وسى وقيعاعا وراي اۋدان ورتالىعىندا انانىڭ 90 جىلدىعى, بيكامال اجەنىڭ شوپشەگى بەكارىستىڭ تۇساۋكەسەرى ءوتتى. اۋداندىق ءماسليحاتتىڭ حاتشىسى داۋلەت ىدىرىشەۆ ۇستازعا اتا داستۇرىمەن يىعىنا قامزول جاۋىپ, «اۋداننىڭ قۇرمەتتى ازاماتى» اتاعىنىڭ كۋالىگىن تابىس ەتتى. كەش بولسا دا ەڭبەگى ەلەنىپ, قۇرمەتكە كەنەلگەن انا جەرلەستەرىنە, اۋدان باسشىلارىنا العىسىن ءبىلدىردى.
ءيا, بۇل كەيىنگى تولقىن ۇرپاققا ساباق بولارلىق, ۇيرەنەتىن ءۇردىس. ۇستاز ەڭبەگى ەسكەرۋسىز قالمادى. كەشتە اۋدان ونەرپازدارى ءان مەن كۇيدەن شاشۋ شاشتى. ءبىر جاسقا تولعان بەكارىستىڭ تۇساۋىن الماتىدان ارنايى كەلگەن قاري-قاجى قايرات كوكباەۆ كەسىپ, باتاسىن بەردى.
* * *
...جۇزىنەن مەيىرىم شۋاعى شاشىپ تۇراتىن, وسىناۋ ءبىر قاراپايىم اجەيدى كەزدەستىرگەن سايىن ەسىمە ەلۋىنشى جىلداردىڭ سوڭى تۇسەدى. زايسان اۋدانىنداعى شاعىن عانا سارجىرا اۋىلىنداعى سەگىز جىلدىق مەكتەپتىڭ تابالدىرىعىن اتتاعانبىز. ءبىر كۇنى مەكتەپكە جاڭا مۇعالىم كەلىپتى دەپ بالالار شۋ ەتە قالدى. مىنە, ۇلاعاتتى ۇستاز بيكامال راحىمباەۆامەن وسىلاي تانىسقان ەدىك. ول سابىرلى, زەكىمەيتىن, ساباقتى بالالارعا ۇعىنىقتى تۇسىندىرەتىن مۇعالىم بولدى. ءبىز دە ۇستازدى ەرەكشە سىيلايتىنبىز. مۇنىڭ الدىندا جامبىل, بەسجىلدىق, كاگانوۆيچ مەكتەپتەرىندە قىزمەت ەتكەن, سوسىن داۋال, سارشي, اباي, وكتيابردىڭ 40 جىلدىعى اتىنداعى مەكتەپتەردە شاكىرتتەرگە ءدارىس وقىعان, مىڭداعان بالانىڭ ساۋاتىن اشقان ول ۇستازدىق جولدا جارتى عاسىرعا جۋىق قىزمەت ەتتى. ۇزاق جىلعى ەڭبەگى باعالانىپ, سان مارتە مەدالدارمەن, وقۋ مينيسترلىگىنىڭ قۇرمەت گراموتالارىمەن, العىس حاتتارىمەن ماراپاتتالدى. «كۇمىس القا» مەدالى اسىل انانىڭ التى بالانى تاربيەلەپ وسىرگەنى ءۇشىن بەرىلگەن باعا. ال ۇستازدىڭ جۇبايى, ۇزاق جىلدار اۋداننىڭ بىرنەشە ەلدى مەكەندەرىندە باسشىلىق قىزمەتتە بولعان زينابەك اعا اكەمىزبەن بىرگە ەڭبەك ەتتى. اعانىڭ ۇزاق جىلعى ەڭبەگى ەسكەرۋسىز قالعان جوق, كوپتەگەن وردەن, مەدالدارعا يە بولدى. ادام ۇرپاعىمەن ءوسىپ-ونەدى دەمەكشى, زينابەك اعا مەن بيكامال اپاي 6 بالا, وننان استام نەمەرە, شوبەرە تاربيەلەپ ءوسىردى. بالالارىنىڭ بارلىعى جوعارى ءبىلىم الدى, ولاردىڭ ىشىندە زووتەحنيك, مۇعالىم, باسقا دا ماماندىق يەلەرى بار. 65 جىل ءومىردىڭ قىزىعى مەن شىجىعىن بىرگە كورگەن زينابەك اعا بۇدان بەس جىل بۇرىن باقيلىققا اتتانىپ كەتە باردى.
بۇدان بىرنەشە جىل بۇرىن اينابۇلاق اۋىلىنداعى مەكتەپتە ۇزاق جىل باستاۋىش سىنىپتاردا ۇستاز بولعان ارداقتى انانىڭ «ارناۋلى سىنىبى» اشىلعاندا كۋا بولعان ەدىك. ۇستازدار قاۋىمى بيكامال راحىمباەۆانىڭ اۋدان مەكتەپتەرىندەگى قىزمەتى, ەسىمى ەلگە كەڭىنەن تانىمال شاكىرتتەرى جايلى سۋرەتتەر مەن ءومىرباياندارىن ءتىزىپتى. اجەنىڭ بالالارى مەن نەمەرەلەرى ارناۋلى سىنىپتى جيھازبەن, ينتەراكتيۆتى تاقتامەن جابدىقتاپ بەردى. قازىر بۇل سىنىپتا وزات وقۋشىلارعا قۇرمەت كورسەتىلەدى. بيكامال اجەنى اينابۇلاق اۋىلىنداعى مەكتەپتىڭ ۇستازدارى وزدەرىنە ءجيى شاقىرىپ, اقىلداسىپ, ءتۇرلى جيىنداردان قالىس قالدىرمايدى.
ۇستاز بولۋ – جۇرەكتىڭ باتىرلىعى,
ۇستاز بولۋ – سەزىمنىڭ باتىلدىعى.
ۇستاز بولۋ – ءومىردىڭ كۇن شۋاعى,
ازبايتۇعىن ادامنىڭ التىندىعى, – دەگەن جىر جولدارى ۇستاز ۇعىمىنىڭ ۇلىلىعىن ايقىندايدى. جاس ۇرپاققا ساپالى ءبىلىم, سانالى تاربيە بەرگەن ۇستاز باقىتى وسى بولسا كەرەك.
وڭداسىن ەلۋباي,
«Egemen Qazaqstannyń» ارداگەر ءجۋرناليسى
شىعىس قازاقستان وبلىسى,
زايسان اۋدانى
