ءبىر كۇنى بۇعان اۋداندىق پارتيا كوميتەتىنەن تەلەفون شالىپ, اۋدان باسشىسىنىڭ ءوزىمەن سويلەسكىسى كەلەتىنىن, سوندىقتان اۋپارتكومعا كەلىپ كەتۋى كەرەك ەكەندىگىن ايتتى. كەلدى. سويتسە, باسشىلىق قاقاڭدى اۋداندىق گازەت رەداكتورىنىڭ ورىنباسارى لاۋازىمىنا لايىق دەپ تاۋىپتى. وسىنداي ويلارى بار ەكەنىن جەتكىزگەندە جازۋعا قاشاننان يكەمى بار, قولى قالت ەتكەندە ءتۇرلى تاقىرىپتارعا قالام تارتىپ تا جۇرگەن قاقاڭ ونشا قارسى بولا قويعان جوق, تەك پاتەر ماسەلەسى قالاي شەشىلەدى ەكەن دەگەن عانا ساۋال قويدى. باسشىلار بولسا ول جاعىنان قام جەمەۋىن, پاتەردىڭ بولاتىنىن ايتتى. بۇل 1978 جىلدىڭ جازى بولاتىن.
وسى ورايدا ءبىر جايتقا ەرەكشە توقتالا كەتكەن ءجون. كەشەگى كەڭەستىك داۋىردە قوستاناي وبلىسىندا قازاق تىلىندە جارىق كورەتىن ءبىر دە ءبىر اۋداندىق گازەت بولعان جوق. جالعىز سەميوزەر اۋدانىندا عانا «جەڭىس تۋى», «زناميا پوبەدى» دەپ اتالاتىن گازەت ەكى تىلدە شىعىپ تۇردى. قاقاڭا, ياعني قاناپيا مىرزاعوجينگە وسى گازەت رەداكتورىنىڭ ورىنباسارى بولۋ ءمىندەتى جۇكتەلگەن بولاتىن. جوعارىدا ءوزىمىز ايتىپ كەتكەندەي, گازەت ەكى تىلدە باسىلاتىن بولعاندىقتان وعان ماتەريالداردى دا ەكى تىلدە دايىنداۋ قاجەت. كەيدە انا تىلىمىزدەگى كەيبىر كۇردەلى سوزدەردىڭ ءوزىن جازۋدا قاتەلىككە جول بەرىپ جاتاتىنىمىزدى ەسكەرسەك, ەكى تىلدە ماتەريال دايىنداۋ وڭاي شارۋا ەمەس. ونىڭ ۇستىنە سەميوزەر حالقىنىڭ سانى 70 مىڭعا جۋىقتايتىن وبلىستاعى ەڭ ءىرى اۋدان بولىپ تابىلادى. وڭتۇستىك وڭىرلەر ءۇشىن بۇل اۋىز تولتىرىپ ايتۋعا تۇرارلىق تا بولماۋى مۇمكىن, ال اۋداندارداعى تۇرعىندار سانى 30-40 مىڭنىڭ و جاق, بۇ جاعىندا عانا بولاتىن سولتۇستىك وبلىستار ءۇشىن بۇل ۇلكەن كورسەتكىش. وسىنداي حالقى بار اۋداندا گازەت تيراجىنىڭ دا قوماقتى بولاتىنى وزىنەن ءوزى تۇسىنىكتى. ول ۋاقىتتاردا جۇمىس وتە قىزۋ جۇرەتىن. ايتالىق, قىستىڭ اياعىنداعى مال تولدەتۋدەن كەيىن, كوكتەم شىعا تۇقىم سەبۋ ناۋقانى باستالسا, ول اياقتالىسىمەن جۇرت ءشوپ شابۋ جۇمىستارىنا كىرىسەدى. قوي قىرقۋ سياقتى جۇمىستار ءوز الدىنا ءبىر بولەك. ءشوپ شابىلىپ, قورا باسىنا مايالانىپ بولعان سوڭ مال قىستاتۋ ناۋقانى قارقىن الادى. مىنە, وسى جۇمىستاردىڭ ءبارى اۋداندىق گازەتتە ۋاقىتىندا كورىنىس تابۋى ءتيىس. ول ۋاقىتتىڭ تالابى سونداي. وقىرمانعا قاجەت پە, قاجەت ەمەس پە, سەن اۋداندا اتقارىلىپ جاتقان جۇمىستاردى گازەت بەتىندە ۇنەمى كورسەتىپ وتىرۋىڭ كەرەك. ارينە, اۋىلدا تۋىپ-وسكەن قاقاڭ ءۇشىن اۋداندا ءجۇرىپ جاتاتىن جۇمىستاردى جازۋ ونشا قيىنعا تۇسكەن جوق. سونىڭ ارقاسىندا از ۋاقىتتىڭ ىشىندە ۇلكەن بەدەلگە يە بولدى, گازەت جۇمىسى دا جاندانا ءتۇستى. باعىنا قاراي سول كەزدەگى گازەت رەداكتورى سالىق مولداحمەتوۆ قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن وتە تاجىريبەلى باسشى بولاتىن. جاڭا قىزمەتكە توسەلىپ كەتۋىندە ول كىسىنىڭ دە ۇلەسى از بولعان جوق.
