ايماقتار • 04 ءساۋىر، 2019

دارىگەرلەر تۇرمىستىق حيميانىڭ بالالار دەنساۋلىعىنا قانشالىقتى قاۋىپتى ەكەندىگىن ايتتى

قالالىق №2 بالالار اۋرۋحاناسىندا بالالاردى تۇرمىستىق حيميالىق زاتتاردان قورعاۋ تاقىرىبىنا ارنالعان بريفينگ-كونفەرەنتسيا ءوتتى دەپ حابارلايدى ەلوردا اكىمدىگىنىڭ رەسمي سايتى.

اقمارال اعزامقىزى

دارىگەرلەر اۋىز قۋىسىنىڭ، وڭەش، اسقازاننىڭ كۇيۋىنە سوقتىرۋى مۇمكىن تۇرمىستىق حيميا قۇرالدارىنىڭ قاۋىپتىلىگى تۋرالى ايتتى. مۇنداي وقيعالار اتا-انانىڭ بالالار ءۇشىن قولجەتىمدى جەردە ءتۇرلى ءتۇستى ءاتىر، باسقا دا قۇرالداردىڭ قۇتىلارىن قالدىرىپ كەتۋىنەن ورىن الىپ جاتادى.

«ءبىزدىڭ ايتىپ وتىرعانىمىز: وسىنداي كۇيىكپەن اۋرۋحاناعا تۇسەتىن بالالاردى ەمدەيتىن دارىگەرلەردىڭ جان ايقايى. بالالار وتە اۋىر حالدە تۇسەدى، كوبى جاڭساقتاۋ بولىمىندە جاتىپ شىعادى. ودان كەيىن ول بالانىڭ دەنساۋلىعىنىڭ نىعايۋى ءۇشىن كۇرەسۋ كەرەك. وعان كوپتەگەن جىلدار كەتەدى. ال بالا تولىق ساۋىعىپ كەتە مە؟ ونى ايتۋ قيىن. ول حيميانىڭ ورگانيزمگە قالاي اسەر ەتكەنىنە بايلانىستى. مىسالى، حيميالىق كۇي شالعان 100 بالانىڭ 50 مۇگەدەك بولىپ قالادى. كەي كەزدە ونىڭ زاردابى قانشا جىل ەمدەلسە دە، قايتپايدى، ءتىپتى بولماعان سوڭ، وڭەشتى اۋىستىرۋ كەرەك بولادى. ودان كەيىندە جاقسى بولىپ كەتەدى دەپ ايتا المايمىز»، – دەيدى «استانا مەديتسينا ۋنيۆەرسيتەتى» كەاق-نىڭ بالالار حيرۋرگياسى كافەدراسىنىڭ مەديتسينا عىلىمدارىنىڭ كانديداتى ساۋلە سۇلەيمانوۆا.

ۇيىمداستىرۋشىلار بريفينگتى وتكىزۋگە №2 بالالار اۋرۋحاناسىنا تۇرمىستىق حيميادان زارداپ شەگىپ تۇسەتىن بالالار سانىنىڭ ارتۋى سەبەپ بولعاندىعىن ايتتى. اسىرەسە، اۋىز قۋىسى جانە وڭەشتىڭ حيميالىق كۇيىگى جيىلەپ كەتكەن. 2018 جىلى №2 بالالار اۋرۋحاناسىنا اۋىز قۋىسى جانە وڭەشتىڭ حيميالىق كۇيىگى دياگنوزىمەن 69 بالا جاتقىزىلدى.

ال 2017 جىلى 71 بالا، 2018 جىلدىڭ ءبىرىنشى توقسانىندا وسىنداي دياگنوزبەن 11 بالا تۇسسە، 2019 جىلدىڭ وسى كەزەنىندە 22 بالا اۋرۋحاناعا جاتقىزىلعان.