ەرەن تۇلعالاردىڭ قاتارىنان كورىنگەن اقجۇرەك ەركىن كۇرەسپەن 1996 جىلدان باستاپ اينالىسقان. ءوزى دە جاس كۇنىنەن باستاپ ەركىن كۇرەسپەن اينالىسقان اكەسى دوستىق ۇلىنىڭ وسى جەتىستىككە جەتۋى جولىندا بارلىق مۇمكىندىكتى جاسايدى. سول كەزدەگى ون جاسار بالانىڭ ارمانى دا, ماقساتى دا قازاق سپورتىن الەمگە ايگىلەپ, كوك بايراعىن الەم تورىندە اسقاقتاتۋ بولىپتى. اقجۇرەك بالا كۇنىنەن تانىمال جاتتىقتىرۋشى شوقان نادىربەكوۆتىڭ تاربيەسىندە بولادى. ول يسلام بايرامۋكوۆ سياقتى اتاقتى سپورتشىنى دا باپتاپ, الامانعا قوسقان ازامات. ال 2008 جىلى شوقان نادىربەكوۆ ومىردەن وتكەن سوڭ, ول اقتوبەلىك جاتتىقتىرۋشى باۋىرجان نۇرماحانوۆتىڭ الماتى قالاسىنداعى ۇيىندە جاتىپ, 2010 جىلدان 2012 جىلعا دەيىن لوندون وليمپياداسىنا دايىندالدى. وسى جولدا كەزدەسكەن قيىندىقتارعا قاراماي, الدىنا ماقسات قويعان باتىر ۇل جەڭىس تۇعىرىنان كورىنۋدى ماقسات تۇتادى. «بۇل وليمپياداعا جولداما الۋ وڭاي بولعان جوق. ەلىمىزدىڭ اتىنان قاتىساتىن ۇلى باسەكە بولعان سوڭ, وعان ۇلكەن دايىندىق كەرەك. لوندون وليمپياداسىنا جولداما الۋ ءۇشىن ەلىمىزدىڭ اتىنان قاتىساتىن ياكۋت ۇلتىنىڭ وكىلى لەونيد سپيريدونوۆپەن باق سىناستىم. ناتيجەسىندە باسىمدىق مەنىڭ پايداما شەشىلىپ, لوندون وليمپياداسىنا باردىم. ەلىمىزدىڭ اتىنان وسىنداي جارىسقا قاتىسىپ, جۇلدە العانىمدى ماقتانىش سانايمىن», دەيدى اقجۇرەكتىڭ ءوزى.
قازاقستاننىڭ ءتورت دۇركىن چەمپيونى, بىرنەشە دۇركىن حالىقارالىق بىرىنشىلىكتەردىڭ جەڭىمپازى, ازيا چەمپيونى اقجۇرەك تاڭاتاروۆتىڭ دا سپورت جولىندا قيىندىقتار كوپ بولىپتى. «باق شابا ما, باپ شابا ما» دەگەندەي, لوندون وليمپياداسىنىڭ الدىندا بەيجىڭگە بارماق بولعان ونىڭ جولى بولا قويمايدى. «اۋەل باستا ليتسەنزيانى كىم السا دا, ءوزارا ايقاستا جەڭگەندەرىڭ وليمپياداعا باراسىڭ دەلىنگەن. شەشۋشى ايقاس رەسەيدە وتەتىن بولدى. وندا سالماق ولشەۋ ءراسىمى وتەتىن كۇنى لەونيد كەلىپ تۇرىپ, «قازىر كەلەم» دەپ جوق بولدى دا, اقىرى جارىسقا قاتىسپادى. ول جارىستا جەڭىسكە جەتىپ, بەيجىڭگە مەن باراتىن بولدىم. سول كەزدە ءوزىمىزدىڭ وبلىستىق اكىمدىكتەن قۇتتىقتاۋ الىپ, قۋانىشىم قوينىما سىيماي, شاتتانعان ەدىم. وليمپياداعا تىڭعىلىقتى دايىندىق جاساپ جۇرگەندە ۇلتتىق قۇراما باسشىلارى بەيجىڭگە لەونيد سپيريدونوۆتىڭ باراتىنىن ايتتى. ال مەن 66 كيلو سالماقتا ەل قورجىنىنا مەدال سالامىن دەپ الدىما ماقسات قويعان ەدىم. شوقان نادىربەكوۆتەي نار اعامنىڭ جۇيكەسىنە وسى كەزدە سالماق ءتۇستى. وسى جىلى شوقان اعا باقيلىق بولدى», دەيدى اقجۇرەك. كەيىن لوندون وليمپياداسىندا دا ول ادىلەتسىزدىككە جولىعادى. بەلدەسۋ كەزىندە دارا سپورتشىعا ءتان ەمەس قۋلىقپەن ءۇندىس سۋشيل كۋماردىڭ اقجۇرەكتىڭ قۇلاعىن قىرشىپ العانىن ءدۇيىم جۇرت بىلەدى. ءتىپتى وعان ورىننىڭ ءادىل بەرىلمەگەنى دە ايتىلعان. سوندا دا ول ناعىز ەر-ازاماتقا ءتان سابىرلىلىقپەن ايقاستى.
