ءجۋرناليستىڭ قازاسى
سارسەنبى, 11 قاڭتار 2012 7:48
بۇل وقيعا ۋاقىتىندا رەسپۋبليكا جۇرتشىلىعىن ءدۇر سىلكىندىرگەن بولاتىن. 2009 جىلدىڭ 16 جەلتوقسان كۇنى ەلىمىزدىڭ راديو-تەلەديدارلارىنىڭ كەشكى جاڭالىقتارى ۇلكەن قايعىلى حاباردى تاراتۋمەن باستالدى. قىرعىزستاننىڭ ازاماتى, بەلگىلى جانە تاۋەلسىز جۋرناليست گ.پاۆليۋكتىڭ الماتى قالاسىنىڭ فۋرمانوۆ كوشەسىندەگى كوپ قاباتتى ءۇيدىڭ جوعارىدا ورنالاسقان پاتەردىڭ ءبىرىنىڭ تەرەزەسىنەن لاقتىرىلىپ جىبەرىلگەن دەنەسى تابىلدى. التى كۇن بويى اۋرۋحانانىڭ جانساقتاۋ بولىمىندە ءومىر مەن ءولىمنىڭ اراسىندا ارپالىسىپ جاتقان گ.پاۆليۋك 22 جەلتوقسان كۇنى ءجانتاسىلىم بولدى. بەلگىلى ءجۋرناليستىڭ قازاسىنا قاتىستى قىلمىستىق ءىس قوزعالىپ, ونى اشۋعا ەلىمىزدىڭ ەڭ تاڭداۋلى دەگەن قىزمەتكەرلەرى جۇمىلدىرىلدى.
سارسەنبى, 11 قاڭتار 2012 7:48
بۇل وقيعا ۋاقىتىندا رەسپۋبليكا جۇرتشىلىعىن ءدۇر سىلكىندىرگەن بولاتىن. 2009 جىلدىڭ 16 جەلتوقسان كۇنى ەلىمىزدىڭ راديو-تەلەديدارلارىنىڭ كەشكى جاڭالىقتارى ۇلكەن قايعىلى حاباردى تاراتۋمەن باستالدى. قىرعىزستاننىڭ ازاماتى, بەلگىلى جانە تاۋەلسىز جۋرناليست گ.پاۆليۋكتىڭ الماتى قالاسىنىڭ فۋرمانوۆ كوشەسىندەگى كوپ قاباتتى ءۇيدىڭ جوعارىدا ورنالاسقان پاتەردىڭ ءبىرىنىڭ تەرەزەسىنەن لاقتىرىلىپ جىبەرىلگەن دەنەسى تابىلدى. التى كۇن بويى اۋرۋحانانىڭ جانساقتاۋ بولىمىندە ءومىر مەن ءولىمنىڭ اراسىندا ارپالىسىپ جاتقان گ.پاۆليۋك 22 جەلتوقسان كۇنى ءجانتاسىلىم بولدى. بەلگىلى ءجۋرناليستىڭ قازاسىنا قاتىستى قىلمىستىق ءىس قوزعالىپ, ونى اشۋعا ەلىمىزدىڭ ەڭ تاڭداۋلى دەگەن قىزمەتكەرلەرى جۇمىلدىرىلدى.
راسىن ايتۋىمىز كەرەك, وسى ءبىر كۇرمەۋى مول قىلمىستىق ءىستىڭ اشىلۋىنا كۇمانمەن قارايتىندار بار ەدى. سەبەبى, بۇل قىلمىستىق ءىستىڭ كۇردەلىلىگى سونشا, باسقا ەلدىڭ ازاماتىنىڭ ءبىزدىڭ ەلىمىزدىڭ مەگاپوليس قالاسى الماتىدا ءولتىرىلۋى ەدى. بىلاي قاراعاندا حالىقارالىق دارەجەدەگى ءىس. ارينە, مۇنداي ءىستىڭ قۇپياسىنىڭ دا كوپ بولارى ءسوزسىز. دەگەنمەن, وزدەرىنە جاۋاپكەرشىلىك جۇكتەلگەن قازاقستاندىق ءىز كەسۋشىلەر اتالعان ءىستى اشتى, وعان قاتىستى قىلمىسكەرلەردى قۇرىقتاپ, ءىستى سوتقا جەتكىزدى. الماتى قالاسىنىڭ قىلمىستىق ىستەر بويىنشا مامانداندىرىلعان اۋدانارالىق سوتى ءوزىنىڭ اشىق سوت ماجىلىسىندە ءىستى قاراپ, وتكەن جىلدىڭ 11 قاراشاسىندا ۇكىم شىعاردى. ياعني, قىلمىستىق ءىستىڭ ۇيىمداستىرۋشىسى قىرعىز رەسپۋبليكاسىنىڭ ازاماتى يسمانقۇلوۆ الدايارمەن بىرگە قازاقستاندىق ەكى ازامات – يگىلىكوۆ الماز بەن ورازالين شالقار ۇزاق جىلعا باس بوستاندىقتارىنان ايىرىلۋ جازاسىنا كەسىلدى.
