ايماقتار • 08 ءساۋىر، 2019

ونەرلى ستۋدەنتتەر وسكەمەندە باس قوستى

879 رەت كورسەتىلدى

وسكەمەندەگى س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىندە جاستار جىلى اياسىندا « ۇلى ونەر – ۇلت جاڭعىرۋى» تاقىرىبىمەن ستۋدەنتتىك تەاترلار فەستيۆالى ءوتتى. ەكى كۇنگە سوزىلعان ونەر مەرەكەسىنە ەلىمىزدىڭ 8 قالاسىنداعى 10 جوعارى وقۋ ورنىنان 12 ستۋدەنتتىك تەاتر قاتىستى.

فەستيۆال قورىتىندىسىندا «ساكەن» پەساسىن ساحنالاعان نۇر-سۇلتان قالاسىنداعى س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ «اق جەلكەن» تەاترى باس جۇلدەگە (200 مىڭ تەڭگە) لايىق دەپ تانىلدى. ءبىرىنشى ورىندى تالدىقورعان قالاسىنىڭ ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ «جاس تۇلەك» (جەتەكشىسى – عاليا تەمىرباەۆا، «جان داۋا» سپەكتاكلى) تەاترى يەلەندى. ەكى 2 ورىندى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «شاڭىراق» (جەتەكشىسى – جانسەرىك سادىقوۆ، «ءبىر ءتۇپ الما اعاشى» سپەكتاكلى)، تاراز مەملەكەتتىك پەداگوگيكالىق ۋنيۆەرسيتەتىنىڭ «جانساراي» (جەتەكشىسى – مايرا الىمبەكوۆا، ي.ساپاربايدىڭ «اۋىلدان كەلگەن ارۋ» سپەكتاكلى)، ءۇش 3 ورىندى الماتىداعى تۇران ۋنيۆەرسيتەتىنىڭ «TeArt Turan» (جەتەكشىسى – جاميلا قايىپبەردى، «قاي زامان» قويىلىمى)، تاراز يننوۆاتسيالىق-گۋمانيتارلىق ۋنيۆەرسيتەتىنىڭ «تيگۋ جاستار تەاترى» (جەتەكشىسى – ابيىربەك ءتىنالى، «تەمىر قاتىن»)، شاكارىم اتىنداعى سەمەي مەملەكەتتىك ۋنيۆەرسيتەتىنىڭ «قاراگوز» (جەتەكشىسى – ايمان اقتانوۆا، «كەۋدەڭدە  سوققان جۇرەگىم») تەاترلارى ءوزارا ءبولىستى. سونىمەن قاتار سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ «شابىت» تەاترىنىڭ اكتەرى ءجۇرسىن جۇماباەۆ «ۇزدىك ەر ادام ءرولى»، ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «Zhas Star» تەاترىنىڭ اكتەرى بايان سايلاۋبەك «ۇزدىك ايەل ءرولى»، وسى تەاتردىڭ تاعى ءبىر ونەرپازى ءنۇرالى وڭالبەك «ەپيزودتاعى ۇزدىك ەر ادام ءرولى» جانە «شابىت» تەاترىنىڭ اكتەرى گۇلبيبى سەيداليەۆا «ەپيزودتاعى ۇزدىك ايەل ادام ءرولى» اتالىمدارىمەن ماراپاتتالدى.

جۇلدە الىپ، جۇزدەرى بال-بۇل جانعان ونەرلى ستۋدەنتتەردى سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ رەكتورى مۇحتار تولەگەن قۇتتىقتادى. «جاستار جىلى اياسىندا تالانتتى جاستاردى قولداۋ، قاناتتاندىرۋ ءارى ءار ءوڭىردىڭ ستۋدەنتتەرىنىڭ دوستىق قارىم-قاتىناستارىن نىعايتۋ ماقساتىندا وسى شارانى ۇيىمداستىردىق. سىزدەردىڭ تەك ءبىلىم-عىلىممەن شەكتەلمەي، مادەنيەتتى كوتەرۋگە ۇلەس قوسىپ جاتقاندارىڭىز قۋانتادى. ساباقپەن بىرگە ونەردى قوسا الىپ جۇرگەندەرىڭىزگە العىس بىلدىرەمىز. شقمۋ – شىعىستاعى 65 جىلدىق تاريحى بار ىرگەلى ۋنيۆەرسيتەت. ءبىز ونەرلى، تالانتتى، تالاپتى جاستاردى اركەز قولداۋعا دايىنبىز»، - دەدى مۇحتار ادىلبەك ۇلى. 

