تاراپتار تۇڭعىش پرەزيدەنت قورى مەن الەمدىك ەكونوميكا جانە ساياسات ينستيتۋتى, سونداي-اق Korea Foundation ۇكىمەتتىك ەمەس ۇيىمىمەن بىرلەسە «كورەي تۇبەگىن دەنۋكلەاريزاتسيالاۋ. جاھاندىق ماسەلەلەردى شەشۋدەگى قازاقستاننىڭ انتيادرولىق تاجىريبەسى» تاقىرىبىندا جۋىردا وتكىزگەن حالىقارالىق دوڭگەلەك ۇستەل بويىنشا ءوز ويلارىمەن ءبولىستى.
«ءبىزدى كورەيانىڭ ءبىلىم بەرۋ, دەنساۋلىق ساقتاۋ سالالارىنا قاتىستى يننوۆاتسيالار مەن جاڭا تەحنولوگيالارى قىزىقتىرادى. قورلارىمىزدىڭ اراسىنداعى ناتيجەلى قارىم-قاتىناس دارىندى جاستاردى قولداۋعا جانە ادام كاپيتالىن دامىتۋعا باعىتتالعان جۇمىستى جەتىلدىرۋگە كومەكتەسەدى», - دەدى اسەت يسەكەشەۆ.
ءوز كەزەگىندە لي سي حەن: «سىزدەردىڭ قورلارىڭىزدىڭ جۇمىس باعىتتارى, سونىمەن قاتار ەلدىڭ جالپى قارۋسىزدانۋ مەن يادرولىق قاۋىپسىزدىك يدەياسىن تاراتۋداعى جۇمىسى قىزۋعىشىلىق تۋدىرادى», - دەگەن ويىن ءبىلدىردى.
قوس تاراپ باسشىلارى مەموراندۋمدا كورسەتىلگەن بىرلەسكەن جوبالاردى تالقىلاپ, ولاردى ىسكە اسىرۋعا دايىن ەكەندەرىن جەتكىزدى.
2018 جىلدىڭ تامىز ايىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ قورى مەن Korea Foundation كەلىسىمگە كەلگەن ەدى. مەموراندۋم ادام كاپيتالىن دامىتۋ ءۇشىن بىرلەسە جۇمىس ىستەۋدى كوزدەيدى, سونىمەن قاتار يننوۆاتسيا, جاڭا تەحنولوگيالار, اقىلدى ەكونوميكا مەن الەۋمەتتىك دامۋ سالاسىنداعى كورەي ينستيتۋتتارىمەن جانە كومپانيالارىمەن سەرىكتەستىك ورناتۋ ماقساتىندا جاسالعان.
كەزدەسۋ سوڭىندا ەلوردا قوناقتارىنا نازارباەۆ ورتالىعى تانىستىرىلدى.