وقيعا بىلاي بولعان ەدى. قىرعىزستاندىق الدايار يسمانقۇلوۆ سول ەلدىڭ ۇلتتىق قاۋىپسىزدىك ورگانىنا ءتۇرلى وپەراتيۆتىك جانە باسشىلىق قىزمەتتەر اتقارعان. 2009 جىلدىڭ جەلتوقسانىندا الدايار يسمانقۇلوۆ تەرگەۋ تاراپىنان انىقتالماعان كىسىلەردەن وسى رەسپۋبليكانىڭ ازاماتى, بەلگىلى جانە تاۋەلسىز جۋرناليست, قوعام قايراتكەرى گ.پاۆليۋكتىڭ كوزىن جويۋ جونىندە تاپسىرما الادى. وزىنە جۇكتەلگەن مىندەتتى ورىنداۋ ماقساتىندا يسمانقۇلوۆ پاۆليۋكتى قىرعىز رەسپۋبليكاسىنان شىعارىپ, ونى ۇرلاپ, ونداعى كوپتەگەن قۇپيا ماتەريالداردى تارتىپ الىپ, كەيىن ءجۋرناليستى ولتىرۋگە ۇيعارادى.
2009 جىلدىڭ 11 جەلتوقسانىندا يسمانقۇلوۆ الماتىعا كەلىپ, «الماتى» قوناق ۇيىنە ورنالاسادى. ونىڭ قاسىندا تەرگەۋ تاراپىنان انىقتالماعان ەكى ادام بىرگە كەلەدى. قاراۋ نيەتپەن كەلگەن ۇشەۋى پاۆليۋكتى ۇرلاۋ وپەراتسياسىنا قازاقستان رەسپۋبليكاسىنىڭ ازاماتتارى ش.ورازالين مەن ا.يگىلىكوۆتى تارتادى. سەبەبى, اتالعان ەكى ازاماتپەن يسمانقۇلوۆتىڭ بۇرىننان قارىم-قاتىناستارى بولعانى انىقتالعان. الدايار الماتىعا كەلگەننەن كەيىن ورازالينگە تەلەفون ارقىلى حابارلاسىپ, كەزدەسۋگە شاقىرادى. سول جەردە ونى الگى انىقتالماعان ەكى كىسىمەن كەزدەستىرىپ, ءجۋرناليستى ۇرلاۋ جوسپارىمەن تانىستىرادى. بىراق, يسمانقۇلوۆ وزدەرىنىڭ تۇپكى ماقساتىن, ياعني ءتيىستى اقپاراتتاردى الىپ بولعاننان كەيىن پاۆليۋكتى ولتىرەتىندىكتەرىن ورازاليننەن جاسىرىپ قالادى. كەيىن ورازالين قالتا تەلەفون ارقىلى يگىلىكوۆپەن حابارلاسىپ, كەزدەسۋگە ۋاعدالاسادى. كەزدەسۋ كەزىندە ول يگىلىكوۆكە انىقتالماعان ەكى ادامعا كومەك بەرۋىن سۇراپ, سولاردىڭ ءوتىنىشى بويىنشا پاۆليۋككە قوناق ۇيدەن ورىن دايىنداۋدى تاپسىرادى.
ءوزىنىڭ قىلمىستىق ويىن جۇزەگە اسىرۋ ماقساتىندا يسمانقۇلوۆ پاۆليۋكپەن ينتەرنەت ارقىلى حابارلاسا باستايدى. ول ءوزىن «فوند رازۆيتيە سمي ۆ ستراناح سنگ ي ەس» قورىنىڭ وكىلىمىن دەپ تانىستىرىپ, وسى قوردىڭ گرانتىن الۋعا الماتىعا كەلۋگە شاقىرادى. وسى ارالىقتا پاۆليۋككە «قازاقستان» قوناق ءۇيىنىڭ 1104 ءنومىرى دە دايىندالىپ قويىلادى.