ستۋدەنتتەردىڭ ونەرىنە باعا بەرگەن قازىلار القاسىنىڭ توراعاسى، وسكەمەندەگى وبلىستىق دراما تەاتردىڭ كوركەمدىك جەتەكشىسى ساحان اكەلەەۆ فەستيۆالدىڭ ءوتۋ دەڭگەيىنە قاتىستى ءوز پىكىرىن ءبىلدىردى. «تەاتردىڭ ستۋدەنتتەرىنىڭ تاڭداعان تاقىرىبى، اكتەرلىك شەبەرلىكتەرى، رەجيسسەرلىك شەشىمدەرى جوعارى دەڭگەيدە بولعاندىقتان باس جۇلدەنى ءبىراۋىزدان «ساكەن» قويىلىمىنا بەردىك. «قاي زامان» قويىلىمى كرەاتيۆتى كورىنگەنىمەن، ۋاقىتى تىم قىسقا ءارى اياق جاعى تۇسىنىكسىز بولعاندىقتان جۇلدەگە ىلىگە المادى. ايتپەسە سۇبەلى ورىنداردىڭ بىرىنە لايىق قويىلىم ەدى. تالدىقورعاندىق ستۋدەنتتەر قويعان «جان داۋا» قويىلىمىندا بۇگىنگى كۇننىڭ وزەكتى ماسەلەلەرىنىڭ ءبىرى - ناشاقورلىق تاقىرىبى قاۋزالىپتى. «شاتىر استىنداعى مەن» قويىلىمى دا قازىرگى كەزەڭنىڭ تۇيتكىلدى ماسەلەلەرىن كوتەرۋمەن ەرەكشەلەندى. وسكەمەندىك «شابىت» تەاترى دا فەستيۆالگە ايرىقشا دايىندىقپەن كەلىپتى. «ماحاببات مۇڭى» قويىلىمىنىڭ رەجيسسەرلىك شەشىمى وزگەشە بولدى. ساحناداعى قولشاتىردىڭ ويناپ كەتۋى، ورىندىقتاردىڭ بىرنەشە رەڭككە ەنۋى، بولمەگە، كەڭسەگە، ەسىكتىڭ بوساعاسىنا اينالۋى، ادامنىڭ جان دۇنيەسىن شاتىرلاردى اينالدىرۋ ارقىلى بەرۋى وتە اسەرلى شىقتى. اكتەرلىك انسامبل بار. ءبىر سوزبەن ايتقاندا، كاسىبي تەاترلارمەن تەرەزەسى تەڭ بولماسا دا ولارمەن تالاسقا تۇسەتىندەي قارىم-قابىلەتكە يە، وزىندىك بەت-بەينەسى بار ونەر شاڭىراقتارىنىڭ قالىپتاسىپ كەلە جاتقانىن كوردىك. سوعان قۋاندىق. ارينە، قيىن تاقىرىپتى الىپ، ونى يگەرە الماعان تەاترلار دا بولدى. «تيسە تەرەككە، تيمەسە بۇتاققا» دەگەندەي، ەشقانداي ايتار ويى جوق، جاۋاپكەرشىلىك جۇگىن تولىق سەزىنبەگەن تەاترلاردى دا كوردىك. كەمشىلىكتەرىن جەتەكشىلەرىنە ەسكەرتتىك»، - دەيدى س.اكەلەەۆ.

سوڭعى جاڭالىقتار

Atmaca زىمىرانى سىناقتان ءساتتى ءوتتى

تەحنولوگيا • بۇگىن، 18:35

دوللار قايتادان قىمباتتادى

قارجى • بۇگىن، 15:00

ۇقساس جاڭالىقتار