لوندون وليمپياداسىنان قولا جۇلدە ەنشىلەپ كەلگەن اقجۇرەك ەركىن كۇرەستەن قول ۇزگەن جوق. قايتا ءوزىنىڭ ناعىز بابىندا ەكەنىن كورسەتىپ, 2017 جىلى ءۇندىستان مەملەكەتىندە وتكەن ازيا چەمپيوناتىندا چەمپيون بولدى. سول جىلى پاريجدە وتكەن الەم چەمپيوناتىندا قولا جۇلدە الدى. مۇنىڭ ءبارى دە تالاي جىلعى ەتكەن ەڭبەكتىڭ, توككەن تەردىڭ وتەۋى ەكەنى انىق.
بۇگىنگى تاڭدا اقجۇرەك تاڭاتاروۆ باسقاراتىن №5 جامبىل وبلىستىق مامانداندىرىلعان بالالار-جاسوسپىرىمدەر سپورت مەكتەبىندە 850 بالا جاتتىقسا, ولاردى جاتتىقتىراتىن 35 جاتتىقتىرۋشى بار. «مەن بالا كۇنىمنەن باۋىرجان مومىش ۇلى اتامىزدى وزىمە ۇلگى تۇتىپ كەلەمىن. ول كىسىنىڭ ءاربىر اتالى ءسوزى مەن ءۇشىن ومىرلىك تەمىرقازىق. ءبىز جاۋىنگەر حالىقتىڭ ۇرپاعىمىز. قان مايداندا نەمىسپەن الىسقان, ءومىر مەن ءولىم اراسىندا شايقاسقان باۋىرجان اتامىز سياقتى تالاي ەرلەر وتكەن. ءوزىم ىلعي دا ءتۇرلى ۇلت وكىلدەرىمەن بەلدەسۋ الدىندا بابالارىمىزدىڭ باتىرلىعىن ەسىمە الامىن. سودان بويىما رۋح قونىپ, كوپ جاعدايدا جەڭىسكە جەتەمىن. بۇگىندە ءوزىم باسشىلىق جاساپ وتىرعان مەكتەپتىڭ جاتتىعۋشىلارىنا بابالارىمىزدىڭ باتىرلىعى مەن ەرلىگى تۋرالى كوپ ايتامىن», دەيدى اقجۇرەك بىزبەن سۇحباتىندا.
اقجۇرەك العان اسۋلاردىڭ بۇگىندە التى الاشقا ايان بولعانى بەلگىلى. ت.رىسقۇلوۆ اۋدانىنىڭ قۇمارىق اۋىلىندا دۇنيەگە كەلىپ, بالا كۇنىنەن قازاق سپورتىن الەمگە ايگىلەۋدى ماقسات ەتكەن قايسار ۇل ماقساتىنا جەتتى. تالاي مىقتىنى تىزە بۇكتىرىپ, ۇلت رۋحىن مويىنداتتى. ەركىن كۇرەس دەسە ىشكەن اسىن جەرگە قوياتىن اقجۇرەكتىڭ ۇلتتىق سپورتقا دەگەن قولداۋى ءبىر توبە. 2012 جىلى بۋداپەشتتە وتكەن الەم چەمپيوناتىندا ءۇشىنشى ورىن العان مەيىرجان اشيروۆ پەن تۇركيادا جاستار اراسىندا وتكەن الەم چەمپيوناتىندا تاعى دا ءۇشىنشى ورىن العان نۇرسۇلتان نايزابەكوۆ سياقتى اۋليەاتالىق جاس سپورتشىلارعا قولداۋ كورسەتىپ, ەكەۋىنە ءوز ەسەبىنەن ەكى اۆتوكولىك سىيلاعانى دا ەل ەسىندە. سونىمەن قاتار سپورتتى دامىتۋ ماقساتىندا ارنايى قور اشىپ, جاستارعا قارجىلاي قولداۋ كورسەتىپ كەلەدى. بۇل دا حالقىمىزدىڭ بويىنداعى باتىرلىقپەن, ەرلىكپەن, جومارتتىقپەن ۇشتاسىپ جاتقان كورىنىس. ءسوز سوڭىندا اقجۇرەك تاڭاتاروۆ قولىنان كەلگەنشە جاس سپورتشىلارعا قولداۋ كورسەتە بەرەتىنىن, كەلەشەك وليمپيادا جەڭىمپازدارىن دايىنداۋ ءۇشىن ايانبايتىنىن جەتكىزدى.
