ىزگى نيەتى ۇلبىرەگەن ءان كەشى العاشقى رەت كراسنويار اۋىلىندا وتكىزىلگەن بولاتىن. كەيىن كوكشەتاۋ قالاسىندا جالعاستى. وزگەشە ءوڭدى ءان كەشىنە جينالعان كوپشىلىك ونەرپازدىڭ ونەرىنە دە, نيەتىنە دە ءتانتى بولدى. ءسوز اراسىندا مۇراتقازىنىڭ التاي ايماعىنداعى شەمىرشى اۋىلىندا دۇنيەگە كەلگەندىگىن ايتا كەتسەك ارتىقتىعى بولماس. ءانشى ءوز جانىنان ءان دە شىعارادى. كۇنى بۇگىنگە دەيىن ەلۋدەن استام ءان جازىپتى. ەلدى ەلەڭ ەتكىزگەن كونتسەرتتىك باعدارلاماسىندا جاڭا اندەرىنىڭ دە تۇساۋى كەسىلدى. باستى تاقىرىبى ار الدىنداعى تازالىق, ادامگەرشىلىكتى ايالاۋ.
–بۇگىنگى كۇننىڭ ەڭ وزەكتى ماسەلەسى – انالاردى ارداقتاۋ, الەۋمەتتىك-تۇرمىستىق جاعدايلارىن جاقسارتۋ بولىپ تۇر,–دەيدى ءانشىنىڭ ءوزى,–جالعىزباستى انا نۇرگۇل قارجاۋوۆا جەتى پەرزەنتىمەن جالدامالى پاتەردى پانالاپ ءجۇر ەكەن. تۇڭعىشى 19 جاسقا تولسا, كەنجەسى ءبىر جاستا. وسىنداي انالارعا كومەكتەسۋىمىز كەرەك قوي. سوندىقتان, ءان كەشىن ۇيىمداستىرىپ, تۇسكەن بار تابىستى جالعىزىلىكتى اناعا بەرگىم كەلدى.
ەل ىشىندە وسىنداي جاناشىر جانداردىڭ بولعانى قانداي قۋانىش. جالعىز مۇراتقازى عانا ەمەس, ءدۇيىم ەل ىزگىلىك شۋاعىمەن تاعدىر تالكەگىنەن توڭعان انالاردى جىلىتۋعا بەت بۇرعان. ماسەلەن, وبلىس ورتالىعىنداعى ناۋان حازىرەت اتىنداعى ورتالىق مەشىت پەن «زەكەت» كورپوراتيۆتىك قايىرىمدىلىق قورى قولعا العان «ەل ۇلەسى – پاتەرگە» جوباسى اياسىندا 2018 جىلى ءۇش وتباسى قونىس تويىن تويلادى. قارلىعاشتىڭ قاناتىمەن قارا ورتكە سۋ سەپكەنى ءتارىزدى مىسال. تىلەكشىنىڭ ءبارىن تۇگەندەي الماعانىمەن, ءار جۇرەكتە مەيىرىم شۋاعى شالقىپ تۇرعاننىڭ ءوزى قانداي قۋانىش.
اقمولا وبلىسى
