حالىقارالىق سۋ سپورتى تۇرلەرى فەدەراتسياسى (FINA) اقپان ايىندا جاڭا ءتۋرنيردىڭ تانىستىرىلىمىن ۇسىنعان بولاتىن. جارىسقا كەز-كەلگەن سپورتشى قاتىسا المايدى. تەك ۇيىمداستىرۋشىلاردىڭ شاقىرتۋىن العان ۇزدىكتەر عانا باق سىنايدى. ياعني, جۇزدەن جۇيرىك, مىڭنان تۇلپار شىققان مىقتىلار عانا ءوزارا كىم مىقتىنى انىقتاماق.
الەمدىك تۋرنير قاتىسۋشىلارىنىڭ اراسىندا وليمپيادا چەمپيوندارى, الەم بىرىنشىلىگىنىڭ جەڭىمپازدارى, رەكوردشىلار مەن FINA رەيتينگىسىنىڭ بىلتىرعى كوشباسشىلارى بار. ەليتالى توپ قاتارىنا 2016 جىلعى ريو وليمپياداسىنىڭ چەمپيونى دميتري بالاندين دە كىردى.
«قازىرگى تاڭدا FINA ۇيىمداستىرۋىمەن قىتاي, ۆەنگريا جانە اقش-تا وتەتىن ءۇش جارىسقا دايىندىق ۇستىندەمىن. بۇل ءجۇزۋ سپورتىنداعى جاڭا تۋرنير, جاڭا فورمات. سوندىقتان, مۇنداي ايتۋلى دودادا قازاقستان اتىنان سىنعا ءتۇسۋ مەن ءۇشىن ۇلكەن مارتەبە. جاڭا ماۋسىمعا دەگەن دايىندىعىم ويداعىداي. بيىل وتەتىن جارىستار تىزبەگى دە مول. مىقتىلار اراسىندا سىنعا ءتۇسىپ, جىلدىڭ ەڭ ماڭىزدى باسەكەلەرىنە دايىندىعىمدى شىڭدايمىن», - دەيدى بالاندين.
الەمدىك فەدەراتسيا ۇسىنعان تۋرنير فورماتى وليمپيادالىق سىننان وزگەشە. ناقتىلاپ ايتاتىن بولساق, ءاربىر قاشىقتىقتا سپورتشىلار ءبىر رەت ءجۇزۋ مۇمكىندىگىن الادى. جەڭىسكە بار بولعانى ءتورت سپورتشى عانا ۇمىتكەر بولماق. جارىستا سپورتشىلار 14 قاشىقتىق بويىنشا باق سىنايدى.
بۇگىندە الەمدەگى 109 سپورتشى Champions Swim Series دوداسىنا قاتىسۋعا كەلىسىم بەردى. دميتري بالاندين ءوزى وليمپيادا چەمپيونى اتانعان 200 مەترگە براسس ادىسىمەن جۇزۋدەن سىنعا تۇسەدى. ونىڭ قارسىلاستارى قاتارىندا وليمپيادانىڭ قولا جۇلدەگەرى, رەسەيلىك انتون چۋپكوۆ, 2017 جىلعى الەم چەمپيوناتىنىڭ قولا جۇلدەگەرى ءارى وسى قاشىقتىقتاعى رەكورد يەسى, جاپونيالىق يپپەي ۆاتانابە جانە قىسقا قاشىقتىقتا 2018 جىلعى الەم چەمپيوناتىنىڭ كۇمىس جۇلدەگەرى اتانعان قىتايلىق تسين حايان بار.
جارىس ءۇش كەزەڭنەن تۇرادى. العاشقى باسەكە 27 ءساۋىر كۇنى قىتايدىڭ گۋانچجوۋ قالاسىندا وتپەكشى. تۋرنيردە 2019 جىلى وتەتىن الەم چەمپيوناتى مەن 2020 جىلعى وليمپيادا ويىندارىنا قاتىسۋ مۇمكىندىگىن بەرەتىن ليتسەنزيا ويناتىلادى.
ءتۋرنيردىڭ ەكىنشى كەزەڭى 11-12 مامىر كۇندەرى بۋداپەشتتە, سوڭعى كەزەڭى 31 مامىر مەن 1 ماۋسىم ارالىعىندا يندياناپوليستە ۇيىمداستىرىلادى.
جەڭىسكە جەتكەن سپورتشى 10 مىڭ, كۇمىس جۇلدەگەر 8 مىڭ, قولا جۇلدەگەرى 6 مىڭ دوللار كولەمىندە سىياقى الادى.
