بىرىڭعاي جيناقتاۋشى زەينەتاقى قورى تۇرعىندار اراسىندا اقپارات بەرۋ-ءتۇسىندىرۋ جۇمىستارىن جالعاستىرىپ كەلەدى. وسى جۇمىستار اياسىندا سالىمشىلار مەن الۋشىلارعا زەينەتاقى جۇيەسىنە قاتىستى ماڭىزدى سۇراقتار بويىنشا تۇراقتى تۇردە اقپارات بەرىلىپ جاتىر. اتالمىش شارانىڭ تاقىرىبى – زەينەتاقى زاڭناماسىنا ەنگىزىلگەن وزگەرىستەر.
«زەينەتاقى جۇيەسىن جاڭعىرتۋداعى باستى ماقسات – زەينەتاقى تولەمدەرىنىڭ تيىمدىلىگىن ارتتىرۋ. ازاماتتىق-قۇقىقتىق سيپاتتاعى شارتتار بويىنشا جۇمىستار مەن قىزمەتتەر اتقاراتىن جەكە تۇلعالاردىڭ مىندەتتى زەينەتاقى جارنالارىن تولەۋ ءراسىمىن وڭايلاتۋ ماقساتىندا زەينەتاقى زاڭناماسىنا مىناداي وزگەرىستەر ەنگىزىلدى: ەگەر ازاماتتىق-قۇقىقتىق سيپاتتاعى شارتتاردىڭ ءبىر تارابى سالىق اگەنتى بولسا, جەكە تۇلعالارعا, ولاردىڭ ىشىندە فريلانسەرلەرگە بەرىلەتىن تابىستان مىندەتتى زەينەتاقى جارنالارىن وسى سالىق اگەنتى تولەيتىن بولادى; ەگەر ازاماتتىق-قۇقىقتىق سيپاتتاعى شارت جەكە تۇلعامەن جاسالعان بولسا, مىندەتتى زەينەتاقى جارنالارىن تولەۋ – فريلانسەردىڭ مىندەتى ەمەس, قۇقىعى بولىپ تابىلادى; ەگەر جەكە تۇلعا جالدامالى جۇمىسشى بولسا جانە ازاماتتىق-قۇقىقتىق سيپاتتاعى شارتتى سالىق اگەنتى بولىپ تابىلمايتىن جەكە تۇلعامەن جاساسا, وندا وسى شارت بويىنشا مىندەتتى زەينەتاقى جارنالارىن تولەۋ – ونىڭ مىندەتى بولىپ ەسەپتەلمەيدى», – دەلىنگەن قوردىڭ ءباسپاسوز قىزمەتى تاراتقان حابارلامادا.
بۇل رەتتە جارنالاردى ەسەپتەۋ ءۇشىن الىناتىن ەڭ جوعارى جيىنتىق جىلدىق تابىس رەسپۋبليكالىق بيۋدجەت تۋرالى زاڭمەن ءتيىستى قارجى جىلىنا بەلگىلەنگەن ەڭ تومەنگى جالاقىنىڭ 50 ەسەلەنگەن مولشەرىنىڭ 12 ەسەلەنگەن سوماسىنان اسپاۋى ءتيىس. بيىل ەنگىزىلگەن وزگەرىستەردىڭ ءبىرى – جەكە زەينەتاقى شوتتارىنىڭ اۆتوماتتى تۇردە اشىلۋى. دالىرەك ايتقاندا, 2019 جىلدىڭ 8 قاڭتارىنان باستاپ جەكە تۇلعاعا مىندەتتى زەينەتاقى جارنالارى بويىنشا شوت اشۋ ءۇشىن قورعا جۇگىنۋدىڭ قاجەتى جوق. جەكە تۇلعانىڭ قوردا مىندەتتى زەينەتاقى جارنالارىن ەسەپكە الۋ بويىنشا شوتى جوق بولسا, وندا العاشقى جارنا تۇسكەن ساتتە شوت اۆتوماتتى تۇردە اشىلادى.
