500 ءوتىنىش تۇسۋدە, ولاردىڭ ارقايسىسى «Open Almaty» بىرىڭعاي جۇيەسىنە ەنگىزىلەدى, باقىلاۋعا الىنىپ,ساراپتالادى.
تۇرعىندار وتىنىشتەرى نەگىزىندە بيۋدجەتتىڭ باسىم بولىگى ماڭىزدى ماسەلەلەرگە باعىتتالعان, ولار: قالاعا قوسىلعان ەلدى مەكەندەردى اباتتاندىرۋ, قوعامدىق كولىكتى دامىتۋ, جولدار مەن جەلىلەر, مەكتەپ پەن بالا باقشالار, ەمحانالار سالۋ. ناتيجەسىندە شاعىمدار سانى 3 ەسە قىسقاردى.
ازاماتتار وتىنىشتەرىنە جەدەل جاۋاپ قايتارۋ ءۇشىن بىرىڭعاي بايلانىس ورتالىعى قۇرىلۋدا, مۇندا قالانىڭ بارلىق باسقارمالارى, اۋدان اكىمدىكتەرى, اپاتتى جانە كوممۋنالدىق قىزمەتتەر ءبىر نومىرگە بىرىكتىرىلگەن. «Open Almaty» ءموبيلدى قوسىمشاسى ونلاين-قىزمەت كورسەتۋ بويىنشا قالانىڭ ءتۇرلى سەرۆيستەرىنىڭ باسىن قوسىپ وتىر.
«كەلەر جىلدان باستاپ «بيۋدجەتكە قاتىسۋ» پيلوتتى جوباسىن باستاۋدى ۇسىنامىن, مۇندا ءار اۋدانعا ناقتىلى سوما اۋدارىلادى, ال ونى تۇرعىنداردىڭ وزدەرى ماڭىزدى باعىتتار بويىنشا بولەتىن بولادى. قالا تۇرعىندارى «Open Almaty» جۇيەسى ارقىلى ءوز ۇسىنىستارىن, جوبالارىن ۇسىنادى, ولار جاريالانىپ, كوپشىلىك داۋىسقا سالىنىپ, ۇزدىكتەرى انىقتالادى. ۇسىنىلعان جوبالارعا قوعامدىق كەڭەس مۇشەلەرى, ساراپشىلار, بيۋدجەتتىك كوميسسيا باعالارىن بەرەدى. الماتىدا ءار اۋدانعا ورتا ەسەپپەن جارتى ميلليارد تەڭگە بولۋگە بولادى دەپ ەسەپتەيمىن. ياعني, سەگىز اۋدانعا 4 ملرد. تەڭگە نەمەسە قالا بيۋدجەتىنىڭ 1%-ى بولىنەدى», - دەدى باۋىرجان بايبەك.
مەگاپوليس اكىمى بۇۇ-نىڭ ۇسىنىستارىنا سايكەس دامىعان ەلدەردىڭ بيۋدجەتى وسىلايشا 0,5% دان 1%-عا دەيىنگى كولەمدە جاساقتالاتىنىن ايتتى. بۇل اشىقتىقتىڭ ءبىر كريتەريى جانە ازاماتتاردىڭ كەمەلدەنۋى. مۇنداي باستاما لوندوندا, ريمدە, بەرليندە, پاريجدە, ماسكەۋدە ەنگىزىلگەن.
«بىزگە قوعامدىق پىكىردى ەستۋ عانا ەمەس, بيۋدجەتتىك شەشىمدەردىڭ ورىندالۋىنا جاۋاپكەرشىلىكتى كۇشەيتۋ ءارى ازاماتتىق باستامالاردى قارجىلاندىرۋ ماڭىزدى. ىسكە بۇل تۇرعىدان كەلۋ وزگەنىڭ ەسەبىنەن كۇن كورۋ قاعيداسىن جويىپ, ءوز قالاسىنا دەگەن وڭ كوزقاراستى نىعايتادى. بۇلاردان وزگە, قالا باسقارمالارى كەرى بايلانىس ارنالارى ارقىلى ءىرى جوبالاردى تۇرعىندارمەن, بيزنەسپەن, ساراپشىلارمەن بىرگە تالقىلاعاندارى ءجون. قوعامدىق كەڭەس مۇشەلەرى بۇل باستامادا بارىنشا بەلسەندىلىك تانىتۋلارى ءتيىس دەپ ەسەپتەيمىن», - دەپ قورىتىندىلادى ءسوزىن باۋىرجان بايبەك.
ەسكە سالساق, وتىرىس بارىسىندا «كوكجايلاۋ جوباسىن جۇزەگە اسىرۋدى كەيىنگى قالدىرۋ جانە بوساعان قارجىنى قالالىق باعدارمالاردى ورىنداۋعا جۇمساۋ تۋرالى شەشىم قابىلداندى.
