اتالعان جوباعا 2017 جىلى 2000 جاس قاتىسىپ, 589 الەۋمەتتىك جوبا ىرىكتەۋدەن وتكەن. بىلتىر قاتىسۋشىلاردىڭ سانى 3508-كە جەتىپ, 1027 الەۋمەتتىك جوبا اقشالاي گرانت ۇتىپ العان. بيىل قاتىسۋشىلاردىڭ سانىن 3 مىڭعا, الەۋمەتتىك جوبانىڭ سانىن 1100-گە جەتكىزۋدى كوزدەگەن ۇيىمداستىرۋشىلار 15 ناۋرىز بەن 15 ءساۋىر ارالىعىندا zhasproject.kz سايتى ارقىلى ءوتىنىم قابىلدايتىندارىن حابارلادى.
«جاستار كورپۋسىن دامىتۋ جوباسى 2017 جىلى قاراعاندى, الماتى, تۇركىستان جانە پاۆلودار وبلىستارىنان باستالعان ەدى. وتكەن جىلى جوبا قوستاناي, اقتوبە, قىزىلوردا, جامبىل, شىعىس قازاقستان, سولتۇستىك قازاقستان وبلىستارىندا جۇزەگە اسىرىلدى. بيىل اقمولا, اتىراۋ, ماڭعىستاۋ, باتىس قازاقستان وبلىستارىن جانە نۇر-سۇلتان مەن الماتى قالالارىن قامتيتىن بولامىز. ماقساتىمىز – جاستاردىڭ قوعامداعى ورنىن تابۋىنا كومەكتەسۋ, بەلسەندىلىگىن ارتتىرۋ, ولاردى پايدالى قىزمەتتەرگە تارتۋ ارقىلى جۇمىسسىز جاستاردىڭ سانىن ازايتۋ. گرانتتىق باعدارلاماعا 14 پەن 29 جاس ارالىعىنداعى جاستار قاتىسا الادى. باسىمدىق جۇمىس ىستەمەيتىن, وقۋ وقىمايتىن جانە جۇمىس ىستەيتىن تابىسى تومەن ادامدارعا بەرىلەدى. ءبىر الەۋمەتتىك جوبانى 3-5 ادام بىرىگىپ دايىنداۋىنا بولادى. ءۇش كەزەڭنەن تۇراتىن ىرىكتەۋدەن سۇرىنبەي وتكەندەر 1 ميلليون تەڭگەگە يە بولادى دا, التى اي بويى ءوز جوبالارىن ءجۇزەگە اسىرادى. وسى ۋاقىت ءىشىندە جوعارى وقۋ ورنىن ءبىتىرگەن ءار قاتىسۋشىعا اي سايىن 60 مىڭ, باسقالارىنا 40 مىڭنان شاكىرتاقى تولەنەدى. جەڭىمپازدار 1 ميلليون تەڭگەگە كەرەكتى قۇرال-جابدىقتار ساتىپ الادى دا, ءوز جوباسى بويىنشا حالىققا جارتى جىل تەگىن قىزمەت كورسەتەدى. التى ايدان كەيىن قاتىسۋشىلار قۇرال-جابدىقتاردى تەگىن ءوز يەلىگىنە الىپ, كاسىبىن جالعاستىرا بەرەدى», دەيدى ءبىلىم جانە عىلىم مينيسترلىگىنىڭ جاۋاپتى حاتشىسى ارىن ورساريەۆ.