2019 جىلدىڭ 1 قاڭتارىنان باستاپ ەلىمىزدە بىرىڭعاي جيىنتىق تولەم (بجت) ىسكە قوسىلدى. سول ارقىلى مەملەكەتتىك كىرىستەر ورگانىنا تولەنەتىن جەكە تابىس سالىعى, بجزق-عا تولەنەتىن مىندەتتى زەينەتاقى جارنالارى, مەملەكەتتىك الەۋمەتتىك ساقتاندىرۋ قورىنا تولەنەتىن الەۋمەتتىك اۋدارىم, مىندەتتى الەۋمەتتىك مەديتسينالىق ساقتاندىرۋ قورىنا تولەنەتىن الەۋمەتتىك جارنا سياق ءتورت تولەمدى قاتارىنان جۇزەگە اسىرۋعا بولادى. بۇدان بولەك, 2019 جىلدىڭ 25 قاڭتارىنان باستاپ جەكە زەينەتاقى شوتىنىڭ جاي-كۇيى تۋرالى اقپاراتتى ەلەكتروندىق ۇكىمەت پورتالى ارقىلى الۋ وڭاي بولا ءتۇستى. وسى كۇننەن باستاپ كەز كەلگەن سالىمشى (الۋشى) جەكە زەينەتاقى شوتىنان ءۇزىندى كوشىرمەنى تەك ەلەكتروندىق تسيفرلىق قولتاڭبا عانا ەمەس, ءبىر رەتتىك sms-ءپارولدىڭ كومەگىمەن دە الا الاتىن بولدى. بۇل ءۇشىن سالىمشى (الۋشى) ەلەكتروندىق ۇكىمەت پورتالىنىڭ جەكە كابينەتىندە تىركەلىپ, ءۇزىندى كوشىرمە الۋعا ساۋال جولدايدى. سودان كەيىن mGov موبيلدىك ازاماتتار بازاسىندا تىركەلگەن سالىمشىنىڭ (الۋشىنىڭ) ۇيالى تەلەفونىنا ءبىر رەتتىك sms-پارول جىبەرىلەدى.
2019 جىلدىڭ اقپانىندا «ە-نوتاريات» جۇيەسى مەن بجزق اقپاراتتىق جۇيەسىنىڭ ءوزارا ىقپالداستىعى جۇزەگە اسىرىلدى. ەندى نوتاريۋستار «ە-نوتاريات» بىرىڭعاي نوتاريالدىق اقپاراتتىق جۇيەسى ارقىلى وزدەرىنىڭ وندىرىسىندەگى مۇراگەرلىك ىستەر بويىنشا (مۇراگەرلەر ءوتىنىش بەرگەن جاعدايدا) قايتىس بولعان سالىمشىلاردىڭ (الۋشىلاردىڭ) قوردا جەكە زەينەتاقى شوتىنىڭ جانە وندا اقشانىڭ بولۋى تۋرالى بجزق-عا ونلاين تارتىبىندە (حات جۇزىندە ساۋالدار جولداماستان) ساۋالدار جولداي الادى.
قانداي دا ءبىر سەبەپتەرمەن اشىق ەسىك كۇنىنە كەلە الماعاندار زەينەتاقىمەن قامسىزداندىرۋ ماسەلەلەرى بويىنشا قوردىڭ www.enpf.kz سايتى ارقىلى باسقارما ءتورايىمىنىڭ بلوگىنا سۇراق قويۋعا, بايلانىس ورتالىعىنىڭ 1418 تەلەفون نومىرىنە قوڭىراۋ شالۋعا (قازاقستان بويىنشا قالالىق جانە ۇيالى تەلەفون ارقىلى حابارلاسۋ تەگىن) بولادى. سونىمەن قاتار سالىمشىلار مەن الۋشىلار ءوز وتىنىشتەرىن قوردىڭ الەۋمەتتىك جەلىلەردەگى نەگىزگى پاراقشالارى جانە WhatsApp ارناسى ارقىلى جولداي الادى.