«قازاقستان» قوناق ۇيىنەن ورىن دايىنداعان يگىلىكوۆ ءورازاليننىڭ تاپسىرماسى بويىنشا فۋرمانوۆ كوشەسىندەگى №77 ۇيدەن پاتەر دە جالداپ قويعان بولاتىن. 16 جەلتوقسان كۇنى تۇستەن كەيىن ول «قازاقستان» قوناق ۇيىنە كەلىپ, پاۆليۋكتى كۇتىپ الادى. يگىلىكوۆ ءوزىن جوعارىدا اتالعان قوردىڭ وكىلىمىن دەپ تانىستىرىپ, ءجۋرناليستى قور جەتەكشىلەرىنىڭ كۇتىپ وتىرعانىن جانە ول جەرگە ءوزىنىڭ ەرتىپ اپاراتىنىن ايتادى. راسىن ايتقاندا, پاۆليۋكتى جالدانعان پاتەرگە نە ءۇشىن الىپ بارا جاتقانىن يگىلىكوۆتىڭ ءوزى دە بىلمەيدى, ول پاتەردە قانداي جاعداي كۇتىپ تۇرعانىن پاۆليۋك تە سەزبەيدى. سەبەبى, تانىستارى يسمانقۇلوۆتىڭ جانە ونىڭ قاسىنداعى انىقتالماعان ەكى جولداسىنىڭ تۇپكى ماقساتتارىن قازاقستاندىق ەكى ازامات تا بىلمەيتىن ەدى. دەگەنمەن, قاندى وقيعا بولدى, التى كۇن بويى ولىممەن ارپالىسقان ارىستاي ازامات اۋرۋحانانىڭ جان ساقتاۋ بولىمىندە و دۇنيەلىك بولدى. قىلمىسكەرلەر ءتيىستى جازالارىن الدى.
دەگەنمەن, وسى قىلمىستىق ىسكە قاتىستى سوتتالعان الماز يگىلىكوۆتىڭ قورعاۋشىسى ب.ورازوۆ ءوزىنىڭ قورعاۋىنداعى ازاماتقا قاتىستى ۇكىممەن كەلىسپەيتىنىن ايتادى. «يگىلىكوۆكە بەرىلىپ وتىرعان 10 جىل اسا اۋىر, اسا قاتاڭ دەپ ەسەپتەيمىن» دەيدى ادۆوكات ءوزىنىڭ اپەللياتسيالىق شاعىمىندا. يگىلىكوۆتىڭ بۇرىن سەمەي قالالىق پسيحونەۆرولوگيالىق ديسپانسەردىڭ ەسەبىندە تۇرعانى, ەكىنشىدەن, يگىلىكوۆ اتالعان قىلمىستىق ىسكە باسىندا كۋاگەر رەتىندە تارتىلعانىن جانە كۋاگەر بولا تۇرا ونى التى اي بويى پوليتسيا قىزمەتكەرلەرى قورعاۋدا ۇستاعانىن جانە وسى كەزەڭدە المازدى تەرگەۋ ورىندارىنىڭ قىسىم جاساعانى دالەلدەنگەن فاكتىلەر, دەيدى ب.ورازوۆ. سوندىقتان دا يگىلىكوۆ ۇستالعان كۇننەن باستاپ سوت تەرگەۋى اياقتالعانعا دەيىن قىلمىسىن مويىنداماي, ءوزىنىڭ ادام ولىمىنە قاتىسى جوقتىعىن ايتىپ كەلەدى. سونداي-اق, بارلىق كۋاگەرلەردىڭ جانە ش.ءورازاليننىڭ كورسەتكەنىندەي, يگىلىكوۆتىڭ ادام ۇرلاۋعا قاتىسۋ نيەتى بولماعان. ونىڭ دالەلى رەتىندە, ول قاي جەردە بولماسىن, كىممەن كەزدەسپەسىن ءوزى تۋرالى ماعلۇماتتى بەرىپ, ءوزىنىڭ تەلەفون ءنومىرىن دە قالدىرىپ وتىرعان. وسىعان قاراعاندا, يگىلىكوۆكە تاعىلعان ايىپتا نەگىز جوق, جاي بولجام عانا.
نەگىزىنەن العاندا, ءجۋرناليستىڭ قازاسىنا قاتىستى بۇل قىلمىستىق ىسكە بايلانىستى جۇمىس ىستەگەن پوليتسيا قىزمەتكەرلەرىنىڭ دە, پروكۋراتۋرا قىزمەتكەرلەرىنىڭ دە, سوتتىڭ دا جۇمىستارىن ناتيجەلى دەپ ايتۋعا بولادى. دەگەنمەن, يگىلىكوۆتىڭ ادۆوكاتى ب.ورازوۆتىڭ كەلتىرىپ وتىرعان دايەكتەمەلەرى دە ەسكەرىلۋى كەرەك سياقتى…
شارافاددين ءامىروۆ.
