فورۋمدا ۋنيۆەرسيتەت رەكتورى قۋات بايمىرزاەۆ ءبىلىم ورداسىندا ستۋدەنتتەردى ىسكەرلىك ورتاعا تارتۋ جانە ولاردىڭ بيزنەس-جوبالارىن قولداۋ بويىنشا ناقتى جۇمىس جولعا قويىلعانىن ايتتى.
- تابىستى بولۋ ءۇشىن جاڭا ماماندىقتارعا وقىپ, جەكە ماشىقتاردى جەتىلدىرۋ قاجەت. بۇل باعىتتا ءبىزدى «اتامەكەن» ۇلتتىق كاسىپكەرلەر پالاتاسى, «دامۋ» قورى قولداپ وتىر, ستارتاپ اكادەميا اشىلدى. ستۋدەنتتەردى ىسكەرلىك يدەيالارى نەمەسە جوبالارىمەن بىزگە كەلۋگە شاقىرامىن, ءبىز ءوز كەزەگىمىزدە قولداۋ جاساۋعا دايىنبىز, – دەدى رەكتور.
ال فورۋم سپيكەرى, الماتى وبلىسى كاسىپكەرلەر پالاتاسىنىڭ ديرەكتورى ناريمان ابىلشايىقوۆ ءوزىنىڭ موتيۆاتسيالىق تانىستىرىلىمىندا قوعامدىق سانانى وزگەرتكەن نەمەسە وزگەرتىپ جاتقان كەشەگى, بۇگىنگى جانە كەلەشەكتەگى ترەندتەر جايىندا كەڭىنەن توقتالدى.
- جاڭا ترەندتەردى قۇرىپ, ادامداردىڭ ساناسىنا اسەر ەتىپ جاتقان ادامداردى مىسال ەتكىم كەلەدى. بيزنەستى ءساتتى باسقارىپ, وڭىرلەردىڭ الەۋمەتتىك ماسەلەلەرىن بەلسەندى شەشىپ جۇرگەن باۋىرجان وسپانوۆ, جاقسىلىق ۇشكەمپىروۆ سىندى مەتسەناتتارعا قاراڭىزدارشى. ال كاسىبي كەمەلدىكتىڭ ارقاسىندا ءانشى ديماش قۇدايبەرگەن, اكتريسا سامال ەسلياموۆا, كليپمەيكەر ايسۇلتان سەيىتوۆ جانە باسقالار الەم ساحناسىن باعىندىرۋدا, – دەدى ول ءوز سوزىندە.
فورۋمدا الماتى وبلىسى ىشكى ساياسات باسقارماسىنىڭ جەتەكشىسى رۋستام الپىسباەۆ ەلباسىنىڭ «رۋحاني جاڭعىرۋ» باعدارلامالىق ماقالاسىن جۇزەگە اسىرۋ شەڭبەرىندە ىسكە اسقان جانە جوسپارلانعان جوبالار تۋرالى اڭگىمەلەسە, «تاماس» جشس ديرەكتورى اسقار پۋسۋرمانوۆ ستۋدەنتتەرمەن بيزنەس جۇرگىزۋ بويىنشا جەكە تاجىريبەسىمەن ءبولىستى. سونداي-اق, فورۋم اياسىندا «ءمارمار قازاقستان» جشس ديرەكتورى ولجاس زاكىر ۇلى, عىلىمي زەرتتەۋلەر ناتيجەلەرىن كوممەرتسيالاۋ كەڭسەسىنىڭ ديرەكتورى دامير ديگاي, PhD دوكتورى, مەملەكەتتىك باسقارۋ جانە مەنەدجمەنت كافەدراسىنىڭ دوتسەنتى ەلميرا قىدىرباەۆا جانە ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىتىڭ ستۋدەنتى اياۋلىم قانالبەكوۆا بايانداما جاسادى.
