ءوزىنىڭ تاريح بەتتەرىن 6 جىل بويى جازىپ كەلە جاتقان جاس تەاتر ءۇشىن بۇل وتە ماڭىزدى وقيعا. ەندى كامەرالىق زال رەپەرتۋارى ودان سايىن تۇرلەنە ءتۇستى. «PICCOLO» كامەرالىق تەاترى – ستۋدەنتتەر, تۇلەكتەر, جاس ۆوكاليستەردىڭ تانىلعان وپەرا انشىلەرىمەن بىرگە ءوز شەبەرلىكتەرىن ارتتىرۋعا ارنالعان شىعارماشىلىق زەرتحاناسى ىسپەتتى.
زالدا ينە شانشىر جەر جوق. جايلى كامەرالىق اتموسفەرادا, سوفيت جارىعىمەن قىزىقتى وقيعا ورىن الا باستادى. سيۋجەت بويىنشا, دورمونتتىڭ (رامزات بالاكيشيەۆ, رۋسلان سوۆەت) قامقورلىعىندا تاربيەلەنۋشى دجۋليا (جاننات باقتاي, سالتانات احمەتوۆا) دورۆيلمەن (جان تاپين, دامير سادۋاقاسوۆ) قۇپيا تۇردە نەكەلەسكەن, ال ول ءار ءتۇنى جىبەك ساتىمەن ايەلىنىڭ بولمەسىنە كوتەرىلەدى. دورمونت بولسا, ءوزىنىڭ تاربيەلەنۋشىسىن بلانزاككا (ەۆگەني چاينيكوۆ) تۇرمىسقا بەرگىسى كەلەدى, ال وعان دجۋليانىڭ بولەسى ليۋچيللا (سالتانات مۇراتبەكوۆا, ماليكا مينيزيني) عاشىق. اقكوڭىل قىزمەتشى دجەرمانو (سۇندەت بايعوجين) دجۋليانىڭ تۇندە كۇيەۋىن كۇتەتىنىن ەستىپ ءارى ونى بلانزاك دەپ ويلايدى دا, وعان جىبەك ساتى تۇسىرىلەتىنىن حابارلايدى...
كەيىپكەرلەر قايتا-قايتا كۇلدىرگى جايتتارعا تاپ بولا بەردى, بۇعان تاماشا اسەر ەتكەن كورەرمەن كۇلكىسىن جاسىرا الماي, دۋ قول شاپالاقپەن ءۇن قاتىپ وتىردى. دارىندى جاس ۆوكاليستەر مەن وپەرا ساحناسىنىڭ سۇرانىسقا يە شەبەرلەرى ءوز پارتيالارىنىڭ نازىك ۆوكالدىق رەڭكتەرىن بەرىپ قانا قويماي, بۇل قويىلىم فارس بولعاندىقتان, ءبىر مەزەتتە ءتۇرلى ەموتسيالارىن ىم-يشارامەن, ويناقى كوزقاراسپەن ءبىلدىردى.
