كينو نارىعىندا وتكىر قويىلىپ وتىرعان وسى ءماسەلەمەن مۇددەلى جاندار ارنايى اينالىسپاسا, رەجيسسەردىڭ ەڭبەگى ەش, تۇزى سور بولعانى – بولعان.
سويتسە دە قوعامنىڭ وسۋىنە كەرەكتى, كورەرمەن تالعامىن جاڭا ساپاعا كوتەرەتىن كوركەم تۋىندىلاردىڭ نەگىزگى قوزعاۋشى كۇشى كوممەرتسيالىق فيلمدەر ەكەنى بەلگىلى بولدى. كينو – قىمبات ونەر. ساپالى ونەر ۇلكەن قارجىنىڭ قولداۋىمەن عانا دۇنيەگە كەلەدى. بۇعان بيىك ونەردى جاسايتىن شىعارماشىلىق تۇلعالاردىڭ دا, قاراپايىم ادامداردىڭ دا كوزى ابدەن جەتتى. ال تالانتتى رەجيسسەرلەردىڭ ءبارىنە مينيسترلىك بولەتىن قارجى جەتە بەرمەيدى, ول ءۇشىن «قازاقفيلمگە» كەزەككە تۇرۋى كەرەك, كەزەگى كەلىپ جەتكەنشە شىعارماشىلىق شابىتىنان ايىرىلىپ, ءپىسىپ-جەتىلىپ تۇرعان ويى مەن يدەياسى سولعىن تارتىپ قالۋى مۇمكىن.
مىنە, وسى جاعدايدىڭ ءبارىن ساراپتاي كەلىپ, ونەر سالاسىندا ەڭبەك ەتىپ جۇرگەن شىعارماشىلىق ۇجىمدارعا ينۆەستورلار تارتىپ, وتاندىق جانە الەمدىك كينو نارىققا قازاقستاندىق ساپالى تۋىندىلاردى ۇسىنۋدى ماقسات ەتكەن «Bilte invest» كومپانياسى وتاندىق كينويندۋستريا سالاسىمەن بىرلەسە جۇمىس ىستەۋدى قولعا الماق. ينۆەستيتسيالىق كومپانيانىڭ ىرگەتاسىن كوتەرگەن قۇرىلتايشىلارىنىڭ ءبىرى قارجىگەر, پروديۋسەر ەدىگە قوجاحمەتتىڭ ايتۋىنشا, بۇگىنگى كۇنگە دەيىن قازاقستاندىق كينو مەن شوۋ-بيزنەس نارىعى ءىرى بيزنەس وكىلدەرى مەن ينۆەستورلار تاراپىنان ماقساتتى تۇردە قولداۋ كورگەن جوق. ونەر مەن قارجى ءبىر-بىرىمەن تىعىز بايلانىستى بولسا دا, ەكەۋىنىڭ اتى قاتار اتالمادى, ال اتالعانداي بولسا, ول تەك ءبىر جاقتى مەتسەناتتىق تۇرعىدان عانا بايلانىستىرىلاتىن ەدى. قازىر نارىق قالىپتاسىپ كەلەدى, تابىستىلىق تۇرعىسىنان قازاقستاندىق ينۆەستورلار بۇل سالاعا ەندى كوڭىل اۋدارا باستادى. بەلگىلى رەجيسسەر ساتىبالدى نارىمبەتوۆ تە مۇنداي يگى باستامانى قولدايتىنىن جانە ەلىمىزدەگى كينويندۋستريا سالاسىن دامىتۋدا ءدال وسىنداي شارالاردىڭ قولعا الىنىپ جاتقانىنا قۋانىشتى ەكەنىن ءبىلدىردى.
«Bilte invest» كومپانياسى, كوممەرتسيالىق كينودان باستاپ, مەديا جانە ويىن-ساۋىق سالاسىنا, ءتىپتى يۋتۋب جوبالارىنا دەيىن يناەستيتسيا سالۋدى كوزدەيدى. قازىرگى ۋاقىتتا قازاقستاندىق, مالايزيالىق جانە جاپونيالىق ينۆەستورلار جوبالاردى جۇزەگە اسىرۋعا بىلەك سىبانا كىرىسىپ تە كەتكەن. تاجىريبە رەتىندە العاشقى كينوعا قارجى سالىنىپ, ول قازىر پروكاتقا شىعۋعا دايىندىق ۇستىندە. ءدال بۇگىننەن باستاپ ەلىمىزدىڭ بارلىق كينوتەاترلارىندا كورەرمەنگە جول تارتاتىن فيلم «ماما + پاپا» دەپ اتالادى. سونداي-اق, كومپانيا تەك كينو عانا ەمەس, مۋزىكا سالاسىنداعى پروديۋسەرلەردى, شوۋ-بيزنەس وكىلدەرىن دە سەرىكتەستىككە شاقىرىپ وتىر.
«Bilte invest» كومپانياسى كوممەرتسيالىق ماقساتتا قۇرىلعانىمەن, جۇمىس بابىندا ۇلتتىق, ادامزاتتىق قۇندىلىقتاردى دارىپتەۋگە, ادامگەرشىلىكتى, ىزگى قادىر-قاسيەتتەردى ۇلگى تۇتۋعا بارىنشا ءمان بەرەدى. سونىمەن قاتار قازاقستاندىق شوۋ-بيزنەس جانە كينوونىمدەرىن ەكسپورتتاۋ بويىنشا جۇيەلى جۇمىس اتقارۋ جوسپارلانىپ وتىر», – دەدى ەدىگە قوجاحمەت.
قازاقستان كينوسىنا قارجى سالۋعا ىقىلاس تانىتىپ وتىرعان مالايزيالىق كاسىپكەر حايرۋل نازيم سوڭعى جىلدارى ءبىزدىڭ ەلىمىزدىڭ كينو ونەرىن قاداعالاپ جۇرگەنىن, سوندىقتان تالانتتى شىعارماشىلىق توپتىڭ الەۋەتىنە سەنىم بىلدىرەتىنىن, ال مۇنىڭ ءوز كەزەگىندە مالايزيا مەن جاپونيانىڭ, جالپى ازيانىڭ كينو پروكاتىندا جاقسى ءمۇمكىندىك سىيلايتىنىن جەتكىزدى.
«Bilte invest» بيىلدىڭ وزىندە بەس كينوكارتيناعا ينۆەستيتسيا سالۋدى جوسپارلاپ وتىر. ونىڭ ىشىندە تازا قازاقستان نارىعىنا ارنالعان كوممەرتسيالىق فيلمدەر جانە حالىقارالىق نارىققا ارنالعان فيلمدەر بار. كومپانيانىڭ تاعى ءبىر قۇرىلتايشىسى الجانبەك بولىسبەك ۇلىنىڭ پىكىرىنشە, قارجىسىن كوپشىلىكتىڭ رۋحاني تالعامىن قالىپتاستىرۋعا جۇمساعان كاسىپكەر كوپ نارسەدەن ۇتادى. بۇل ءبىر جاعى, وسى سالادان تۇراقتى تابىس كورگىسى كەلەتىندەرگە جاقسى ءمۇمكىندىك بولسا, ەڭ باستىسى, سەرىكتەس كاسىپكەرلەردىڭ قارجىسى ادام ءۇشىن ىزگى, پايدالى ماقساتقا قىزمەت ەتەدى.
الماتى
