تۋمىسىنان ايرىقشا تالانتتى ساققۇلاق بي 15 جاسىندا داۋعا ارالاسىپ, ءادىل بيلىك ايتىپ, تورەلىك ەتكەن. سول زامانداعى قيساپسىز دۇنيەدەن, رۋحاني مول مۇرادان كەيىنگىگە قالعانى جۇقاناسى عانا. ءماسەلەن, ساققۇلاق ءبيدىڭ شوقانعا بەرگەن باتاسى, «اقىل», «ءتورت نارسەدەن قاشىق قىل», «بۇل دا ءبىر عالىمنىڭ ءبىرى ەدى-اۋ», «شىڭعىسقا كوڭىل ايتۋى», «عىلىم», «بايدالى بيگە ايتقانى», «مۇسانىڭ اجالىندا ايتقانى» ءتارىزدى ءماندى دە مايەكتى سوزدەرى ساقتالىپ قالعان. شەشەن سوزىندە تەرەڭ فيلوسوفيالىق وي, ءبىلىم, ومىرگە دەگەن قۇشتارلىق, ەلدىك پەن ەرلىكتى كوكسەۋ جاتىر.
ءوزىنىڭ ەل بىرلىگىن ساقتاۋ, كەيىنگى ۇرپاقتى عانا ەمەس, زامانداستارىن دا ادىلدىككە, ادالدىققا, ارلىلىققا تاربيەلەۋ باعىتىندا ايرىقشا ەڭبەك ەتكەن ساققۇلاق بي 1888 جىلى ومىردەن وزادى. شاڭىراعىندا جەتى ۇل دۇنيەگە كەلگەن. ولاردىڭ ىشىندە اكە جولىن قۋعانى نۇرالى مەن ەرالى ەسىمدى بالالارى.
سايىن ساحارا توسىندە ادىلدىك تۋىن جەلبىرەتكەن, قارا قىلدى قاق جارعان جارىقتىق ساققۇلاق ءبيدىڭ كەسەنەسى شيكى كىرپىشتەن سالىنعان, سەگىز قىرلى كۇمبەز پىشىندە. سەگىز بۇرىشتىڭ وڭتۇستىك باتىس جاعىندا تومەنگى ەكى قاتاردىڭ كىرپىشى ءسال-ءپال بۇزىلعان ەكەن, قالعان قابىرعالارى تۇتاس ساقتالعان. ۇرپاقتارىنىڭ اتى جازىلعان ەسكى تاستىڭ جانىنداعى قابىرعانىڭ تۇسىندا ساققۇلاق ءبيدىڭ ءوزىنىڭ جانە ەكى ۇلىنىڭ اتتارى تاڭبالانىپ, قابىر ۇستىنە ەسكەرتكىش ورناتىلعان.
ءار بەلەسى كونە تاريحقا بوگىپ جاتقان ەجەلگى ەرەيمەندەگى ەلدىڭ كەشەگى وتكەن كۇنىن, ونىڭ جاقسىسى مەن جايساڭىنىڭ ىزگى مۇراتىن ايعاقتايتىن كونە كەسەنە قازىرگى كۇنى دە وكپەك جولاۋشىعا وي سالىپ, قياننان كوزگە تۇسەدى.
اقمولا وبلىسى,
ەرەيمەنتاۋ اۋدانى