جاننات باقتاي مەن سالتانات احمەتوۆا ءوز مىنەز-ق ۇلىقتارى, ومىرلىك تاجىريبەلەرى ارقىلى ارقايسىسى وزدىگىنشە باس كەيىپكەردىڭ بەينەسىن سومداعان. پرەمەرانىڭ ءار كۇنىندە قوس ءارتىس روسسينيلىك ءستيلدى, اكتەرلىك شەبەرلىكتى تاماشا مەڭگەرگەندەرىن كورسەتتى, ولار جەلپۋىشتى ەپتى پايدالانىپ, ساحنادا كەربەز قوزعالدى. جان تاپين مەن دامير سادۋاقاسوۆ وسى قويىلىمدا كوڭىلدەس كەيىپكەردىڭ بەينەسىن ءساتتى سومداپ شىقتى. تەنورلاردىڭ ۇندەرى جوعارى دەڭگەيدە بولدى. باريتوندار سۇندەت بايعوجين جانە ەۆگەني چاينيكوۆ تە بيىكتەن كورىندى. وسى ەكى ءارتىستىڭ شەبەرلىگىن قوس پرەمەرالىق كۇن بويى راحاتتانىپ تىڭداۋعا مۇمكىندىك تۋىندادى. سۇندەت بايعوجين ۇلكەن اكتەرلىك دارىنىن كورسەتتى, ونىڭ ويىنى ەرەكشە تارتىمدى بولدى. ەۆگەني چاينيكوۆ كوڭىلدەس كەيىپكەردىڭ بەينەسىن ءارى كۇلدىرگى, ءارى اسەرلى ەتىپ جاسادى. دورمونت پارتياسىنداعى رامزات بالاكيشيەۆ پەن رۋسلان سوۆەتكە بارلىق جاعىنان وڭاي بولعانى بايقالدى, ەكەۋى دە ءوز بەينەلەرىن جاقسى اشا الدى. تاماشا مەتستسو-سوپرانو يەلەرى انشىلەر سالتانات مۇراتبەكوۆا مەن ماليكا مينيزيني بەلكانتو تەحنيكاسىن وتە جاقسى يگەرگەندەرىن كورسەتە وتىرىپ, ليۋچيللا پارتياسىن ورىندادى.
ساحنانىڭ كەرەمەت جيھازدارىن ستسەنوگراف ءارى كوستيۋمدەر بويىنشا سۋرەتشى مانانا گۋنيا (يتاليا) جاساعان, ول كوستيۋمدەر مەن دەكوراتسيالاردى ۆەنەتسيالىق كارناۆال ستيلىندە, دالىرەك ايتقاندا, كەيىپكەرلەرى كاپيتان فراكاسس, دوكتور چۋما, ارلەكين جانە ت.ب. بولعان كومەديا دەل ارتە نەگىزىندە ورىنداعان. ارتىستەر وسى كيىم ۇلگىلەرىندە ەرەكشە كورىندى, مۇنداي كوزدىڭ جاۋىن الاتىن الۋان ءتۇستى ەكزوتيكا ازىرشە سالقىن بولىپ تۇرعان ەلوردامىزدىڭ كورەرمەندەرى تاراپىنان قىزىعۋشىلىقپەن ءارى تاڭدانىسپەن قابىلداندى. دەكوراتسيالار, كوستيۋمدەر جانە بەينەپروەكتسيالار XVIII عاسىر ورتاسىنداعى ىستىق يتاليا ەلىنە جەتەلەدى.
وسى وپەراداعى مۋزىكا ماتىنمەن تىعىز بايلانىستا بولدى. قويۋشى ديريجەر ابزال مۇحيتدينوۆ جەتەكشىلىك ەتكەن وركەستر مۋزىكانتتارى اسقان شەبەرلىكپەن ونەر كورسەتتى, وركەستر قۇرامى وركەستر شۇڭقىرىندا ەمەس, تىڭدارماندارعا ەتەنە جاقىن بولۋى ءۇشىن زالدا ورنالاسقاندىقتان, كورەرمەندەر وزدەرىن قويىلىمنىڭ قاتىسۋشىسى رەتىندە سەزىنە الدى.
پرەمەرا جاستار جىلى اياسىندا قر مادەنيەت جانە سپورت مينيسترلىگىنىڭ قولداۋىمەن ۇلكەن جەتىستىكپەن ءوتتى. تىڭدارماندار ارتىستەرگە ىستىق ىقىلاستارىن ءبىلدىرىپ, ۇزاعىنان قول سوعىپ, قوشەمەت كورسەتتى. وسىلايشا, «PICCOLO» كامەرالىق تەاترى شىعارماشىلىق جوباسى اسقاق ونەردى باعالاۋشىلاردىڭ, سونداي-اق جەتەكشى باق-تىڭ وڭ پىكىرىن الدى, دەمەك, بۇل – ونى ۇزاق تا باقىتتى ساحنالىق عۇمىر كۇتەدى دەگەن ءسوز.
