سونىڭ ءبىرى باقشا داقىلدارىن ەككەن «امان» شارۋا قوجالىعى. قازىر وندا 10 گەكتار ەگىستىك القابىنا 63 مىڭ دانا «اەروپورت» قاۋىن كوشەتتەرىن وتىرعىزۋ جۇمىستارى جالعاسۋدا. ايتا كەتەرلىگى, قاۋىن داقىلى بيولوگيالىق تابيعي تىڭايتقىشتاردىڭ كومەگىمەن وسىرىلەتىن بولادى. ياعني بۇل ەگىستىك القاپقا حيميالىق تىڭايتقىشتار مۇلدەم قولدانىلمايدى. وسى ماقساتتا 10 گەكتار القاپقا كۇزدى كۇنى 70 جۇك كولىگىمەن كوڭ تاستالىنعان. بۇل ءوز كەزەگىندە تازا ەكولوگيالىق ءونىم الۋعا سەپ بولماق. ويتكەنى, وڭىرىمىزدە تابيعي تازا ونىمدەرگە دەگەن سۇرانىس جىل ساناپ ارتىپ كەلەدى.
جالپى بيىل جەتىساي اۋدانىندا 25 مىڭ گەكتار ەگىستىك جەرگە باقشا داقىلدارى ەگىلەدى دەگەن بولجام بار. ءازىردىڭ وزىندە 1200 گەكتار القاپتا قىرىققابات داقىلى ءپىسىپ جەتىلگەلى تۇر. ەندى 5-10 كۇندە العاشقى قىرىققابات ونىمدەرى كورشى رەسەي ەلى مەن ەلىمىزدىڭ سولتۇستىك وبلىستارىنا جونەلتىلەتىن بولادى.
بۇدان بولەك, اۋدان شارۋالارى ءبىر جەردەن ەكى رەت ءونىم الۋ ۇردىسىنە بەيىمدەلگەن. بۇل ءوز كەزەگىندە ەگىستىك القابىن ءتيىمدى پايدالانۋعا ءارى تابىس كوزىن ەداۋىر ۇلعايتادى.
