جيەن اعام جاقسى حابار جەتكىزگەن. الپەشتەپ باققان جالعىز قىزىن ۇزاتپاق. وسى قازاقتىڭ «وتىرعان قىزىن ورنىن تابار» دەگەن ءسوزى ىپ-راس. قارىنداسىمىز جوعارى وقۋ ورنىن ءبىتىرىپ, وبلىس ورتالىعىنداعى دوكەي ءبىر مەكەمەدە جۇمىس ىستەپ جۇرگەن. جيەن اعامنىڭ ايتۋىنا قاراعاندا, جۇمىسى بالانىڭ كوڭىلىنەن شىعادى, جالاقىسى تولىمدى. تەك ۋاقىتتىڭ ءوتىپ بارا جاتقانى جانىنا باتىپ جۇرگەن. جات جۇرتتىق پەرزەنتتىڭ ورنىن تاپقانى كەز كەلگەن اتا-انا ءۇشىن ارمان ەمەس پە؟
اق تۇيەنىڭ قارنى جارىلعان قۋانىشقا ءبىز دە قۋاندىق. ورنىن تاپقاندا قانداي, وت جاعاتىن جەرى كۇللى كوكشەتاۋعا بەلگىلى وتباسى. ارينە, بايلىعىمەن. قايىن ەنەسى كەشەگى كەڭەس زامانىندا ساۋدا سالاسىندا ىستەگەن. ءتورت ۇلى قازىرگى كۇنى كاسىپكەرلىكتىڭ كورىگىن قىزدىرىپ-اق تۇر. كادىمگى قازاقتىڭ جالپاق تىلىمەن ايتقاندا, ءيتىنىڭ باسىنا ىركىت توگىلگەن اۋلەت. ءبىزدىڭ قىز ۇلدە مەن بۇلدەگە ورانىپ شىعا كەلمەك, تەك ەكى جاس جاراسىپ كەتسە بولعانى. جاراتقان يەدەن ودان ارتىق نە تىلەرسىڭ.
بەلگىلەنگەن كۇنى بارىمىزدى كيىپ, بايلاۋىشىمىزدى بايلاپ باردىق. ەپتەپ كەۋدە كوتەرىڭكى. تەرەزەمىز تەڭ كەلىپ جاتپاسا دا قۇدامىز عوي. شىعار الدىندا جيەن جەڭگەمىز قىزىنىڭ جاساۋىن كورسەتكەن. ەركەك كىندىكتىلەر تەمەكى تارتىپ, جاياۋ اڭگىمەنى جەلدىرىپ تۇرعانىمەن, كوزدەرىنىڭ قيىعى قىز جاساۋىندا. جالعىز قىزدان نەسىن اياسىن, جانىن سالىپتى. جيھاز اتاۋلىنىڭ ءبارى ءبىر دەڭگەيدە عوي, جالعىز ەرەكشەلىگى تەكەمەت ەكەن. قوشقارمۇيىز ويۋ سالعان, جيەكتەرى قىزعىلتىم تۇسپەن بوياعان, بۇل كۇندە قالالىقتاردىڭ كوزىنەن تاسا بولعان تەكەمەت. جيەن جەڭگەم ءتۇسىندىرىپ ايتىپ جاتىر, اجەسى مارقۇم وسى بالا ومىرگە كەلگەندە, وسىدان وتىز جىل بۇرىن ادەيىلەپ باستىرىپ ەدى. امانات ەتكەن.
– اماناتقا قيانات جاسامايىن دەپ اپارا جاتىرمىن, – دەپ قويادى قۋانىشتان ءوڭى بال-بۇل جانعان جەڭگەم, – ايتپەسە, قازىرگى جاستار تەكەمەتتىڭ قادىرىن قايدان ءبىلسىن؟! ارابتىڭ, پارسىنىڭ, بەرى قويعاندا قىتايدىڭ جىبەك كىلەمدەرى تەكەمەتتى توردەن ىعىستىرىپ, بوساعاعا شىعارىپ تاستادى عوي. اجەسىنىڭ كوزىندەي كورىپ ۇستاسا ەكەن قاراعىم.
توسىرقاپ قالعان با, تويشىل قاۋىم تەكەمەتكە ەلەڭ ەتكەن جوق. ءسۇت ءپىسىرىم ۋاقىتتا بولاشاق قۇدالاردىڭ بوساعاسىن اتتادىق. اماندىق-ساۋلىقتان سوڭ كولىككە تيەپ اكەلگەن جۇك ءتۇسىرىلدى. ايەلدەر جاعى جاڭا عانا ۇيدەن الىپ شىققان قىز جاساۋىن كورسەتىپ, كورىمدىكتەرىن الىپ جاتىر. كەزەك تەكەمەتكە كەلگەن. وتىز جىلدان بەرى بۇكتەتىلىپ جاتقان سوڭ بوياۋى ءوڭىپ كەتپەسە دە, سانىنە سەلكەۋ تۇسكەن ەكەن. ءوزى دە اۋىلدان شىقسا دا, تەكەمەتتى تۇڭعىش كورىپ تۇرعانداي تاڭدانعان باي قۇداعي جىلتىراعان ادەمى ءتۋفليىنىڭ ۇشىمەن تەۋىپ كورىپ, «بۇل نە؟!» دەپ سۇرادى. جيەن جەڭگەم ءتۇسىندىرىپ جاتىر. اجەسىنىڭ اماناتى.
– قوراعا اپارىپ تاستاڭدار!–دەدى باي قۇداعي, – وسى تەكەمەتكە ۇيدە ورىن جوق شىعار.
ءبىزدىڭ كوڭىل سۋ سەپكەندەي باسىلدى. الاۋلاعان ادەمى سەزىم, امانات دەگەن قاستەرلى ۇعىم تەكەمەتپەن بىرگە قورانىڭ ىشىندە ەلەۋسىز قالىپ بارا جاتقانداي...
