شيەلى كەنتىندە مەملەكەتتىك رامىزدەر الاڭىنىڭ اشىلۋ سالتاناتى ءوتتى. رامىزدەر الاڭىندا مەملەكەتتىك ەلتاڭبا, مەملەكەتتىك گيمننىڭ ءماتىنى جانە بيىكتىگى 23 مەتر بولاتىن مەملەكەتتىك تۋ ورنالاسقان.
«قازاق ەلىنىڭ تاۋەلسىزدىك الىپ, الەم ەلدەرىمەن تەرەزە تەڭەستىرىپ, شەكاراسىن شەگەندەپ, بىرلىگىن بەكەمدەپ, مەملەكەتتىك رامىزدەرىن بەكىتكەنىنە بيىل 28 جىل تولادى. بۇل - از ۋاقىت بولعانىمەن, الەم كارتاسىندا قازاقستان دەگەن دەربەس مەملەكەتتىڭ بار ەكەنىنىڭ بىرەگەي بەلگىسى. تۇڭعىش پرەزيدەنتىمىز نۇرسۇلتان ءابىش ۇلى نازارباەۆتىڭ: «تاۋەلسىزدىك – التىن كۇمبەز دەيتىن بولساق, سول كۇمبەزدى تىرەپ تۇرعان ءتورت بەلگى رامىزدەرىمىز بار, ونىڭ ءبىرىنشىسى – ەلتاڭبا, ەكىنشىسى - ءانۇران, ءۇشىنشىسى – كوك بايراق, ءتورتىنشىسى – قازاق ءتىلى» دەگەن حالىق جۇرەگىنەن ورىن العان دانا ءسوزى بار. رامىزدەر حالىقتىڭ رۋحى مەن ايباتىن ءبىلدىرىپ قانا قويماي, سول مەملەكەتتىڭ الەمدىك وركەنيەت كوشىندەگى ورنى مەن دەڭگەيىن دە بەلگىلەيدى. بۇگىن, مىنە, كوك بايراعىمىزدى بيىككە كوتەرىپ, مەملەكەتتىك رامىزدەر الاڭىن اشقالى تۇرمىز», دەدى ايماق باسشىسى.
ايتا كەتەيىك, الاڭدا كەنت تۇرعىندارى مەن قوناقتارىنىڭ جايلىلىعى ءۇشىن بارلىق جاعداي جاسالىپ, ىرگەلەس اۋماق قورشالعان, جاسىل جەلەكتەر وتىرعىزىلىپ, دەمالۋشىلارعا ارنالعان ورىندىقتار ورناتىلعان. بۇل جەر مەملەكەتتىك جانە قۇقىق قورعاۋ ورگاندارى قىزمەتكەرلەرىنىڭ انت قابىلداۋ, اسكەرگە شاقىرىلۋشىلاردى شىعارىپ سالۋ جانە باسقا دا پاتريوتتىق ءىس-شارالار, رەسمي مەرەكەلىك جيىندار وتكىزىلەتىن ورىنعا اينالادى.
رامىزدەر الاڭىنىڭ اشىلۋ راسىمىندە سوت سالاسىنىڭ ارداگەرى تۇرمات بايماعامبەت اۋدان تۇرعىندارىن قۇتتىقتادى.
ەستەرىڭىزگە سالا كەتەيىك, وتكەن جىلى رامىزدەر الاڭى قازالى جانە ارال اۋداندارىندا اشىلعان ەدى, كەلەشەكتە بارلىق 7 اۋداندا دا سالىناتىن بولادى.
سونىمەن قاتار, بۇگىن «رۋحاني جاڭعىرۋ» اللەياسى اشىلدى. وندا 11 مەترلىك «قازاق ەلى» مەن «قازاق حاندىعى» مونۋمەنتى, قازاق حالقىنىڭ ەجەلگى ءداۋىرى, لايدبوكستاردا تاۋەلسىزدىك جىلدارىنداعى قابىلدانعان تاريحي شەشىمدەر كەزەڭى جازىلعان. ىرگەلەس اۋماق اباتتاندىرىلىپ, كوگالداندىرىلدى.
جۇمىس ساپارى بارىسىندا ايماق باسشىسى جەكە كاسىپكەر «ب.اشىربەكوۆ» كۇرىش اقتاۋ زاۋىتىنىڭ جۇمىسىمەن تانىستى. زاۋىت وتكەن جىلدىڭ جەلتوقسان ايىندا كاسىپكەر قاراجاتىنا سالىنعان. نىساندا 12 ادام جۇمىس ىستەيدى. كاسىپورىن تاۋلىگىنە 86 توننا اقتالماعان كۇرىش وڭدەيدى جانە 28 توننا جارما وندىرەدى.