ق.مىرزاقوجيننىڭ ءوزى جيىرما جىلعا ۋاقىت قىزمەت ىستەگەن گازەتتەن كەتۋى دە قىزىق. 90-جىلداردىڭ باسىندا 60 جاسقا تولعانىن اتاپ وتپەك بولىپ اۋدان باسشىلارىن, جورا-جولداستارىن شاقىرىپ توي جاسايدى. تويدا ارينە, گازەتتىڭ سول كەزدەگى رەداكتورى دا بولادى. اۋدان باسشىسىنان كەيىن ءسوزدى قوناقتاردىڭ جاستارىنا قاراپ بەرىپ وتىرعاندىقتان, رەداكتورعا ءسوز كەزەگى كەشىرەك ءتيىپ قالسا كەرەك. وسىنى كەك تۇتقان رەداكتور ماعان اۋدان باسشىسىنان كەيىن ءسوز بەرۋىڭ كەرەك ەدى دەپ رەنىشىن دە ايتىپ سالادى. نە كەرەك, توي ۇستىندە قاقاڭدى ماقتاپ ءسويلەگەن باسشىسى, ەرتەڭىنە زەينەت جاسىنا جەتۋىڭىزگە بايلانىستى ءسىزدى قىزمەتتەن بوساتۋ تۋرالى شەشىم قابىلدادىم دەپ قاراپ تۇر دەيدى. مىنەزى بىربەتكەي قاقاڭ دا ۇلكەن باسىن كىشىرەيتپەي, «جارايدى, سەنىڭ قالاعانىڭ-اق بولسىن» دەپ شىعىپ جۇرە بەرىپتى. بىراق كوپ ۇزاماي وبلىستىق گازەتكە باسشى بولىپ كەتكەن بۇرىنعى رەداكتورى اۋىس-تۇيىستەن سوڭ قايتىپ كەلىپ, قاقاڭدى قىزمەتكە قايتا شاقىرادى...
قازاقستاننىڭ قۇرمەتتى جۋرناليسى, اۋليەكول اۋدانىنىڭ قۇرمەتتى ازاماتى اتانعان قاناپيا مىرزاعوجين بۇگىندە قۇداي قوسقان قوساعى, قازاق كسر وقۋ ءىسىنىڭ ۇزدىگى كۇلاش كارىمقىزىمەن بىرگە قانات ەسىمدى بالاسىنىڭ قولىندا استانا قالاسىندا تۇرادى. قاقاڭ Egemen Qazaqstannyń ۇزاق جىلداردان بەرگى تۇراقتى وقىرمانى عانا ەمەس, سونىمەن بىرگە تۇراقتى اۆتورلارىنىڭ دا ءبىرى. ول كىسىنىڭ ادامگەرشىلىك, ونەگەلىلىك تاقىرىپتارىن قوزعاعان ماقالالارى گازەت بەتىندە ۇنەمى جاريالانىپ تۇرادى. «كوزبەن كورگەنىم, كوڭىلگە تۇيگەنىم» جانە «كىسىلىك كەلبەتى» دەپ اتالاتىن ەكى كىتابىن شىعارعان قاقاڭ ونەگەلى اكە. داۋلەتى دە, قايراتى دا, جۇپارى دا, قاناتى دا جوعارى وقۋ ورىندارىن بىتىرگەن. ءبارى دە ءوز ماماندىقتارى بويىنشا قىزمەت اتقارىپ ءجۇر. ماعىنالى ءومىر ءسۇرىپ, ابىروي بيىگىنەن كورىنگەن دەپ قازاق ءسىرا, وسىنداي كىسىلەردى ايتسا كەرەك.
سەيفوللا شايىنعازى,
«Egemen Qazaqstan»
