ايدىن سماعۇلوۆ: دزيۋدودا الەم چەمپيوندارىنىڭ ءوزى وليمپيادادان سىرت قالۋى مۇمكىن

- ەكاتەرينبۋرگتە وتكەن Grand Slam تۋرنيرىنە قۇرامانىڭ ەكى ۇزدىك سپورتشىسىن اپارعان بولاتىنبىز. وكىنىشكە قاراي، ەلدوس سمەتوۆ (60 كەلى) جارىس الدىنداعى جاتتىعۋ كەزىندە يىعىن جاراقاتتاپ الدى دا، كوماندا دارىگەرى ونى تۋرنيرگە قاتىستىرماۋ تۋرالى شەشىم قابىلدادى. ويتكەنى، ەلدوس بۇيىرسا وليمپياداعا قاتىسىپ، ەل نامىسىن قورعايتىن سپورتشى. سول سەبەپتى، ونىڭ دەنساۋلىعى ماڭىزدى. جاراقاتىن ودان ءارى ۋشىقتىرماۋدى ءجون كوردىك.

ال 90 كەلىدەگى يسلام بوزباەۆ بابىندا ەدى. تورەشىلەر وعان قاتارىنان ەسكەرتۋ بەرىپ، جارىستان شەتتەتى. ايتپەسە، قارسىلاسىن ۇتىپ جاتقان بولاتىن. 81 كەلىدەگى رۋسلان مۇساەۆ ەكاتەرينبۋرگكە كەشىگىپ جەتتى. ماروككودان تۇركياعا، ودان رەسەيگە جەتەمىن دەگەنشە جولدان شارشادى دا، تۋرنيرگە دايىن بولعان جوق. رۋسلان دا جۇلدەگە ىلىگەدى دەپ بولجاعان ەدىك. 

60 كەلىدەگى عۇسمان قىرعىزباەۆ جاپون بالۋانىنان ۇتىلدى. نەگىزى، تورەشىلەر جاپوندىققا ەسكەرتۋ بەرۋى قاجەت ەدى. 100 كەلىدەگى ۆيكتور دەميانەنكونىڭ كۇرەسى سوڭعى كەزدە كوڭىل كونشىتپەي ءجۇر. ول قارسىلاستارىنا ەسە جىبەرۋدە. شىنى كەرك، كوپ جاعدايدا شاماسى جەتپەي قالادى. 

تبيليسيدەگى گران-پري تۋرنيرىنە ءبىز ۇلتتىق قۇرامانىڭ ءتورتىنشى-بەسىنشى ءنومىرلى سپورتشىلارىن جىبەردىك. مۇنداعى ماقسات – جاس سپورتشىلاردى ءىرى باسەكەلەردە شىڭداي ءتۇسۋ. گرۋزياعا اتتانعان دزيۋدوشىلاردىڭ ىشىندەگى ەڭ تاجىريبەلىسى رۋستام يبراەۆ بولاتىن. رۋستام 2015 جىلى وتكەن الەم چەمپيوناتىنىڭ كۇمىس جۇلدەگەرى، ءىرى حالىقارالىق تۋرنيرلەردىڭ جەڭىمپازى. الايدا، ول دا ەكىنشى اينالىمدا وزبەكستاندىق لۋفتيللاەۆتان جەڭىلىپ قالدى.

جالپى، تبيليسي تاتاميىندە كۇرەسكەن جاس بالۋانداردىڭ بارلىعى دا بولاشاقتا ۇلتتىق قۇرامانىڭ كوشباسشىسى بولۋعا لايىق سپورتشىلار. ارينە، 2020 جىلعى وليمپياداعا ولاردىڭ قاتىسا المايتىنى انىق. بىراق 2024 جىلعى تورتجىلدىق دوداسىنا دەيىن ابدەن شىڭدالىپ، وزدەرىن كورسەتەدى دەپ سەنىممەن ايتا الامىن. 

بۇگىن تۇركيانىڭ انتاليا قالاسىندا كەزەكتى گران-پري باسەكەسى باستالادى. بۇل سىنعا جىگىتتەردى ەلدوس سمەتوۆ باستاپ كەتتى. بۇيىرسا، جۇلدەلى ورىنداردان ءۇمىتتىمىز. 

بيىلعى جىلداعى تاعى ءبىر ماڭىزدى تۋرنيرلەردىڭ  ءبىرى – بىرىككەن اراب امىرلىكتەرىنىڭ فۋدجەيرا قالاسىندا وتەتىن ازيا چەمپيوناتى. 

قۇرلىق بىرىنشىلىگى قاشاندا تارتىسقا تولى وتەدى. سوندىقتان ۇلكەن ماقسات قويىپ وتىرمىز. ازيا چەمپيوناتىنا دايىندىق كەزەڭىن 7-18 ءساۋىر ارالىعىنداعى الماتى قالاسى جانىنداعى «بايتەرەك» سپورت بازاسىندا وتكىزەمىز. 

قۇرلىق دوداسىندا 60 كەلىدە عۇسمان قىرعىزباەۆ، 66 كەلىدە ەرلان سەرىكجانوۆ پەن ەلدوس جۇماحانوۆ، 73 كەلىدە بىلتىر ەل چەمپيونى اتانعان جاس دزيۋدوشى سەرىك اقىلبەك، 81 كەلىدە ديدار حامزا مەن رۋسلان مۇساەۆ، 90 كەلىدە يسلام بوزباەۆ، 100 كەلىدە ايبەك سەرىكباەۆ، اسا اۋىر سالماقتا ەراسىل قاجىباەۆ كۇرەسەدى. 

وزدەرىڭىز بايقاعان شىعارسىزدار، كوماندا ۇزدىگى ەلدوس سمەتوۆ پەن 73 كەلىدەگى جانساي سماعۇلوۆتى بۇل جارىستان بوساتتىق. وعان سەبەپ بىرەۋ. ەكى بالۋان دا الەم چەمپيوناتىنا ماقساتتى تۇردە دايىندىقتى باستايدى. مامىر ايىندا قىتايدىڭ حوحوت قالاسىندا وتەتىن تۋرنيردەن باستاپ وليمپيادا ويىندارىنا 100 پايىز ۇپاي بەرىلەدى. وسىعان دەيىن سپورتشىلار تەك 50 پايىز ۇپايعا يەلىك ەتىپ كەلگەن. ەندى رەيتينگىلىك ۇپاي سانى كوبەيتىلدى.

دەمەك، دزيۋدوشىلارىمىز ءۇشىن جان الىسىپ، جان بەرىسەتىن كەزەڭ باستالادى. ءبىزدىڭ سپورتتا الەم چەمپيونى بولىپ تۇرىپ، رەيتينگىلىك تۋرنيرگە قاتىسپاساڭ، وليمپياداعا بارۋ-بارماۋىڭ ەكىتالاي. سول سەبەپتى، مامىردان باستاپ قۇراما سپورتشىلارىنىڭ بارلىعىندا جاۋاپكەرشىلىك جۇگى ارتادى، - دەيدى باس باپكەر ايدىن سماعۇلوۆ. 

ەسكە سالا كەتەيىك، بۇگىن تۇركيانىڭ انتاليا قالاسىندا دزيۋدودان كەزەكتى گران-پري ءتۋرنيرى باستالادى.