جاستار كورپۋسىن دامىتۋ جوباسى باسقارۋ توبىنىڭ جەتەكشىسى گۇلميرا ەسكەندىروۆا جوبا اياسىندا قارجىلىق قولداۋدان بولەك, «مەنتورلىق قولداۋ» اتتى جاستاردى وقىتۋ باعدارلاماسى دا بار ەكەنىن ايتادى. «مەنتورلار التى اي بويى جاستارعا جوبالارىن قالاي جۇزەگە اسىرۋ, قۇجات جۇمىستارىن قالاي ءجۇرگىزۋ كەرەكتىگىن ۇيرەتەدى. ياعني, قاتىسۋشىلار جوبالاردى باسقارۋ بويىنشا ترەنينگتەردەن وتەدى. كونكۋرس تالابى بويىنشا ءوتىنىمدەر جەرگىلىكتى حالىققا كومەگىن تيگىزەتىن الەۋمەتتىك جوبا بولۋى شارت. بىزدە تىگىن شەبەرحاناسىن, ءتىل كۋرستارىن, سپورت زالدارى مەن جىلىجايلار اشقان, مال شارۋاشىلىعىمەن اينالىسقان جاستار ءالى كۇنگە كاسىبىن تابىستى جالعاستىرىپ وتىر. قاتىسۋشىلاردىڭ اراسىندا مەرتىگىپ, ۇزاق جىل توسەك تارتىپ جاتقان نۇربولات قاراباسوۆ ەسىمدى ازاماتتىڭ مۇمكىندىگى شەكتەۋلى جاندارعا ارنالعان جوباسى بولدى. اقتوبەلىك ءبىر ازامات (اتىن ايتا المايمىن) ءىستى بولعانى ءۇشىن ەش جەرگە جۇمىسقا ورنالاسا الماعان. بىلتىر جوباعا قاتىسقان ول بۇگىندە اياق كيىم ءوندىرەتىن تسەح اشىپ, باسقالاردى دا جۇمىسپەن قامتىپ وتىر», دەيدى گ.ەسكەندىروۆا
9 جىل توسەككە تاڭىلعان نۇربولات قاراباسوۆ مۇمكىندىگى شەكتەۋلى الماس مۇحاجانوۆ, اينۇر ءامىرالينوۆا ەسىمدى دوستارىمەن بىرگە «Zhas Project»-كە 2017 جىلى قاتىسادى. بۇگىندە جۇبايىمەن بىرگە كاسىبىن جۇرگىزىپ وتىرعان ول ايلىق تابىسىن 300 مىڭ تەڭگەگە دەيىن جەتكىزگەن. «جوباعا ءوزىمنىڭ كوپتەن قولىم جەتپەي جۇرگەن, شەتەلدە قولدانىستا بار قولارباعا ارنالعان ەلەكترلى جەتەكتى ۇسىندىم. ۇتىپ العان گرانتقا قىتايدان 4 قۇرىلعى الدىق. جاي قولاربامەن كۇنىنە 5-6 شاقىرىم جۇرسەك, ەلەكترلى جەتەك ورناتقان سوڭ ساعاتىنا 22 شاقىرىم جىلدامدىقپەن, ەشكىمنىڭ كومەگىنسىز 30-35 شاقىرىم جولدى وتۋگە بولادى. التى ايعا سوزىلعان جوبا كەزىندە قۇرىلعى 33 ادامعا جالعا بەرىلىپ, 2000 شاقىرىمعا جۋىق جول ءجۇرىلدى. قازىر ەلەكترلى جەتەكتەردىڭ سانى 40-قا جەتتى. تالدىقورعان قالاسى مەن سارىاعاش اۋدانىندا ورتالىعىمىز جۇمىس ىستەيدى. سۇرانىس ءار وڭىردەن بار. قۇرىلعى قىمبات بولعاندىقتان ساتىپ الۋعا ءاركىمنىڭ قالتاسى كوتەرمەيدى. سوندىقتان ايىنا 12 مىڭ تەڭگەگە جالعا بەرەمىز. قازاقستاندا 700 مىڭعا جۋىق ءمۇمكىندىگى شەكتەۋلى جان بولسا, 30-40 مىڭى قولاربادا وتىرادى ەكەن. قالالاردا ەندى جاقسارىپ كەلە جاتقانىمەن ايماقتاردا قولاربادا وتىرعان ادامدارعا ءالى ءمۇسىركەپ قارايدى. مەنىڭ ماقساتىم – ءبىز دە قوعامنىڭ ءبىر ءمۇشەسى ەكەنىمىزدى دالەلدەۋ بولدى. «Zhas Project» ارقىلى قارجىلاي قولداۋ كورىپ قانا قويماي, كاسىپكەرلىكتى جۇرگىزۋدىڭ قىر-سىرىن ءبىلدىم», دەيدى جاس كاسىپكەر نۇربولات قاراباسوۆ.
«جەتىسۋ 360» جوباسىمەن ەلباسى كوزىنە تۇسكەن مەيىرحات تولقىنوۆ تا Zhas Project جەڭىمپازى. جوباعا قاتىسقانعا دەيىن شاعىن فوتو-ۆيدەو ستۋدياسى بار ول بۇگىندە الماتى وبلىستىق ىشكى ساياسات باسقارماسىنىڭ تەحنيكالىق بولىمىندە جۇمىس ىستەيدى. «مەنىڭ جوبام 360 گرادۋستىق تسيفرلى ءتۇسىرۋ, ياعني «3D تۋر» دەپ اتالادى. جاڭا باستامانى قولعا الۋدا قارجىلىق جاعىنان كەدەرگىلەر بولعان. گرانتتى ۇتقان سوڭ قاجەتتى تەحنيكالاردى الدىم. ونى ءالى قولدانىپ ءجۇرمىن. جوبالارىما قىزىققان وبلىستىق ىشكى ساياسات باسقارماسى تۇراقتى جۇمىسقا الدى. قازىرگە دەيىن 19 مۋزەيدى, ەكى تابيعي قورىقتى ءتۇسىردىم, zhetysu360.kz سايتىن اشتىم», دەيدى م.تولقىنوۆ.
